ភ្ជាប់​ទៅ​គេហទំព័រ​ទាក់ទង

លោក សម រង្ស៊ី​ សុំ​ឱ្យ​ប្រទេស​ធំៗ​ព្យួរ​ជំនួយ​មក​កម្ពុជា

  • ម៉ែន គឹមសេង

រូបឯកសារ៖ លោក សម រង្ស៊ី ប្រធាន​គណបក្ស​សង្គ្រោះជាតិ ស្វាគមន៍​អ្នក​គាំទ្រ​គណបក្ស​នៅ​បូជនីយដ្ឋានជើងឯក កាលពី​ថ្ងៃសុក្រ ទី១៧ ខែឧសភា ឆ្នាំ២០១៥។

លោក សម រង្ស៊ី ​ស្នើ​សុំ​ឱ្យ​អន្តរជាតិ​អន្តរាគមន៍​ដើម្បី​ឱ្យ​ស្ថានការណ៍​បាន​វិល​ត្រឡប់​ទៅ​សភាពការណ៍​ដើម​វិញ​គឺ​ឱ្យ​មាន​ការ​ដោះលែង​អ្នក​ដែល​កំពុង​ជាប់​ពន្ធនាគារ ទាំង​អ្នក​ការពារសិទ្ធិ​មនុស្ស និង​មន្ត្រី​និង​សកម្ម​ជន​គណបក្ស​សង្គ្រោះជាតិ​ ព្រមទាំង​បញ្ឈប់​រាល់​ការ​ប៉ុនប៉ង​ចាប់​អ្នក​នយោបាយ​ប្រឆាំង​តទៅទៀត។

ប្រធាន​គណបក្ស​ប្រឆាំង​ដែលកំពុង​រស់នៅ​នីរទេស​ខ្លួន​ក្រៅ​ប្រទេស​ស្នើ​សុំ​ឱ្យ​បរទេស​ ដែល​ផ្តល់​ជំនួយ​ដល់​ប្រទេស​កម្ពុជា​ពិចារណា​ឡើងវិញ​នូវ​ការផ្តល់​ជំនួយ​មក​ដល់​ប្រទេស​កម្ពុជា​ដោយ​កុំ​ធ្វើ​ដូច​ជា​មិនមាន​រឿងអ្វី​កើត​ឡើង​ដូច​ក្នុង​ពេល​កន្លងមក។

ថ្លែង​ប្រាប់​សហគមន៍​ខ្មែរ​អាមេរិកាំង​នៅ​រដ្ឋ​ធានី​វ៉ាស៊ីនតោន​និង​ក្នុង​កម្មវិធី Hello VOA ​លោក សម រង្ស៊ី​ប្រធាន​គណបក្ស​សង្គ្រោះជាតិ​បាន​បញ្ជាក់​ថា​ ស្ថានការណ៍​សព្វថ្ងៃ​នេះ​តម្រូវ​ឱ្យ​ទាំង​ខ្មែរ​ទាំង​អន្តរជាតិ​យក​ចិត្ត​ទុកដាក់​កុំ​បណ្តោយ​ឱ្យ​រដ្ឋាភិបាល​កម្ពុជា​ធ្វើ​អ្វី​តាម​ចិត្ត។

លោក​បាន​បន្ថែម​ថា​៖

«ដូច្នេះ​ខ្ញុំ​បាន​ស្នើ​ឱ្យ​ថ្នាក់​ដឹកនាំ​សហរដ្ឋ​អាមេរិក​ឱ្យ​ប្រទេស​ជាមិត្ត​ទាំងអស់​សូម​ឱ្យ​ពិនិត្យ​ឡើង​វិញ​ជំហរ​របស់​ខ្លួន​ គម្រោង​របស់​ខ្លួន ​ផែនការ​របស់ខ្លួន​ សេចក្តី​សម្រេច​របស់​ខ្លួន​ទាក់​ទង​ទៅ​នឹង​ប្រទេស​កម្ពុជា​ ដែល​បាន​គិត​គូរ​ដែល​បាន​រៀបចំ​៦ខែ​មុន​នោះ សូម​ឱ្យ​គិត​ឡើងវិញ សូម​ឱ្យ​ផ្អាក​ សូមឱ្យ​ព្យួរ​ពីព្រោះ​ស្ថានការណ៍​នេះ​គ្រោះថ្នាក់​ធំ។ កុំ​ធ្វើ​មិន​ដឹង​មិន​ឮ​ដូច​ធម្មតា​»។

លោក​ សម រង្ស៊ី​ ដែល​កំពុង​ធ្វើ​ទស្សនកិច្ច​នៅ​សហរដ្ឋ​អាមេរិក ​ដើម្បី​ជួប​ជាមួយ​នឹង​មន្ត្រី​រដ្ឋាភិបាល​និង​សមាជិក​សភា​មួយ​ចំនួន បាន​រៀបរាប់​ពី​ស្ថានការណ៍​នៅ​ប្រទេស​កម្ពុជា​ប្រាប់ VOA ថា៖

«នៅ​ប្រទេស​កម្ពុជា​មាន​វិបត្តិ​នយោបាយ​មួយ​ដ៏​ធ្ងន់ធ្ងរ​យើង​ហៅថា​ មាន​ភាព​អាសន្ន​ក៏​បាន​ដែរ​ពីព្រោះ​តាំងពីរដ្ឋ​ប្រហារ​ឆ្នាំ​១៩៩៧មក​ ស្ថានការណ៍​មិន​ដែល​មាន​លក្ខណៈ​តានតឹង​ដូច​សព្វថ្ងៃ​កម្តៅ​នយោបាយ​មិន​ក្តៅ ឆេះ​រលាក​ដូចសព្វថ្ងៃ​ទេ»។​

លោក​ស្នើ​សុំ​ឱ្យ​អន្តរជាតិ​អន្តរាគមន៍​ដើម្បី​ឱ្យ​ស្ថានការណ៍​បាន​វិល​ត្រឡប់​ទៅ​សភាពការណ៍​ដើម​វិញ​គឺ​ឱ្យ​មាន​ការ​ដោះលែង​អ្នក​ដែល​កំពុង​ជាប់​ពន្ធនាគារ ទាំង​អ្នក​ការពារសិទ្ធិ​មនុស្ស និង​មន្ត្រី​និង​សកម្ម​ជន​គណបក្ស​សង្គ្រោះជាតិ​ ព្រមទាំង​បញ្ឈប់​រាល់​ការ​ប៉ុនប៉ង​ចាប់​អ្នក​នយោបាយ​ប្រឆាំង​តទៅទៀត។​

(ទស្សនាការផ្សាយផ្ទាល់តាម Facebook៖ លោក សម រង្ស៊ី ប្រធាន​គណបក្ស​សង្គ្រោះជាតិ ជួប​សំណេះសំណាល​ជាមួយ​នឹង​ពលរដ្ឋ​ខ្មែរ​អាមេរិកាំង កាលពី​ថ្ងៃទី១៥ ខែមិថុនា ឆ្នាំ២០១៦)

កាលពី​ចុង​សប្តាហ៍​មុន​ សហគមន៍​ខ្មែរ​នៅ​ក្រៅ​ប្រទេស​ដែល​មាន​សហរដ្ឋ​អាមេរិក កាណាដា បារាំង​និង​អូស្ត្រាលី​ បាន​ធ្វើ​បាតុកម្ម​ក្នុង​ពេល​ព្រមៗគ្នា​ប្រឆាំង​នឹង​ការចាប់​សកម្មជនសិទ្ធិ​មនុស្ស និង​អ្នក​នយោបាយ​ដាក់​ពន្ធនាគារនេះ។ ពួកគេ​ក៏​ស្នើ​ឱ្យ​មាន​ការ​អនុវត្តតាម​កិច្ច​ព្រម​ព្រៀង​សន្តិភាព​ទីក្រុង​ប៉ារីស ​ដែល​បាន​ចុះ​ហត្ថលេខា​ដោយ​ប្រទេស​ចំនួន​១៨ កាលពី​ឆ្នាំ​១៩៩១ ​និង​ឱ្យ​បង្កើត​ក្រុម​«ទាក់​ទង​កម្ពុជា‍»​សម្រាប់​ធានា​ដល់​ការ​បោះឆ្នោត​ដោយ​សេរី​ និង​យុត្តិធម៌ក្នុង​ពេល​ខាងមុខ​នៅ​កម្ពុជា។

លោក​ សម រង្ស៊ី បាន​ចាត់​ទុក​ថា​ជា​«ការ​ផ្តួចផ្តើម​គំនិត​ដ៏​ល្អ‍»។ លោក​បាន​បន្ថែម​ទៀត​ថា៖​

«ឥឡូវ​ប្រទេស​កម្ពុជា​យើង​បាន​ឃ្លាត​ចាក​ ឃ្លាតឆ្ងាយ​ពីផ្លូវ​ប្រជាធិបតេយ្យ ​ដូច្នេះ​ប្រទេស​ដែល​ជា​ហត្ថលេខី​ហ្នឹង​ត្រូវ​តែចេញ​មក។ ខ្លួន​បាន​សន្យា​បាន​ធានា​ឥឡូវនេះ​ត្រូវតែ​បំពេញ​ពាក្យ​សន្យា​របស់​ខ្លួន​ត្រូវតែ​ជួយ​ប្រទេស​កម្ពុជា​ឱ្យ​ត្រឡប់​មក​ផ្លូវ​ប្រជាធិបតេយ្យ​វិញ‍»។

គណបក្ស​កាន់​អំណាច​ និង​គណបក្ស​ប្រឆាំង​បាន​ប្រឈមមុខ​ដាក់​គ្នា​អស់​រយៈពេល​ជាច្រើន​ខែ។ លោក​ កឹម សុខា​ អនុប្រធាន​គណបក្ស​កំពុង​សំងំលាក់​ខ្លួន​នៅ​ក្នុង​ទីស្នាក់ការ​គណបក្ស​ក្នុង​ទីក្រុង​ភ្នំពេញ ដើម្បី​គេច​ចេញ​ពី​ការ​តាម​ចាប់​ខ្លួន។

មិន​មាន​ទាន់​មាន​សញ្ញា​ណាមួយ​ដែល​ថា​ថ្នាក់​ដឹកនាំ​នៃ​គណបក្ស​ទាំងពីរ​នឹង​ជួប​ចរចា​គ្នា​ ដើម្បី​បន្ធូរបន្ថយ​ភាព​តាន​តឹងនេះ​នៅ​ឡើយ​ទេ។

(ទស្សនាការផ្សាយផ្ទាល់តាម Facebook អំពី​កម្មវិធី Hello VOA ពិសេស​ ជាមួយ​លោក សម រង្ស៊ី ប្រធានគណបក្សសង្គ្រោះជាតិ ទាក់ទង​នឹង​នយោបាយ​កម្ពុជា​បច្ចុប្បន្ន)

លោក សម រង្ស៊ី​ បាន​ពន្យល់​ថា​ នេះ​គឺ​ដោយ​សារ​តែ​គណបក្ស​កាន់​អំណាច​គឺ​អាង​កងកម្លាំង​ប្រដាប់​អាវុធ។

លោក​បាន​បន្ថែម​ថា​៖ «គណបក្ស​កាន់​អំណាច​សព្វ​ថ្ងៃ​គិត​ខុស​ហើយ​ថា​ គំរាម​កំហែង​ធ្វើ​ឱ្យ​ប្រជារាស្រ្ត​បាក់​ទឹក​ចិត្ត​មិន​មែន​អីចឹង​សោះ​គំរាម​កំហែង​ដូច​សព្វថ្ងៃ​នេះ​ ធ្វើ​ឱ្យ​ប្រជារាស្រ្ត​គាំទ្រ​គណបក្ស​សង្គ្រោះជាតិ​កាន់​តែ​ខ្លាំង​ថែម​ទៀត‍»៕

XS
SM
MD
LG