សាលាដំបូងរាជធានីភ្នំពេញសម្រេចផ្ដន្ទាទោសអតីតប្រធានគណបក្សសង្គ្រោះជាតិគឺលោកសម រង្ស៊ី ដោយដាក់ពន្ធនាគារ១ឆ្នាំ៨ខែ និងពិន័យជាប្រាក់១០លានរៀល ហើយលោកត្រូវសងសំណង១០០រៀលទៅឱ្យលោកនាយករដ្ឋមន្ត្រី ហ៊ុន សែន។ លោកហ៊ុន សែន បានប្ដឹងលោកសម រង្ស៊ី លើករណីដែលលោកនិយាយថា រដ្ឋាភិបាលកម្ពុជានៅពីក្រោយការសម្លាប់លោកបណ្ឌិតកែម ឡី។
លោកលី សុផាណា អ្នកនាំពាក្យសាលាដំបូងរាជធានីភ្នំពេញ ប្រាប់ក្រុមអ្នកសារព័ត៌មានតាមបណ្ដាញសង្គម Telegram ថា លោកសម រង្ស៊ី ត្រូវចោទពីបទបរិហារកេរ្តិ៍ជាសាធារណៈ និងញុះញង់បង្កឲ្យមានភាពវឹកវរដល់សន្តិសុខសង្គម។
លោកលី សុផាណា បានថ្លែងតាមរយៈសារជាសំឡេងលើបណ្ដាញសង្គម Telegram ដូចនេះថា៖
«ថ្ងៃនេះ សាលាដំបូងរាជធានីភ្នំពេញបានប្រកាសសាលក្រម ដោយសម្រេចផ្ដន្ទាទោសទៅលើជនជាប់ចោទឈ្មោះសម រង្ស៊ី ដោយដាក់ពន្ធនាគារកំណត់២០ខែ និងពិន័យជាប្រាក់១០លានរៀល ពីបទបរិហារកេរ្តិ៍ជាសាធារណៈ និងញុះញង់បង្កឲ្យមានភាពវឹកវរដល់សន្តិសុខសង្គម»។
កាលពីខែសីហា ឆ្នាំ២០១៦ លោកគី តិច មេធាវីតំណាងឲ្យលោកនាយករដ្ឋមន្រ្តី ហ៊ុន សែន បានដាក់ពាក្យប្តឹងលោកសម រង្ស៊ី ដែលពេលនោះជាប្រធានគណបក្សសង្គ្រោះជាតិ។ លោកសម រង្ស៊ី ធ្លាប់បានថ្លែងតាមបណ្តាញសង្គម និងសារព័ត៌មានថា រដ្ឋាភិបាលរបស់លោកហ៊ុន សែន ជាអ្នកនៅពីក្រោយឃាតកម្មលើលោកកែម ឡី និងឃាតកម្មសម្លាប់បុគ្គលល្បីឈ្មោះមួយចំនួនទៀតនៅកម្ពុជា។
លោកសំ សុគង់ មេធាវីការពារក្តីឲ្យលោកសម រង្ស៊ី បានប្រាប់ VOA នៅថ្ងៃព្រហស្បតិ៍នេះថា សេចក្ដីសម្រេចរបស់សាលាដំបូងមិនយុត្តិធម៌ដល់កូនក្ដីរបស់លោក និងមិនអាចទទួលយកបាននោះទេ។ លោកថា មិនមានភស្តុតាងណាបង្ហាញថា លោកសម រង្ស៊ី បានប្រព្រឹត្តបទញុះញង់ដូចការចោទប្រកាន់របស់តុលាការនោះទេ។
«ជាបទញុះញង់កើត លុះត្រាតែមានការខូចខាត ឬក៏មានព្យសនកម្ម ដោយសារការលើកឡើង ដោយសារការនិយាយរបស់កូនក្ដីហ្នឹង បានវាទៅជាបទញុះញង់។ ប៉ុន្តែក្នុងរឿងនេះ ក្រោយពីមានការលើកឡើងនៅក្នុងអង្គប្រជុំ ក៏ដូចជានិយាយនៅវិទ្យុអាស៊ីសេរីនេះ មិនមានព្យសនកម្ម ឬការខូចខាត ឬក៏មានចលាចលណាដែលកើតឡើងដោយសារការនិយាយនេះនោះទេ»។
ទោះបីជាយ៉ាងណាក៏ដោយ អ្នកនាំពាក្យសាលាដំបូងរាជធានីភ្នំពេញអះអាងថា ការសម្រេចរបស់តុលាការធ្វើឡើងដោយឆ្លងកាត់ការជំនុំជម្រះប្រកបដោយភាពត្រឹមត្រូវនិងយុត្តិធម៌ ដោយពិចារណានិងពិនិត្យលើទង្វើ និងភស្តុតាង។ លោកថា ភាគីដែលមិនសុខចិត្តនឹងសាលក្រមនេះមានសិទ្ធិប្ដឹងឧទ្ធរណ៍តាមច្បាប់កំណត់។
លោកសំ សុគង់ ឱ្យដឹងថា លោកនឹងពិភាក្សាជាមួយលោកសម រង្ស៊ី ថា ត្រូវប្ដឹងជំទាស់ទៅសាលាឧទ្ធរណ៍ឬយ៉ាងណា។
ក្រៅពីបណ្ដឹងនេះ លោកសម រង្ស៊ី ក៏រងពាក្យបណ្ដឹងយ៉ាងតិចចំនួន៧ទៀតដែលប្ដឹងដោយលោកហ៊ុន សែន និងមន្ត្រី ឬអ្នកស្និទ្ធជាមួយរដ្ឋាភិបាល។ លោកសម រង្ស៊ី ត្រូវបានតុលាការកាត់ទោសជាបន្តបន្ទាប់ ដោយក្នុងករណីខ្លះលោកត្រូវបានកាត់ទោសឱ្យជាប់ពន្ធនាគារ និងករណីខ្លះតម្រូវឱ្យបង់ប្រាក់សំណង។
ពាក់ព័ន្ធនឹងសំណុំរឿងឃាតកម្មលើលោកកែម ឡី រដ្ឋាភិបាលក៏បានប្ដឹងមនុស្សចំនួន២នាក់ទៀតផងដែរ។
លោកហ៊ុន សែន បានប្តឹងលោកស្រីថាក់ ឡានី សមាជិកព្រឹទ្ធសភាគណបក្សសម រង្ស៊ីពីបទបរិហារកេរ្តិ៍ជាសាធារណៈ និងញុះញង់បង្កឲ្យមានចលាចលក្នុងសង្គម បន្ទាប់ពីលោកស្រីថ្លែងថា លោកហ៊ុន សែន ជាអ្នកសម្លាប់លោកកែម ឡី។ តុលាការបានកាត់ទោសលោកស្រីឲ្យជាប់ពន្ធនាគារ១ឆ្នាំ៦ខែ និងពិន័យជាប្រាក់៨លានរៀល ព្រមទាំងបង្គាប់ឲ្យសងសំណងជំងឺចិត្តទៅលោកហ៊ុន សែន ចំនួន១០០រៀល។
ចំណែកអ្នកវិភាគនយោបាយលោកគឹម សុខ ត្រូវបានលោកហ៊ុន សែន ប្តឹងក្រោមបទចោទប្រកាន់ស្រដៀងគ្នានេះ ដោយទាមទារសំណង៥០ម៉ឺនដុល្លារ។ លោកគឹម សុខត្រូវបានតុលាការសម្រេចឃុំខ្លួនបណ្ដោះអាសន្នកាលពីពាក់កណ្ដាលខែកុម្ភៈ៕
