លោកសម រង្ស៊ី អតីតប្រធានគណបក្សសង្គ្រោះជាតិ ស្នើសុំឱ្យតុលាការសហរដ្ឋអាមេរិករក្សាដីការបញ្ជាឱ្យក្រុមហ៊ុនឆេវរ៉ុនផ្តល់ឯកសារពាក់ព័ន្ធនឹងការបាញ់សម្លាប់លោកកែមឡី ដោយអះអាងថា ឯកសារទាំងនេះនឹងជួយឱ្យលោករួចផុតពីការដាក់ទោសពីបទបរិហារកេរ្តិ៍ក្នុងតុលាការកម្ពុជា។
លោកសម រង្ស៊ីបានបន្ថែមថា តុលាការ និងអាជ្ញាធរកម្ពុជាមិនបានបង្ហាញឯកសារច្បាស់លាស់នោះទេ ក្នុងពេលសវនាការកន្លងមក ដែលបានកាត់ទោសឱ្យលោកមានពិរុទ្ធភាពក្នុងបណ្តឹងបរិហាកេរ្តិ៍ជាមួយនឹងលោកនាយករដ្ឋមន្ត្រីហ៊ុន សែន។ នេះបើតាមឯកសារ ដែលបានដាក់ផ្សាយកាលពីថ្ងៃទី២៩ខែមិថុនាតាមគេហទំព័រតុលាការតំបន់ភាគខាងជើងនៃរដ្ឋកាលីហ្វញ៉ារបស់សហរដ្ឋអាមេរិក។
លោកសម រង្ស៊ីបានស្នើសុំឱ្យក្រុមហ៊ុនឆេវរ៉ុន (Chevron) ដែលជាក្រុមហ៊ុនប្រេងដ៏ធំរបស់សហរដ្ឋអាមេរិក ផ្តល់ឯកសារ ដែលមានដូចជា វីដេអូពីកាមេរ៉ាសុវត្ថិភាពនៅហាងសាំងកាល់តិច (Caltex) ក្នុងរាជធានីភ្នំពេញនៅថ្ងៃបាញ់សម្លាប់លោកកែមឡី របាយការណ៍ ឬទំនាក់ទំនងផ្ទៃក្នុង ដែលបង្ហាញថា មន្ត្រីរដ្ឋាភិបាល ឬអាជ្ញាធរមូលដ្ឋាន មានវត្តមាននៅឯហាងសាំង មុនពេលលោកកែមឡីត្រូវគេបាញ់សម្លាប់ អ្នកដែលសាកសួរបុគ្គលិកក្រុមហ៊ុននៅមុន និងក្រោយការបាញ់សម្លាប់ និងទំនាក់ទំនងតាមសារទូរស័ព្ទ ឬអ៊ីម៉េលរវាងបុគ្គលិកក្រុមហ៊ុនឆេវរ៉ុននៅកម្ពុជាដែលបញ្ជាក់ថាមានគេមកសួរ មុនពេលបាញ់សម្លាប់ពាក់ព័ន្ធនឹងសម្ភារៈកាមេរ៉ាសុវត្ថិភាព ឬពីដំណើរជាប្រចាំថ្ងៃរបស់លោកកែម ឡីជាដើម។
លោកសម រង្ស៊ីចាត់ទុកថា ឯកសារទាំងនេះអាចជា «ភស្តុតាងប្រយោលបញ្ជាក់ពីការជាប់ពាក់ព័ន្ធរបស់រដ្ឋាភិបាល»។
លោកសម រង្ស៊ីបានបន្ថែមថា៖
«ព័ត៌មានទាំងនេះ និងឯកសារដទៃទៀត ដែលក្រុមហ៊ុនឆេវរ៉ុនមានអាចបញ្ជាក់បានថា ហេតុអ្វីបានជាគុណភាព និងរូបភាពវីដេអូ ដែលបានបង្ហាញនៅឯអង្គសវនាការមានកម្រិតមិនល្អ និងមិនពេញលេញបើប្រៀបធៀបនឹងអ្វីដែលក្រុមហ៊ុនឆេវរ៉ុនបានផ្តល់ជូនប៉ូលិស ក៏ដូចជាចំណុចផ្ទុយគ្នារវាងការបកស្រាយរបស់រដ្ឋាភិបាល បើប្រៀបធៀបទៅនឹងរបាយការណ៍ផ្ទៃក្នុងឬទំនាក់ទំនងរបស់ក្រុមហ៊ុនឆេវរ៉ុន»។
សេចក្តីថ្លែងការណ៍ ដែលលោកសម រង្ស៊ីដាក់ជូននេះ ជាការឆ្លើយតបនឹងញត្តិជំទាស់របស់ក្រុមហ៊ុនឆេវរ៉ុន ដែលសុំឱ្យតុលាការលុបចោលដីការបង្គាប់ឱ្យក្រុមហ៊ុនប្រេងដ៏ធំនេះផ្តល់ភស្តុតាងតាមការស្នើសុំរបស់លោកសមរង្ស៊ី ដើម្បីយកទៅការពារខ្លួនក្នុងតុលាការកម្ពុជាពាក់ព័ន្ធនឹងអត្ថាធិប្បាយដែលលោកសមរង្ស៊ីចោទថា រដ្ឋាភិបាលមានចំណែកពាក់ព័ន្ធក្នុងការធ្វើឃាតលោកកែមឡី អ្នកវិភាគនយោបាយដ៏ល្បីឈ្មោះម្នាក់។
ក្រុមហ៊ុនឆេវរ៉ុនអះអាងថា ប៉ូលិសបានរឹបអូសយកវត្ថុតាងអស់ហើយ រួមទាំងវីដេអូពីកាមេរ៉ាសុវត្ថិភាពផងដែរ ហើយវីដេអូនោះក៏បានបង្ហាញជូនក្នុងពេលធ្វើសវនាការក្នុងពេលកន្លងមកដូច្នេះលោកសម រង្ស៊ីគួរតែទៅសុំពីអាជ្ញាធរកម្ពុជា។
លោកសម រង្ស៊ីបានបញ្ជាក់នៅក្នុងសេចក្តីប្រកាសដាក់ជូនតុលាការសហរដ្ឋអាមេរិកថា នោះជាការមិនអាចធ្វើបានទេ។
លោកបានបន្ថែមថា៖
«ខ្ញុំបានព្យាយាមសុំភស្តុតាងដើម្បីយកមកការពារខ្លួននៅក្នុងសំណុំរឿងជាច្រើនប្រឆាំងនឹងខ្ញុំក្នុងរយៈពេលមួយទសវត្សរ៍នេះ។ បើទោះបីជាច្បាប់កម្ពុជាអនុញ្ញាតឱ្យមានសិទ្ធិសុំភស្តុតាងមែន ប៉ុន្តែជារឿយៗតុលាការ និងអាជ្ញាធរមិនទទួលយកពាក្យសុំឬផ្តល់តាមសំណើរបស់ខ្ញុំឡើយក្នុងពេលកន្លងមកនេះ»។
តុលាការកម្ពុជាបានកាត់ទោសបុរសម្នាក់ឈ្មោះអឿត អាងហៅជួបសម្លាប់ឱ្យជាប់ពន្ធនាគារអស់មួយជីវិត ក្រោយពីបុរសនោះសារភាពថា ខ្លួនបានបាញ់សម្លាប់លោកកែម ឡីកាលពីខែកក្កដា ឆ្នាំ២០១៦ ដោយសារតែមិនព្រមសងប្រាក់ជំពាក់ចំនួន ៣.០០០ដុល្លារ។ ប៉ុន្តែក្រុមគ្រួសារលោកកែម ឡី និងសូម្បីតែក្រុមគ្រួសាររបស់បុរសនោះមិនជឿថា ជាការពិតទេ។
លោករីឆាដ រ៉ូជឺ មេធាវីតំណាងឱ្យជនរងគ្រោះ ដែលបានដាក់ពាក្យបណ្តឹងទៅតុលាការឧក្រិដ្ឋកម្មអន្តរជាតិប្រឆាំងនឹងមន្ត្រីរដ្ឋាភិបាលកម្ពុជាបានចេញសេចក្តី ថ្លែងការណ៍គាំទ្រដល់ការស្នើសុំរបស់លោកសម រង្ស៊ីដោយបញ្ជាក់ថា ស្ថាប័នតុលាការកម្ពុជាមិនមានឯករាជ្យភាព និងជារឿយៗរំលោភច្បាប់អន្តរជាតិ និងច្បាប់កម្ពុជាខ្លួនឯង។
លោកបានបន្ថែមថា៖
«អាជ្ញាធរកម្ពុជា(ក្នុងនោះមានប៉ូលិស និងក្រុមព្រះរាជអាជ្ញា) មានប្រវត្តិក្នុងការបំភ្លៃភស្តុតាងក្នុងពេលស៊ើបអង្កេតសំណុំរឿងធ្វើឃាតនយោបាយ។ មានគ្រប់ហេតុផល ដែលត្រូវជឿជាក់ថា អាជ្ញាធរមានចេតនាលាក់បំបាំងការពិតពាក់ព័ន្ធនឹងការសម្លាប់លោកបណ្ឌិតកែម ឡី»។
ក្រុមហ៊ុនប្រេងChevron បានសុំពេលរហូតដល់ថ្ងៃទី២៧ ខែកក្កដា ដើម្បីឆ្លើយតបនឹងអំណះអំណាងបន្ថែមរបស់លោកសម រង្ស៊ី។ នេះបើតាមឯកសារព្រមព្រៀងរួមគ្នារវាងមេធាវីរបស់ក្រុមហ៊ុន និងមេធាវីរបស់លោកសមរង្ស៊ី៕
