ភ្ជាប់​ទៅ​គេហទំព័រ​ទាក់ទង

អតីត​ប្រធានាធិបតី​ប្រទេស​សេណេហ្គាល់​វិល​ត្រឡប់​ចូល​ឆាក​នយោបាយ​វិញ


អតីត​ប្រធានាធិបតី​សេណេហ្គាល់ Abdoulaye Wade ត្រូវ​បាន​ស្វាគមន៍​នៅ​ព្រលាន​យន្ត​ហោះ​អន្តរជាតិ​ក្រុង​ដាកា កាល​ពី​ថ្ងៃទី​១០ ខែ​កក្កដា។

អតីត​ប្រធានាធិបតី​សេណេហ្គាល់​លោក ​Abdoulaye Wade បាន​វិល​ត្រឡប់​ចូល​មក​ប្រឡូក​ក្នុង​ឆាក​នយោបាយ​វិញ​ហើយ។ អ្នក​នយោបាយ​ វ័យ​៩១​ឆ្នាំ​រូប​នេះ​បាន​វិល​ត្រឡប់​មក​ប្រទេស​សេណេហ្គាល់​ នា​សប្តាហ៍​នេះ ជា​លើក​ទី​ពីរ​ ចាប់​តាំង​ពី​ការ​ចាញ់​ឆ្នោត​របស់​លោក​ នៅ​ឆ្នាំ​២០១២ មក។ ​

លោក​នឹង​ធ្វើ​យុទ្ធនាការ​ឃោសនា​បោះឆ្នោត​សម្រាប់​រយៈ​ពេល​ពីរ​សប្តាហ៍​ខាង​មុខ រហូត​ដល់​ថ្ងៃ​ទី​២៨ ខែ​កក្កដា ដោយ​ធ្វើ​ដំណើរ​ជុំវិញ​ប្រទេស​ដើម្បី​ជំរុញ​ឱកាស​ក្នុង​ការ​ឈ្នះ​ឆ្នោត​របស់​គណបក្ស​របស់​លោក​ក្នុង​ការ​បោះឆ្នោត​ ដែល​នឹង​ប្រព្រឹត្ត​ទៅ​នៅ​ចុង​ខែ​កក្កដា​នេះ។

នៅ​ពេល​លោក​ Abdoulaye Wade​ ត្រឡប់​មក​វិញ​ មនុស្ស​រាប់​ពាន់​នាក់​បាន​ប្រមូល​ផ្តុំ​នៅ​អាកាស​យានដ្ឋាន​ក្រុង​ដាកា​ដើម្បី​ទទួល​អតីត​មេដឹកនាំ​រូប​នេះ។

ខណៈ​ដែល​លោក​ Wade​ កំពុង​ធ្វើ​ដំណើរ​តាម​បណ្តោយ​ផ្លូវ​នៅ​ក្នុង​ប្រទេស ហ្វូង​មនុស្ស​បាន​ស្រែក​ហ៊ោថា៖ «Gorgui ដ៏​អស្ចារ្យ!» ដែល​ពាក្យ​ Gorgui នេះ​ជា​ពាក្យគួរ​សម​មួយ​ មាន​ន័យ​ថា «បុរស​ចំណាស់» ក្នុង​ភាសា Wolof។

អ្នក​គាំទ្រ​ម្នាក់​ ឈ្មោះ​ Cheikh Baye Mbour និយាយ​ថា៖ «អ្នក​ដឹង​ទេ​ថា ថ្ងៃ​នេះ​ជា​ថ្ងៃ​ធ្វើ​ការ​ ប៉ុន្តែ​គ្រប់​គ្នា​មក​ទី​នេះ ហើយ​នឹង​មាន​មនុស្ស​មក​កាន់​តែ​ច្រើន​ថែម​ទៀត»។

ក្បួនរថយន្ត​របស់​លោក​ Wade ​បើក​ទៅ​កាន់​ទីស្នាក់ការ​នានា​របស់​គណបក្ស​ប្រជាធិប​តេយ្យ​សេណេហ្គាល់​របស់​លោក​ ដែល​ហៅ​កាត់​ថា​ PDS។ លោក​ Wade​ ជា​អ្នកនយោបាយ​បក្ស​ប្រឆាំង​ដ៏​មាន​ប្រជាប្រិយភាព​ម្នាក់​នៅ​សេណេហ្គាល់​ នៅ​ពេល​ដែល​លោក​ឈ្នះ​តំណែង​ជា​ប្រធានាធិបតី​ក្នុង​ឆ្នាំ ២០០០។ ទោះបីយ៉ាង​ណា​ក៏ដោយ លោក​បាន​ចាញ់​ឆ្នោត​សម្រាប់​អាណត្តិ​ទី​បី​ក្នុង​ឆ្នាំ ២០១២។ លោក​ Wade​ បាន​ចាញ់​ការ​ប្រកួត​ប្រជែងការ​បោះឆ្នោត​លើ​លោក​ប្រធា​នាធិបតី​ Macky Sall ហើយ​បាន​លាលែង​តំណែង​ជា​អ្នក​នយោបាយ​ ហើយ​ចាកចេញ​ទៅ​ប្រទេស​បារាំង។

នៅ​ទីស្នាក់ងារ​គណបក្ស​ PDS ​លោក​ Wade ​បាន​និយាយ​ទៅ​កាន់​ហ្វូង​អ្នក​គាំទ្រ​ក្នុង​ភាសា​ Wolof។ លោក​នៅ​តែ​រក្សា​តំណែង​ជា​ប្រធាន​គណបក្ស PDS ដដែល។

លោក​បាន​បន្ថែម​ថា៖ «ខ្ញុំ​បានឮថា សេណេហ្គាល់​កំពុង​រង​ការ​ឈឺចាប់។ ហើយ​នេះ​គឺ​ធ្វើ​ឲ្យ​ខ្ញុំ​ឈឺ​ចាប់។ ប្រសិន​បើ​គ្មាន​នរណា​ម្នាក់​ដោះស្រាយ​បញ្ហា​នេះ​ដែរ ខ្ញុំ​នឹងដោះស្រាយ​បញ្ហា​នេះ​ដោយ​ខ្លួន​ឯង។ គណបក្ស​ខ្ញុំ​ និង​គណបក្ស​ដទៃ​ទៀត​ បាន​បង្កើត​ជា​កម្លាំង​មួយ​ ដែល​នឹង​ធ្វើ​ឲ្យ​លោក​ Macky Sall ចេញ​ពី​ដំណែង»។គណបក្ស​ PDS សង្ឃឹម​ថា នឹង​ទទួល​បាន​ជ័យជម្នះ​មក​វិញ​នៅ​ក្នុង​ការ​បោះឆ្នោត​សភា​ថ្ងៃ​ទី​៣០ ខែ​កក្កដា។ មាន​អាសនៈ​ចំនួន ១៦៥ នៅ​ក្នុង​សភាជាតិ​សេណេហ្គាល់។ គណបក្ស​នយោបាយ និង​ក្រុម​សម្ព័ន្ធ​បាន​ដាក់​ចេញ​បញ្ជី​ឈ្មោះ​បេក្ខជន​ថ្នាក់​តំបន់ និង​ថ្នាក់​ជាតិ។ ក្រុម​អ្នក​បោះឆ្នោត​អាច​បោះឆ្នោត​តាម​គណបក្ស​មិនមែន​សម្រាប់​ជ្រើស​រើស​បុគ្គល​ម្នាក់​ទេ។ លោក​ Wade ​ជាប់​នៅ​កំពូល​បញ្ជីសម្រាប់​ក្រុម​សម្ព័ន្ធ​គណបក្ស​ប្រឆាំង។

ទោះ​ជា​យ៉ាង​ណា ក្រុម​អ្នក​គាំទ្រ​អតីត​ប្រធានាធិបតី​រូប​នេះ​មិន​រំពឹង​ថា លោក​នឹង​ទទួល​អាសនៈ​មួយ​ក្នុង​សភា​នោះទេ។

លោកស្រី ​Binetou Fofana ​គឺ​ជា​សមាជិក​ម្នាក់​នៃ​ចលនា Mouvement Karim President ​ដែល​កំពុង​គាំទ្រ​លោក Karim ​កូនប្រុស​របស់​លោក ​Wade ​ឲ្យ​ធ្វើ​ជា​មេដឹកនាំ​សេណេហ្គាល់​បន្ទាប់​ក្នុង​ឆ្នាំ ២០១៩។

លោក​ស្រី​និយាយ​ថា លោក​ Abdoulaye Wade គ្រាន់​តែ​វិលត្រលប់​មក​ធ្វើ​យុទ្ធ នាការ​ឃោសនា​ឲ្យ​គណបក្ស​លោក​ប៉ុណ្ណោះ។ ប៉ុន្តែ​អ្នកស្រី​មិន​ជឿ​ថា លោក​ Wade ​នឹង​កាន់​អាសនៈ​ក្នុង​សភា​ទេ​ ទោះបី​ក្រុម​សម្ព័ន្ធ​ Wattu Senegal របស់​លោក​ឈ្នះ​បាន​អាសនៈ​គ្រប់គ្រាន់​ក៏​ដោយ។

លោក​ Karim Wade ​បាន​ទទួល​ការ​លើកលែង​ទោស​ពី​សំណាក់​ប្រធានាធិបតី​ បន្ទាប់​ពី​ជាប់​ពន្ធនាគារ​រយៈ​ពេល​បី​ឆ្នាំ​ ពី​បទ​ពុករលួយ។ លោក​បាន​ទៅ​រស់​នៅ​ក្រៅ​ប្រទេស​ចាប់​តាំង​ពី​ពេល​ដែល​លោក​ត្រូវ​បាន​ដោះលែង។ អ្នក​វិភាគ​នយោបាយ​លោក​ Ali Ndiaye និយាយ​ថា ការ​ពង្រឹងគណបក្ស​ PDS ​គឺ​ជា​មធ្យោបាយ​មួយ​សម្រាប់​ឲ្យ​លោក ​Abdoulaye Wade ​បើក​ផ្លូវ​ឲ្យ​កូនប្រុស​របស់​លោក​កាន់​តំណែង។

លោក​ Ndiaye ​បាន​មាន​ប្រសាសន៍​ថា លទ្ធផល​នៃ​ការ​បោះឆ្នោត​សភានឹង​ជា​ការ​វាស់​វែង​មួយ​ទៅ​លើ​ប្រជាប្រិយភាព​របស់​ប្រធានាធិបតី​នា​ពេល​បច្ចុប្បន្ន​នេះ។ លោក​បន្ត​ថា ​ប្រសិន​បើ​ក្រុម​សម្ព័ន្ធ​កំពុង​កាន់​អំណាច​មិន​ទទួល​បាន​សំឡេង​គាំទ្រ​ភាគច្រើន «បក្ស​ប្រឆាំង​នឹង​សន្និដ្ឋាន​ថា លោក​ប្រធានាធិបតី​អាចត្រូវ​បំបាក់​បាន​នៅ​ឆ្នាំ ​២០១៩»។

លោក ​Ndiaye បាន​លើក​ឡើង​បន្ថែម​ទៀត​ថា មណ្ឌលសំខាន់ៗ​ដែល​នឹង​មាន​ការ​ប្រកួត​ខ្លាំង​ក្នុង​ការ​បោះឆ្នោត​គឺ​ក្រុង​ដាកា តំបន់​ជាយ​ក្រុង​នេះ និង​ក្រុង Touba ដែល​ជា​ក្រុង​សាសនា​និយម​ស្ថិត​នៅ​ក្នុង​ចំណោម​កន្លែង​ដំបូង​ ដែល​លោក Abdoulaye Wade បាន​ទៅ​ធ្វើ​ទស្សនកិច្ច។

នា​ឆ្នាំ​នេះ គណបក្ស​នយោបាយចំនួន ៤៧ និង​ក្រុម​សម្ព័ន្ធ​ បាន​ដាក់​នូវ​បញ្ជី​ឈ្មោះ​បេក្ខជនសម្រាប់​ប្រជែង​តំណែង​ក្នុង​សភា​ជាតិ។ នេះ​រួម​មាន​ក្រុម​សម្ព័ន្ធ​ Manko Taxawu Senegal ដែល​បញ្ជី​ឈ្មោះ​បេក្ខជន​ខ្លួន​ គឺ​ដឹកនាំ​ដោយ​លោក Dakar Mayor Khalifa Sall ​ដែល​បាន​ជាប់​ពន្ធនាគារ​ក្នុង​ខែ​មីនា ពី​បទ​បន្លំ​លួច​ប្រាក់។

ចំនួន​បញ្ជី​ឈ្មោះ​គឺ​មិន​ធ្លាប់​មាន​ពី​មុន​មក​ទេ។ ប៉ុន្តែ​ក្រុម​សម្ព័ន្ធ​កំពុង​ប្រជែង​នឹង​គូបដិបក្ខ​ចំនួន​ពីរ​ គឺ​ក្រុម​សម្ព័ន្ធ​របស់​លោក ​Khalifa Sall ​និង​អតីត​ប្រធានាធិបតី Wade។ ក្រុម​សម្ព័ន្ធ​របស់​លោក​ប្រធានាធិបតី​ ដឹកនាំ​ដោយ​នាយករដ្ឋមន្រ្តី​នា​ពេល​បច្ចុប្បន្ន​លោក Mouhamed Boun Abdallah Dionne មិន​បាន​ធ្វើ​ការ​អធិប្បាយ​ផ្លូវការ​ណា​មួយ​ពី​ការ​វិលត្រឡប់​ចូលឆាក​នយោបាយ​របស់​លោក​ Wade ទេ៕

ប្រែ​សម្រួល​ដោយ​ ណឹម សុភ័ក្រ្តបញ្ញា

XS
SM
MD
LG