នៅថ្ងៃចន្ទនេះ ប្រទេសកូរ៉េខាងត្បូងបានប្រកាសអំពីផែនការផ្តល់សំណងដល់ជនរងគ្រោះដោយសារពលកម្មដោយបង្ខំរបស់ជប៉ុនក្នុងសម័យសង្គ្រាម ក្នុងគោលបំណងដើម្បីបញ្ចប់ «វដ្ដដ៏អាក្រក់» នៅក្នុងទំនាក់ទំនងរបស់ប្រទេសមហាអំណាចអាស៊ីទាំងពីរនិងជំរុញទំនាក់ទំនងទៅមុខដើម្បីប្រឆាំងនឹងប្រទេសកូរ៉េខាងជើងដែលជាប្រទេសមានអាវុធនុយក្លេអ៊ែរ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AFP។
ប្រទេសជប៉ុននិងសហរដ្ឋអាមេរិកបានស្វាគមន៍ភ្លាមៗនូវការប្រកាសនេះ ប៉ុន្តែក្រុមជនរងគ្រោះបាននិយាយថាសំណងនេះគឺមិនគ្រប់គ្រាន់តាមការទាមទាររបស់ពួកគេដែលចង់បានការសុំទោសទាំងស្រុងពីរដ្ឋាភិបាលជប៉ុននិងសំណងដោយផ្ទាល់ពីក្រុមហ៊ុនជប៉ុនដែលពាក់ព័ន្ធ។
កូរ៉េខាងត្បូងនិងជប៉ុនបានបង្កើនកិច្ចសហប្រតិបត្តិការសន្តិសុខនៅក្នុងការប្រឈមនឹងការគំរាមកំហែងកើនឡើងពីកូរ៉េខាងជើង ដែលកំពុងពង្រីកកម្មវិធីអាវុធនុយក្លេអ៊ែររបស់ខ្លួនប្រឆាំងនឹងទណ្ឌកម្មរបស់អង្គការសហប្រជាជាតិ។
ប៉ុន្តែ ទំនាក់ទំនងរវាងកូរ៉េខាងត្បូងនិងជប៉ុនមានភាពតានតឹងជាយូរមកហើយទាក់ទិននឹងការត្រួតត្រាដ៏ឃោរឃៅរបស់ជប៉ុននៅសម័យអាណានិគមពីឆ្នាំ ១៩១០ ដល់ឆ្នាំ ១៩៤៥ លើឧបទ្វីបកូរ៉េ ដោយប្រទេសទាំងពីរមិនអាចឈានដល់ការព្រមព្រៀងចុងក្រោយលើទំហំនៃសំណងនិងការសុំទោស។
ជនជាតិកូរ៉េខាងត្បូងប្រហែល ៧៨០.០០០ នាក់ត្រូវបានជប៉ុនកេណ្ឌឱ្យធ្វើពលកម្មដោយបង្ខំក្នុងអំឡុងពេលនៃការត្រួតត្រារយៈពេល ៣៥ ឆ្នាំរបស់ជប៉ុនលើឧបទ្វីបកូរ៉េ។ នេះបើយោងតាមទិន្នន័យរបស់រដ្ឋាភិបាលកូរ៉េខាងត្បូង។
តួលេខនេះមិនបានរួមបញ្ចូលនូវស្ត្រីកូរ៉េដែលត្រូវបានទាហានជប៉ុនបង្ខំឱ្យធ្វើទាសករផ្លូវភេទនោះទេ។
ផែនការរបស់រដ្ឋាភិបាលកូរ៉េខាងត្បូងគឺយកថវិកាពីក្រុមហ៊ុនធំៗរបស់កូរ៉េខាងត្បូងដែលទទួលបានប្រយោជន៍ពីកិច្ចព្រមព្រៀងសំណងឆ្នាំ ១៩៦៥ ជាមួយនឹងជប៉ុន និងប្រើថវិកាទាំងនោះដើម្បីសងជនរងគ្រោះនិងក្រុមគ្រួសាររបស់ពួកគេ។ នេះបើតាមការបញ្ជាក់របស់រដ្ឋមន្ត្រីការបរទេសកូរ៉េខាងត្បូងលោក Park Jin៕
