ជនសង្ស័យម្នាក់ដែលមានភិនភាគស្រដៀងទៅនឹងអ្នកដាក់គ្រាប់បែកអត្តឃាតនៅឯទីសក្ការៈបូជាក្នុងទីក្រុងបាងកកបានត្រូវចាប់ខ្លួន នេះបើតាមការប្រកាសរបស់នាយករដ្ឋមន្រ្តី Prayuth Chan-ocha នៃប្រទេសថៃនៅថ្ងៃអង្គារនេះ។
មេដឹកនាំក្រុមប្រឹក្សាយោធាបាននិយាយថា ជនសង្ស័យដែលមិនមែនជាជនជាតិថៃ បានត្រូវចាប់ខ្លួននៅក្នុងខេត្តសាកែវនៅតាមព្រំដែនជាមួយប្រទេសកម្ពុជា។
ការផ្ទុះគ្រាប់បែកកាលពីថ្ងៃទី១៧ ខែសីហានៅទីកន្លែងសក្ការៈបូជាទីក្រុងបាងកកដែលបានសម្លាប់មនុស្ស២០នាក់ ហើយធ្វើឲ្យមនុស្សជាង១០០នាក់ទៀតរងរបួស។
ប៉ុន្មានម៉ោងមុនពេលប្រកាសចាប់ខ្លួនជនរងការចោទប្រកាន់ពីការបំផ្ទុះគ្រាប់បែក ក្រុមប្រឹក្សាយោធាថៃបានអំពាវនាវនៅថ្ងៃអង្គារនេះដល់ពួកម្ចាស់ផ្ទះឲ្យជួយក្រុមប្រឹក្សាយោធាដើម្បីស្វែងរកអ្នកដែលពាក់ព័ន្ធជាមួយក្រុមទទួលខុសត្រូវចំពោះការបំផ្ទុះគ្រាប់បែកដ៏ប្រល័យនេះ។
សំណើរនេះបានធ្វើឡើងនៅក្នុងការផ្សាយតាមបណ្តាញទូរទស្សន៍ទាំងអស់នៅពេលរសៀលថ្ងៃត្រង់ដើម្បីផ្តល់ព័ត៌មានថ្មីៗដល់សាធារណជនស្តីពីការស៊ើបអង្កេតនៅក្នុងការវាយប្រហារដែលក្រុមអាជ្ញាធរបាននិយាយជាយូរយារណាស់មកហើយថា មិនមែនជាសកម្មភាពភេរវកម្មនោះ។
ការប្រកាសនៅថ្ងៃអង្គារ ដែលបានត្រូវប្រកាសជាភាសាអង់គ្លេស ថៃ និងចិនកុកងឺ បានចាប់ផ្តើមដោយមានការសន្យាថា ការទិញសំបុត្រយន្តហោះពីប្រទេសផ្សេងៗចូលក្នុងប្រទេសថៃនៅតែស្ថិតក្នុងកម្រិតធម្មតា។
ការប្រកាសរបស់ក្រុមប្រឹក្សាយោធាក៏បានស្នើរសុំម្ចាស់គេហដ្ឋាន ផ្ទះសំណាក់ និងអាគារស្នាក់នៅឲ្យផ្តល់ព័ត៌មានដល់ក្រុមមន្រ្តីយោធា ឬប៉ូលិសនៅក្បែនោះ ឬហៅទូរស័ព្ទលេខ១៥១៥ ដើម្បីផ្តល់ព័ត៌មានដល់ក្រុមយោធា ឬប៉ូលិសអំពីបុគ្គលដែលមានការសង្ស័យនៅទីកន្លែងរបស់ខ្លួន។
ចាប់តាំងពីថ្ងៃសៅរ៍មក អាគារស្នាក់នៅ ២កន្លែង បានត្រូវធ្វើការចុះឆែកឆេរ ដោយបាននាំឲ្យមានការចាប់ខ្លួនបុរសជនជាតិបរទេសអាយុ២៨ឆ្នាំម្នាក់ ហើយអ្វីដែលក្រុមអាជ្ញាធរនិយាយថា ជាគ្រឿងផ្ទុះជាមួយនឹងវត្ថុផ្សំផ្សេងៗសម្រាប់ធ្វើគ្រាប់បែក។
មានការនិយាយស្មានៗថា ការវាយប្រហារនេះអាចជាការឆ្លើយតបទៅនឹងការនិរទេសខ្លួនជនជាតិភាគតិច Uighurs ជាង១០០នាក់កាលពីខែកក្កដាទៅកាន់ប្រទេសចិនវិញ។
ក្រុមមន្រ្តីរដ្ឋាភិបាល និងប៉ូលិសថៃ បានត្រូវគេប្រាប់មិនឲ្យធ្វើអត្ថាធិប្បាយដល់ការផ្ទុះគ្រាប់បែកនេះថា ជាសកម្មភាពភេរវកម្មអន្តរជាតិ ឬក៏និយាយពីប្រទេសតួកគី ឬនិយាយស្មានៗថា ទេសចរណ៍ចិនប្រហែលជាទិសដៅនៃការវាយប្រហារនេះ៕
