វ៉ាស៊ីនតោន៖ លោកសម រង្ស៊ីប្រធានគណបក្សសង្គ្រោះជាតិបានវិលត្រឡប់មកដល់ប្រទេសកម្ពុជាវិញបន្ទាប់ពីរស់នៅនិរទេសខ្លួននៅក្រៅប្រទេសអស់រយៈពេលជិតបួនឆ្នាំ។ នៅក្នុងកម្មវិធីហេឡូវីអូអេពិសេស លោកសម រង្ស៊ី បានបញ្ជាក់ថាការចូលរួមបោះឆ្នោតដ៏ច្រើនរបស់ប្រជាពលរដ្ឋនឹងជួយឱ្យពួកគេអាចសម្រេចជ្រើសរើសមេដឹកនាំល្អមួយសម្រាប់ប្រទេសជាតិ។
លោកសម រង្ស៊ីនៅមិនទាន់ប្រកាសថាការបោះឆ្នោតនេះមិនមានយុត្តិធម៌និងត្រឹមត្រូវនៅឡើយទេបើទោះបីជាសហគមន៍អន្តរជាតិបានដាក់ការសង្ស័យទៅលើដំណើរការរៀបចំការបោះឆ្នោតនេះនិងមិនបានបញ្ជូនអ្នកសង្កេតការណ៍ទៅចូលរួមក៏ដោយ។យ៉ាងណាក៏ដោយលោកសម រង្ស៊ីក៏បានបញ្ជាក់ដែរថាលោកមិនប្រកាន់នឹងធ្វើរដ្ឋាភិបាលចម្រុះជាមួយគណបក្សណាទេបើសិនគណបក្សនោះមានគោលនយោបាយដូចគ្នានឹងគណបក្សសង្គ្រោះជាតិដែលយល់ព្រមដំឡើងប្រាក់ខែជូនកម្មករនិងមន្ត្រី រាជការព្រមទាំងកម្ចាត់អំពើពុករលួយ៕
