មេធាវីការពារក្តីឲ្យលោក សម រង្ស៊ីលើកឡើងថា ការដែលតុលាការមិនអនុញ្ញាតពន្យារពេលសវនាការក្នុងសំណុំរឿងដែលលោក សម រង្ស៊ី អតីតប្រធានគណបក្សសង្គ្រោះជាតិចោទរដ្ឋាភិបាលថា ជាអ្នកនៅពីក្រោយឃាតកម្មលោក កែម ឡី ទៅតាមការស្នើសុំរបស់មេធាវី គឺជាការរំលោភសិទ្ធិជនជាប់ចោទ និងមិនអាចផ្តល់យុត្តិធម៌ដល់កូនក្តីរបស់លោក។
នៅព្រឹកថ្ងៃសុក្រនេះ សាលាដំបូងរាជធានីភ្នំពេញបានបើកសវនាការជំនុំជម្រះលើបណ្តឹងដែលប្តឹងដោយមេធាវីតំណាងឲ្យលោកនាយករដ្ឋមន្រ្តី ហ៊ុន សែន ដែលបានប្តឹងលោក សម រង្ស៊ី ពីបទបរិហារកេរ្តិ៍ជាសាធារណៈនិងញុះញង់បង្កឲ្យមានចលាចលក្នុងសង្គម។ ក្រោយបញ្ចប់សវនាការដែលមានរយៈពេល២ម៉ោងកន្លះ ចៅក្រមជំនុំជម្រះ គឺលោក អ៊ី ថាវរៈ បានលើកពេលប្រកាសសាលក្រម ទៅថ្ងៃទី៣០ ខែមីនា ខាងមុខ។
កាលពីដើមខែសីហា ឆ្នាំ២០១៦ មេធាវីតំណាងឲ្យលោកនាយករដ្ឋមន្រ្តី ហ៊ុន សែន គឺលោក គី តិច បានដាក់ពាក្យប្តឹង លោក សម រង្ស៊ី។ បណ្តឹងនេះធ្វើឡើងបន្ទាប់ពីលោក សម រង្ស៊ី ដែលពេលនោះជាប្រធានគណបក្សសង្គ្រោះជាតិ បានថ្លែងជាសាធារណៈតាមបណ្តាញសង្គម និងសារព័ត៌មានក្រោយពេលលោក កែម ឡី ត្រូវបានបាញ់សម្លាប់តែប៉ុន្មានថ្ងៃថា រដ្ឋាភិបាលរបស់លោក ហ៊ុន សែន ជាអ្នកនៅពីក្រោយឃាតកម្មលើលោក កែម ឡី និងឃាតកម្មលើបុគ្គលល្បីៗមួយចំនួនទៀតនៅកម្ពុជា។
ថ្លែងក្នុងសាលសវនាការ លោក សំ សុគង់ មេធាវីការពារក្តីឲ្យលោក សម រង្ស៊ី បានស្នើឲ្យតុលាការពន្យារពេលសវនាការ ដោយអះអាងថា កូនក្តីរបស់លោកទទួលបានដីកាកោះក្នុងរយៈពេលខ្លីពេក ហើយថា លោកមិនមានពេលគ្រប់គ្រាន់ដើម្បីស្វែងរកភស្តុតាងយកមកការពារកូនក្តី។ ទោះជាយ៉ាងណា សំណើរបស់លោក សំ សុគង់ ត្រូវបានតុលាការច្រានចោល។
លោក សំ សុគង់ ប្រាប់ VOA ក្រោយបញ្ចប់សវនាការថា តុលាការគួរតែទុកពេលវេលាសមស្របសម្រាប់មេធាវីការពារជនជាប់ចោទដើម្បីស្វែងរកភស្តុតាងឲ្យបានគ្រប់គ្រាន់និងរង់ចាំឲ្យសំណុំរឿងឃាតកម្មលើលោក កែម ឡី បានបញ្ចប់ឲ្យបានពេញលេញជាមុនសិន។
លោកបញ្ជាក់ថា៖
«មេធាវីយល់ឃើញថាបើកាលណាយើងកាត់ក្តីដោយមិនផ្តល់ពេលវេលាគ្រប់គ្រាន់ចំពោះជនត្រូវចោទ ឬជនសង្ស័យហ្នឹង គឺជាការរំលោភសិទ្ធិមួយដល់ជនជាប់ចោទ ជាពិសេសគឺសិទ្ធិទទួលបានសវនាការមួយល្អត្រឹមត្រូវ និងសវនាការមួយដែលអាចទទួលយកបានទៅតាមគោលការណ៍ច្បាប់អន្តរជាតិហ្នឹង»។
ក្នុងសវនាការសាលាដំបូងនៅព្រឹកថ្ងៃសុក្រនេះ លោក លី សុផាណា ជាតំណាងអយ្យការក្នុងសវនាការនោះ និងលោក គី តិច មេធាវីតំណាងរបស់លោក ហ៊ុន សែន បានលើកឡើងពីផលប៉ះពាល់ដល់សន្តិសុខក្នុងសង្គម ដោយសារការនិយាយជាសាធារណៈរបស់លោក សម រង្ស៊ី។
លោក លី សុផាណា លើកឡើងក្នុងសវនាការថា តុលាការធ្វើតាមនីតិវិធីច្បាប់ដូច្នេះគ្មានហេតុផលណាដែលត្រូវពន្យារពេលសវនាការនោះទេ។
លោកមេធាវី គី តិច បានការពារបណ្តឹងរបស់លោក ហ៊ុន សែន ដោយលើកឡើងក្នុងសវនាការនោះថា លោក សម រង្ស៊ី បានសរសេរនៅលើទំព័រហ្វេសប៊ុកផ្លូវការរបស់លោក សម រង្ស៊ី និងផ្តល់សម្ភាសន៍ទៅសារព័ត៌មានមួយចំនួនថា ការបាញ់សម្លាប់លោក កែម ឡី ជាអំពើភេរវកម្មមួយទៀតរៀបចំឡើងដោយរដ្ឋអំណាច។ លោក គី តិច បន្ថែមថា ការលើកឡើងរបស់លោក សម រង្ស៊ី ដោយចោទប្រកាន់ដដែលៗ លើរដ្ឋាភិបាលបានធ្វើឲ្យប្រជាពលរដ្ឋជាច្រើនចងកំហឹង និងថ្កោលទោសមកលើរាជរដ្ឋាភិបាលកម្ពុជា ហើយលោកក៏បានសំណូមពរតុលាការឲ្យដាក់ទោសលោក សម រង្ស៊ី តាមផ្លូវច្បាប់ និងបង់សំណងជំងឺចិត្តទៅលោក ហ៊ុន សែន ចំនួន១០០រៀល។
ក្រោយបញ្ចប់សវនាការ លោក គី តិច ប្រាប់អ្នកសារព័ត៌មានថា លោកចង់ឲ្យតុលាការដាក់ទោសលោក សម រង្ស៊ី ឲ្យដូចទៅនឹងសមាជិកព្រឹទ្ធសភាគណបក្សប្រឆាំងម្នាក់ដែលបានចោទលោក ហ៊ុន សែន ថាជាអ្នកសម្លាប់លោក កែម ឡី កាលពីប៉ុន្មានខែមុន។
លោកបញ្ជាក់ថា៖
«តាមការតាមដាននៅក្នុងសវនាការនេះ ខ្ញុំគិតថារឿងនេះប្រហែលជាអាចនឹងមានការផ្តន្ទាទោសដូចជំទាវ ថាក់ឡានី ដែរ។ ជាដើមបណ្តឹងគឺសុំឲ្យមានការផ្តន្ទាទោស ដោយសារការនិយាយនេះគឺជាការបំភ្លៃបំផ្លើសការពិត ទម្លាក់កំហុសទៅលើរដ្ឋាភិបាលដូចគ្នា»។
ពាក់ព័ន្ធនឹងសំណុំរឿងឃាតកម្មលើលោក កែម ឡី នេះ លោក ហ៊ុន សែន ក៏បានប្តឹងលោកស្រី ថាក់ ឡានី សមាជិកព្រឹទ្ធសភាគណបក្សសម រង្ស៊ី ពីបទបរិហារកេរ្តិ៍ជាសាធារណៈ និងញុះញង់បង្កឲ្យមានចលាចលក្នុងសង្គម បន្ទាប់ពីលោកស្រីថ្លែងថា លោក ហ៊ុន សែន ជាអ្នកសម្លាប់លោក កែម ឡី។ តុលាការបានកាត់ទោសលោកស្រីឲ្យជាប់ពន្ធនាគារ១ឆ្នាំ៦ខែ និងពិន័យជាប្រាក់៨លានរៀល ព្រមទាំងបង្គាប់ឲ្យសងសំណងជំងឺចិត្តទៅលោក ហ៊ុន សែន ចំនួន១០០រៀល ព្រមទាំងបង្គាប់ឲ្យចាប់ខ្លួនលោកស្រី ថាក់ ឡានី ដែលកំពុងនីរទេសខ្លួននៅក្រៅប្រទេសយកមកផ្តន្ទាទោសផងដែរ។
លោក កែម ឡី គឺជាអ្នកវិភាគនយោបាយដ៏សំខាន់មួយរបស់ប្រទេសកម្ពុជា។ លោកត្រូវបានខ្មាន់កាំភ្លើងបាញ់សម្លាប់តែប៉ុន្មានថ្ងៃប៉ុណ្ណោះ បន្ទាប់ពីលោកបានផ្តល់ការអធិប្បាយលើរបាយការណ៍របស់អង្គការ Global Witness ដែលបានទម្លាយឲ្យដឹងពីទ្រព្យសម្បតិ្តដ៏ច្រើនសន្ធឹកសន្ធាប់របស់ក្រុមគ្រួសារលោកនាយករដ្ឋមន្ត្រី ហ៊ុន សែន។
របាយការណ៍អង្គការ Global Witness មានចំណងជើងថា«ការគ្រប់គ្រងដ៏ប្រទូស្តរ៉ាយ៖ អាណាចក្រសាជីវកម្មរបស់គ្រួសារអ្នកដឹកនាំកម្ពុជា» ដែលបានចេញផ្សាយជាសាធារណៈកាលពីដើមខែកក្កដា ឆ្នាំ២០១៦ បានបង្ហាញថា គ្រួសាររបស់លោក ហ៊ុន សែន មានភាគហ៊ុនចុះបញ្ជីនៅក្នុងក្រុមហ៊ុនឯកជនក្នុងស្រុកចំនួន ១១៤ ដែលមានដើមទុនចុះបញ្ជីសរុបចំនួនជាង២០០លានដុល្លារអាមេរិក៕
