លោក សម រង្ស៊ី អតីតប្រធានគណបក្សសង្គ្រោះជាតិ ដែលកំពុងនិរទេសខ្លួននៅក្រៅប្រទេស បានរិះគន់ថា គម្រោងរបស់លោកហ៊ុន សែនក្នុងការលើកលែងទោសអ្នកជាប់ឃុំនោះគឺជាការធ្វើដោយបង្ខំចិត្ត ដោយមានសម្ពាធពីសហគមន៍អន្តរជាតិ។
ការរិះគន់របស់ សម រង្ស៊ី ធ្វើឡើងដោយតបទៅនឹងការព្រមានពីលោកនាយករដ្ឋមន្ត្រីដែលអះអាងថា លោកនឹងពិចារណាឈប់ដោះលែងអ្នកជាប់ឃុំ រួមមានសមាជិកគណបក្សប្រឆាំងចំនួន១២រូប ប្រសិនបើមានការលើកឡើងថា ការដោះលែងនោះធ្វើឡើងក្រោមគំនាបពីបរទេស។
ក្នុងសារមួយដែលបង្ហោះលើទំព័រហ្វេសប៊ុកកាលពីយប់ថ្ងៃព្រហស្បតិ៍ លោកសម រង្ស៊ីបានបញ្ជាក់ថា ការដោះលែងអ្នកទោសនយោបាយទាំងអស់ជាបន្ទាន់ និងដោយឥតលក្ខខណ្ឌ មិនមែនជាលក្ខខណ្ឌគ្រប់គ្រាន់ ដើម្បីឲ្យសហគមន៍អន្តរជាតិឈប់រិះគន់លោក ហ៊ុន សែន នោះទេ។ លោកបន្ថែមថា លោកហ៊ុន សែនត្រូវអនុញ្ញាតឲ្យគណបក្សសង្គ្រោះជាតិដំណើរការឡើងវិញ អនុញ្ញាតឲ្យថ្នាក់ដឹកនាំគណបក្សសង្គ្រោះជាតិចំនួន១១៨រូបមានសិទ្ធិធ្វើសកម្មភាពនយោបាយពេញលេញដូចមុន ត្រូវផ្តល់តំណែងសមាជិកក្រុមប្រឹក្សាឃុំ-សង្កាត់ទៅឲ្យសកម្មជនគណបក្សសង្គ្រោះជាតិចំនួន៥០០៧រូប ដែលបានជាប់ឆ្នោតក្នុងការបោះឆ្នោតឃុំ-សង្កាត់ ខែមិថុនាឆ្នាំ២០១៧ ព្រមទាំងការទម្លាក់ចោលនូវរាល់ការចោទប្រកាន់ចំពោះមន្ត្រីគណបក្សប្រឆាំង និងមន្ត្រីសង្គមស៊ីវិលទាំងអស់។
លោក សម រង្ស៊ី សរសេរបន្ថែមក្នុងន័យដើមថា៖
«ដោយសារតែលោកហ៊ុន សែនទាល់ច្រកក្រោយពីការបោះឆ្នោតក្លែងក្លាយថ្ងៃ២៩ កក្កដាកន្លងទៅនេះ ហើយដោយសារតែសម្ពាធពីសហគមន៍អន្តរជាតិ ដែលដកភាពស្របច្បាប់ពីរដ្ឋាភិបាលរបស់គាត់ ហើយត្រៀមដាក់ទណ្ឌកម្មកាន់តែខ្លាំងឡើងៗមកលើរបបផ្តាច់ការរបស់គាត់ លោកហ៊ុន សែនត្រូវបង្ខំចិត្តដោះលែងអ្នកទោសនយោបាយទាំងអស់ ក្នុងពេលឆាប់ៗខាងមុខនេះ»។
លោកនាយករដ្ឋមន្ត្រី ហ៊ុន សែន នៅព្រឹកថ្ងៃព្រហស្បតិ៍ បានប្រកាសគម្រោងលើកលែងទោសទ្រង់ទ្រាយធំក្នុងឱកាសពិធីបុណ្យជាតិខាងមុខ ដែលក្នុងនោះមានទាំងអតីតសមាជិកគណបក្សសង្គ្រោះជាតិ ដែលកំពុងជាប់ឃុំចំនួន១២នាក់ផង។ ទន្ទឹមនឹងការប្រកាសអំពីការលើកលែងទោសនេះ លោក ហ៊ុន សែនក៏បានភ្ជាប់នឹងការព្រមានថា នឹងពិចារណាឡើងវិញ ប្រសិនបើមានការលើកឡើងថា ការលើកលែងទោសនេះធ្វើឡើងដោយសាររងសម្ពាធពីអន្តរជាតិ។
VOA បានព្យាយាមទាក់ទងសុំការអធិប្បាយពីលោក សម រង្ស៊ី ពាក់ព័ន្ធនឹងសារដែលលោកទើបបង្ហោះលើទំព័រហ្វេសប៊ុករបស់លោក តែរហូតមកដល់ល្ងាចថ្ងៃសុក្រនេះ មិនទាន់មានការឆ្លើយតបនៅឡើយ។
រហូតមកដល់ពេលនេះ សមាជិក និងសកម្មជនគណបក្សសង្គ្រោះជាតិយ៉ាងហោចណាស់ជាង២០នាក់ ត្រូវបានកាត់ទោស និងឃុំខ្លួនក្នុងពន្ធនាគារពាក់ព័ន្ធនឹងបទចោទផ្សេងៗគ្នា។
លោក អ៊ុំ សំអាន តំណាងរាស្រ្តគណបក្សប្រឆាំងមណ្ឌលសៀមរាប មុនគណបក្សនេះត្រូវបានរំលាយ ត្រូវបានសមត្ថកិច្ចចាប់ខ្លួននៅលើទឹកដីខេត្តសៀមរាប កាលពីខែមេសា ឆ្នាំ២០១៦ ក្រោមបទចោទញុះញង់ឲ្យប្រព្រឹត្តបទឧក្រិដ្ឋជាអាទិ៍ និងបទញុះញង់ឲ្យមានការរើសអើង បន្ទាប់ពីលោកបានបង្ហោះឯកសារផែនទីស្ដីពីព្រំដែនកម្ពុជា-វៀតណាម។
ចំណែកលោក មាជ សុវណ្ណារ៉ា មន្រ្តីព័ត៌មានគណបក្សសង្គ្រោះជាតិ និងសកម្មជនគណបក្សនេះជាង១០នាក់ទៀត ត្រូវបានសាលាដំបូងរាជធានីភ្នំពេញ កាលពីខែកក្កដា ឆ្នាំ២០១៥ សម្រេចផ្តន្ទាទោសដាក់ពន្ធនាគារក្នុងម្នាក់ៗពី៧ទៅ២០ឆ្នាំពីបទដឹកនាំ និងចូលរួមបាតុកម្មរំដោះទីលានប្រជាធិបតេយ្យ ក្នុងអំឡុងខែកក្កដា ឆ្នាំ២០១៤។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានសរសេរទៅកាន់អ្នកសារព័ត៌មានតាមរយៈសារអេឡិចត្រូនិចតេលេក្រាមថា លោក សម រង្ស៊ី កំពុងផ្គើនការព្រមានរបស់លោកនាយករដ្ឋមន្រ្តី ហ៊ុន សែន ដែលលោកថា ការផ្គើននេះអាចនឹងធ្វើឲ្យសកម្មជនគណបក្សប្រឆាំងត្រូវឃុំខ្លួនក្នុងពន្ធនាគារជាបន្ត។
លោកសរសេរបញ្ជាក់ក្នុងន័យដើមថា៖
«ឮសម្តេចតេជោហ៊ុន សែនមានគម្រោងស្នើទូលថ្វាយសុំព្រះរាជទានលើកលែងទោសឲ្យជនជាប់ចោទ និងទណ្ឌិតមួយចំនួន បែរជាទណ្ឌិតរូបនេះ [សម រង្ស៊ី]ថា មកពីមានគំនាបពីបរទេសដាក់មកលើសម្តេចតេជោទៅវិញ ដែលជាការមួយផ្គើននឹងការមានមតិរបស់សម្តេចតេជោ ដែលជាការបញ្ជាក់ថា ទណ្ឌិតសម រង្សីនិយាយផ្គើននេះដើម្បីទុកឲ្យបងប្អូនបន្តជាប់គុកតទៅមុខទៀត យ៉ាងពិតប្រាកដ»។
ចាប់តាំងពីមានការចាប់ខ្លួនមន្រ្តីគណបក្សប្រឆាំង ការបង្ក្រាបលើសង្គមស៊ីវិល និងអ្នកសារព័ត៌មាន ការរំលាយគណបក្សសង្គ្រោះជាតិ និងការព្យួរសិទ្ធិនយោបាយមន្រ្តីជាន់ខ្ពស់គណបក្សនេះជាង១០០នាក់ ព្រមទាំងការចាប់ខ្លួនប្រធានគណបក្សនេះគឺលោកកឹម សុខាយកទៅឃុំក្នុងពន្ធនាគារត្រពាំងផ្លុង ឯខេត្តត្បួងឃ្មុំនោះ គេឃើញមជ្ឈដ្ឋានអន្តរជាតិធំៗនានា រិះគន់រដ្ឋាភិបាលរបស់លោកហ៊ុន សែន និងដាក់ទណ្ឌកម្មចំពោះជនដែលធ្វើឲ្យខូចលទ្ធិប្រជាធិបតេយ្យនៅកម្ពុជា។ ជាមួយគ្នានោះ សហភាពអឺរ៉ុប ដែលជាទីផ្សារដ៏ធំសម្រាប់ឧស្សាហកម្មកាត់ដេរនៅកម្ពុជា ក៏បានព្រមានដកកិច្ចអនុគ្រោះពន្ធលើទំនិញនាំចូលពីកម្ពុជា ក្រោមកម្មវិធី«អនុគ្រោះពន្ធលើអី្វៗទំាងអស់លើកលែងតែអាវុធ» ឬ Everything But Arms។
ថ្មីៗនេះ ក្រោយពេលដែលការបោះឆ្នោតជ្រើសតាំងតំណាងរាស្រ្តបានបញ្ចប់ និងការប្រកាសលទ្ធផលនៃការបោះឆ្នោតបង្ហាញថា គណបក្សប្រជាជនកម្ពុជារបស់លោកនាយករដ្ឋមន្រ្តី ហ៊ុន សែនឈ្នះដាច់ នឹងឈានទៅដឹកនាំប្រទេសដោយឯកបក្សនោះ អ្នកជាប់ឃុំមួយចំនួន ដែលគេហៅថា ជា«ចំណាប់ខ្មាំងនយោបាយ» ត្រូវបានដោះលែងជាបន្តបន្ទាប់។
សកម្មជនដីធ្លីដ៏លេចធ្លោមួយរូប គឺអ្នកស្រីទេព វន្នី និងអតីតអ្នកសារព័ត៌មានវិទ្យុអាស៊ីសេរីពីររូបគឺលោក អ៊ួន ឈិន និងលោក យាង សុធារិន ត្រូវបានដោះលែងនៅដើមសប្តាហ៍នេះ ចំណែកលោក គឹម សុខ អ្នកវិភាគនយោបាយដែលតែងរិះគន់រដ្ឋាភិបាលលោកហ៊ុន សែនមិនសំចៃមាត់ ក៏ត្រូវបានដោះលែងកាលពីចុងសប្តាហ៍មុនផងដែរ។
កាលពីល្ងាចថ្ងៃព្រហស្បតិ៍ម្សិលមិញ លោក សួន សេរីរដ្ឋា ប្រធានគណបក្សអំណាចខ្មែរ ដែលត្រូវបានឃុំខ្លួនជាង១ឆ្នាំពីបទញុះញង់កុំឲ្យយោធិនស្តាប់បង្គាប់មេដឹកនាំ ធ្វើឲ្យខូចទឹកចិត្តកងទ័ព និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍នោះ ត្រូវបានដោះលែង ក្រោយពីលោកបានសរសេរលិខិតសុំទោសលោកនាយករដ្ឋមន្រ្តី ហ៊ុន សែន។
លោកហង្ស វិទូ ប្រធានក្រុមអ្នកវិភាគវ័យក្មេង ប្រាប់ VOA នារសៀលថ្ងៃសុក្រនេះថា ការដោះលែងអ្នកជាប់ឃុំដែលត្រូវបានគេចាត់ទុកថា ជាចំណាប់ខ្មាំងនយោបាយនោះ អាចបណ្តាលមកពីគណបក្សកាន់អំណាចឈ្នះឆ្នោតជាថ្មី ជាជាងការរងសម្ពាធពីអន្តរជាតិ។ លោកបន្ថែមថា បើទោះបីជាការដោះលែងទាំងនោះស្ថិតក្នុងហេតុផលណាក៏ដោយ ក្នុងដំណាក់កាលនេះ គួរតែមានការអបអរ ជាជាងការរិះគន់ ដែលអាចធ្វើឲ្យពួកគេអាចនឹងត្រូវបានឃុំខ្លួនបន្ត។
លោកបញ្ជាក់ថា៖
«យើងដឹងហើយថា លោកនាយករដ្ឋមន្រ្តី ហ៊ុន សែន ភាគច្រើនគាត់ធ្វើអីមួយ គាត់ចង់តែឈ្នះ។ សម្រាប់ខ្ញុំ ខ្ញុំយល់ឃើញថា ទោះបីមូលហេតុនៃការដោះលែងហ្នឹង ដោះលែងដោយសារមូលហេតុណាមួយក៏ដោយ ប៉ុន្តែការដោះលែងហ្នឹងវាជារឿងមួយដ៏ល្អសម្រាប់អ្នកដែលគាត់ជាប់ពន្ធធនាគារមកយូរហើយ ហើយគាត់អត់បានធ្វើសកម្មភាពនយោបាយ និងអត់មានសេរីភាព។ អីចឹងយើងជំនួសឲ្យការដែលជជែកគ្នា ឬមួយក៏យើងឈ្លោះគ្នារឿងដោះលែងដោយសារមូលហេតុអី យើងគួរតែលើកស្ទួយ ឬក៏គាំទ្រដល់ការដោះលែងហ្នឹង»។
យ៉ាងណាក៏ដោយ រហូតមកដល់ល្ងាចថ្ងៃសុក្រនេះ មិនទាន់មានរបាយការណ៍ណាមួយបញ្ជាក់ពីបញ្ជីឈ្មោះអ្នកជាប់ឃុំឃាំង ដែលនឹងត្រូវស្នើឲ្យមានការដោះលែងនៅឡើយទេ។ លោកហ៊ុន សែនបានបញ្ជាក់កាលពីថ្ងៃព្រហស្បតិ៍ថា សកម្មជន និងសមាជិកគណបក្សសង្គ្រោះជាតិទាំង១២រូបដែលលោកនឹងស្នើឲ្យមានការលើកលែងទោសនោះ បានសរសេរលិខិតសុំទោសលោករួចហើយ៕
