អ្នកប្រវត្តិសាស្ត្របានយល់ស្របគ្នាជារួមថា លោក Josef Stalin គឺជាជនផ្តាច់ការដែលបានសម្លាប់និងបំភិតបំភ័យមនុស្សរាប់លាននាក់ តាមរយៈរដ្ឋមួយដែលគ្រប់គ្រងដោយប៉ូលិសពោរពេញដោយការគាបសង្កត់។ ទោះជាយ៉ាងណាក៏ដោយ សម្រាប់ប្រជាពលរដ្ឋរុស្ស៊ី មានសញ្ញាខ្លះដែលបង្ហាញថា មនុស្សម្នាចាប់ផ្ដើមមើលឃើញលោក Stalinថាជា «មេដឹកនាំដ៏មានប្រសិទ្ធភាព» មួយរូប និងជានិមិត្តរូបនៃអំណាចរបស់សូវៀត-រុស្ស៊ី។
បើយោងតាមការស្ទង់មតិមួយធ្វើឡើងដោយទីភ្នាក់ងារស្ទង់មតិ VTsIOM ដែលទទួលបានការគាំទ្រពីរដ្ឋ និងដែលបានចេញផ្សាយលទ្ធផលកាលពីថ្ងៃទី ២០ ខែកក្កដាកន្លងទៅនេះបានបង្ហាញថា៖ «ពលរដ្ឋរុស្ស៊ីជាងពាក់កណ្ដាល ឬស្មើនឹង ៦២ ភាគរយ យល់ស្របជាមួយនឹងគំនិតដែលថា ផ្ទាំងរំឭកអំពីលោក Stalin រូបសំណាកមួយកំណាត់ខ្លួនរបស់លោក និងផ្ទាំងគំនូរនានាដែលនិយាយពីភាពជោគជ័យរបស់លោក Stalin គួរតែដាក់តាំងនៅទីសាធារណៈ។ ចំណែកឯពលរដ្ឋចំនួន ៦៥ ភាគរយមានគំនិតប្រឆាំងនឹងការបង្កើតនិមិត្តសញ្ញាណាដែលនិយាយអំពីភាពបរាជ័យ និងឧក្រិដ្ឋកម្មនានារបស់លោក Stalin»។
អ្នកចូលរួមក្នុងការស្ទង់មតិនេះដែលមានអាយុចាប់ពី ១៨ ដល់ ២៤ ឆ្នាំ ចំនួន ៧៧ ភាគរយ បានគាំទ្រឲ្យមានការសាងសង់ស្តូបរំឭកដល់លោក Stalin ហើយអ្នកដែលមានអាយុចាប់ពី ៦០ ឆ្នាំឡើងទៅចំនួន ៦៣ ភាគរយ ពេញចិត្តនឹងការសាងសង់ទីរំឭកដល់លោក Stalin បែបនេះ។
អ្នកចូលរួមក្នុងការស្ទង់មតិចំនួន ៤២ ភាគរយ បាននិយាយថា ពួកគេចង់ឃើញមានការដាក់និមិត្តសញ្ញានានាដើម្បីរំឭកដល់លោក Stalin នៅតាមអគារ apartment ក្បែរកន្លែងរស់នៅរបស់ពួកគេ។ ចំណែកឯអ្នកចូលរួមចំនួន ២១ ភាគរយទៀតនិយាយថាពួកគេយល់ឃើញផ្ទុយពីនោះ ហើយអ្នកចូលរួមចំនួន ៣៣ ភាគរយទៀត មិនមានយោបល់អំពីការដាក់និមិត្តសញ្ញាបែបនេះថាជារឿងវិជ្ជមាន ឬក៏អវិជ្ជមាននោះទេ។
ការស្ទង់មតិនេះត្រូវបានធ្វើឡើងកាលពីដើមខែកក្កដាកន្លងទៅនេះ។ លោក Lev Gudkov នាយកនៃមជ្ឈមណ្ឌល Levada ដែលជាទីភ្នាក់ងារស្ទង់មតិជាតិឯករាជ្យតែមួយគត់នៅរុស្ស៊ី បានប្រាប់ការិយាល័យ VOA ប្រចាំទីក្រុងមូស្គូថា ការគាំទ្រលើរបបផ្ដាច់ការកំពុងកើនឡើងនៅក្នុងចំណោមប្រជាពលរដ្ឋរុស្ស៊ី។
ការសម្ដែងឡើងរបស់រដ្ឋាភិបាលរុស្ស៊ីចំពោះលោក Stalin ត្រូវបានឆ្លុះបញ្ចាំងឲ្យឃើញតាមរយៈការឃោសនារបស់រដ្ឋរុស្ស៊ី និងមន្ត្រីសាធារណៈដែលគាំទ្ររដ្ឋាភិបាលរុស្ស៊ី។ លោក Mikhail Leontiev អ្នកនាំពាក្យក្រុមហ៊ុនប្រេងរបស់រដ្ឋរុស្ស៊ីឈ្មោះ Rosneft បានបញ្ចេញយោបល់លើលទ្ធផលនៃការស្ទង់មតិ ដោយលោកបានប្រាប់សារព័ត៌មាន Komsomolsakaya Pravda ថា៖ «ក្នុងក្រសែភ្នែករបស់ប្រជាពលរដ្ឋរុស្ស៊ី លោក Stalin តំណាងឲ្យអំណាចរបស់ប្រទេសរុស្ស៊ី។ ហើយទោះបីជាយើងចង់ ឬមិនចង់ នេះគឺជាការពិត។ មានតម្រូវការអំណាចនៅក្នុងប្រទេសនេះ ហើយតម្រូវការនេះត្រូវតែសម្រេចឲ្យបាន»។
លោក Stalin បានដឹកនាំប្រទេសរុស្ស៊ីតាំងពីពាក់កណ្ដាលទសវត្សរ៍ឆ្នាំ ១៩២០ រហូតដល់ពេលលោកទទួលមរណភាពនៅក្នុងឆ្នាំ ១៩៥៣។ ការកាន់កាប់អំណាចរបស់លោកត្រូវបានគេកត់សម្គាល់ឃើញថាបានធ្វើឡើងតាមវិធានការជ្រុលនិយមនានាដើម្បីកម្ទេចចោលអ្នកប្រឆាំង និងដើម្បីប្រមូលផ្ដុំអំណាច។
ប៉ុន្តែលោកក៏បានដឹកនាំប្រទេសរុស្ស៊ីឆ្លងកាត់សង្គ្រាមលោកលើកទី ២ ផងដែរ និងបានបង្កើតយុទ្ធសាស្ត្រដើម្បីគាំទ្រដល់គណបក្សនយោបាយនៅបរទេសដែលគាំទ្រសូវៀត ដោយបានបង្កើតសហភាពសូវៀតឲ្យក្លាយជាមហាអំណាចមួយ និងជាគួប្រកួតប្រជែងរបស់សហរដ្ឋអាមេរិក។ មានសញ្ញាបញ្ជាក់ថា មនុស្សកាន់តែច្រើននាពេលបច្ចុប្បន្ននេះ កំពុងផ្តោតលើចំណុចទាំងនេះដែលកើតមានក្នុងពេលលោកកាន់អំណាច។
អ្នកគាំទ្រក្មេងៗត្រូវបានពង្វក់គំនិតតាមរយៈការឃោសនា
ដោយវាយតម្លៃទៅលើការថ្លែងរបស់លោក Valery Fyodorov ដែលជាអ្នកដឹកនាំទីភ្នាក់ងារស្ទង់មតិ VTsIOM គេឃើញថា ទីភ្នាក់ងារ VTsIOM នេះមានភាពស្មោះស្ម័គ្រជាមួយនឹងប្រធានាធិបតីរុស្ស៊ីយ៉ាងពេញទំហឹង។ លោក Fyodorov បានប្រាប់ទូរទស្សន៍ឯករាជ្យ Dozhd របស់រុស្ស៊ីថា អ្នកដែលរិះគន់លោកប្រធានាធិបតី Vladimir Putin គឺជាមនុស្ស «ដែលមិនមានសេចក្តីស្រឡាញ់ចំពោះប្រទេសជាតិ និងជាអ្នកដែលគ្មានបំណងចង់ឲ្យប្រទេសជាតិមានភាពប្រសើរឡើងនោះទេ»។
ទោះបីជាអ្នកជំនាញនានាដែល VOA ប្រចាំទីក្រុងមូស្គូបានសម្ភាស បាននិយាយថា គ្មានហេតុផលណាមួយដែលត្រូវឆ្ងល់អំពីលទ្ធផលនៃការស្ទង់មតិដែលធ្វើឡើងដោយទីភ្នាក់ងារ VtsIOM នេះក៏ដោយ ក៏អ្នកជំនាញម្នាក់បានបញ្ជាក់ថា លទ្ធផលទាំងនេះមិនមែនមានន័យថាជាសញ្ញាបង្ហាញពីការគាំទ្រទៅលើថ្នាក់ដឹកនាំរុស្ស៊ីនាពេលបច្ចុប្បន្ននេះនោះទេ។
លោក Dmitry Oreshkin ដែលជាអ្នកវិភាគនយោបាយរុស្ស៊ីបានថ្លែងប្រាប់ VOA ថា ក្នុងចំណោមជនជាតិរុស្ស៊ីក្មេងៗដែលមានអាយុមិនលើសពី ២៥ ឆ្នាំ ពួកគេ "មានសមានចិត្តយ៉ាងជ្រាលជ្រៅចំពោះលោក Stalin" ។ សមានចិត្តបែបនេះតំណាងឲ្យ "ការធ្វើបដិវត្តន៍ផ្លូវចិត្ត" ដែលខុសពីស្ថានភាពជាក់ស្តែងនាពេលបច្ចុប្បន្ន។
លោក Dmitry Oreshkin បានថ្លែងថា៖ «ពួកគេមិនសប្បាយចិត្តចំពោះអ្វីដែលកំពុងកើតឡើងនៅពេលនេះនោះទេ ហើយពួកគេមិនទាន់ត្រៀមខ្លួនរួចរាល់ដើម្បីស្ដាប់អ្នកនយោបាយប្រកាន់ទស្សនៈសេរីនិយម ដូចជាលោក Grigory Yavlinsky នោះទេ ពីព្រោះនៅក្នុងគំនិតរបស់ពួកគេ ពួកគេនៅគិតដល់សេចក្ដីរន្ធត់តក់ស្លុតកាលពីសម័យទសវត្សរ៍ឆ្នាំ ១៩៩០ ដែលកើតឡើងដោយសារតែការឃោសនា។ ការឃោសនានេះធ្វើឲ្យមានការយល់ឃើញមួយថា សហភាពសូវៀតគឺជាមហាអំណាចដែលមនុស្សគ្រប់គ្នាត្រូវខ្លបខ្លាច និងគោរព នៅក្រោមការគ្រប់គ្រងរបស់លោក Stalin។ ស្របពេលជាមួយគ្នានេះដែរ ពួកគេថែមទាំងមិនអាចគិតស្រមៃឃើញទិដ្ឋភាពមួយដែលមានហាងលក់ដូរ ដែលមានតែធ្នើរទទេគ្មានឥវ៉ាន់លក់ ដូចដែលធ្លាប់មាននៅសម័យសហភាពសូវៀតអញ្ចឹងដែរ។ ពួកគេគឺមិនជឿថាមានស្ថានភាពដូចនោះទាល់តែសោះ។ ក្នុងគំនិតរបស់ពួកគេ លោក Stalinគឺជាជម្រើសមួយទៀតក្រៅពីអ្វីដែលកំពុងតែកើតមាននាពេលបច្ចុប្បន្ននេះ»។
លោក Dmitry Oreshkin បានបញ្ជាក់ថា មនោសញ្ចេតនាបែបនេះគឺជាលទ្ធផលកើតចេញផ្ទាល់ពីការឃោសនារបស់រដ្ឋរុស្ស៊ី និងពីប្រព័ន្ធនៃតម្លៃមួយដែលលោក Putin បានបណ្តុះដោយជោគជ័យនៅក្នុងផ្នត់គំនិតរបស់ប្រជាពលរដ្ឋរុស្ស៊ី ក្នុងរយៈពេល ១៥ ឆ្នាំកន្លងមកនេះ»។ ទោះយ៉ាងណាក៏ដោយ លោកបន្ថែមថា គំនិតដែលគិតទៅលើលោក Stalin បែបនេះ បង្កើតបានជា «ជម្រើសបែបស្រមើស្រមៃមួយ» ផ្ទុយពីស្ថានភាពជាក់ស្តែងបច្ចុប្បន្ន និងអាចមានគុណវិបត្តិដល់រដ្ឋាភិបាលរុស្ស៊ី។
លោក Dmitry Oreshkin បានលើកឡើងយ៉ាងដូច្នេះថា៖ «ពួកគេនិយាយដោយបើកចំហតាមអ៊ីនធឺណិតថា ប្រសិនបើលោក Stalin មិនបានបោះបង់ចោលតំបន់ Donbas នៅភាគខាងកើតប្រទេសអ៊ុយក្រែននោះទេ នោះប្រទេសអ៊ុយក្រែនក៏នឹងមិនត្រូវបានគេវាយដណ្ដើមយកនោះដែរ។ លោក Stalin ប្រហែលជានឹងធ្វើអ្វីដែលលោក Putin សម្រេចចិត្តមិនធ្វើ។ ដូច្នេះប្រជាពលរដ្ឋទាំងនេះកំពុងបង្កើតឲ្យមាននូវការប្រឆាំងមួយយ៉ាងពិតប្រាកដជាមួយនឹងលោក Putin»។
លោកបានបន្ថែថា៖ «មិនយូរមិនឆាប់ មន្ត្រីក្មេងៗដែលមានគំនិតដូចគ្នានឹងលេចមុខឡើង ហើយស្របពេលដែលសេដ្ឋកិច្ចធ្លាក់ចុះផងនោះ ពួកគេអាចចង់ធ្វើការផ្លាស់ប្ដូរអ្វីៗទាំងអស់ដោយប្រើកម្លាំង»។
ការទទួលយកដោយស្ងាត់ៗនូវចរន្តស្ដាលីននីយកម្មឡើងវិញ
លោក Vladimir Ryzhkov ដែលជាអ្នកនយោបាយប្រឆាំង និងជាអ្នកប្រវត្តិសាស្ត្រ បានយល់ស្របថា ការធ្វើយុទ្ធនាការដើម្បីលុបបំបាត់នូវឥទ្ធិពលរបស់លោក Stalin ត្រូវបានគេរៀបចំបង្កើតឡើងក្រោមការគ្រប់គ្រងរបស់លោក Vladimir Putin។
លោកបានថ្លែងយ៉ាងដូច្នេះថា៖ «ក្នុងអំឡុងពេលធ្វើកំណែទម្រង់ផ្ទៃក្នុងគណបក្សកុម្មុយនិស្តសហភាពសូវៀត ឬ perestroika និងក្នុងអំឡុងទសវត្សរ៍ឆ្នាំ ១៩៩០ ការសម្ដែងឡើងរបស់រដ្ឋាភិបាលចំពោះលោក Stalin មានភាពអវិជ្ជមានយ៉ាងច្បាស់ក្រឡែត។ លោក Mikhail Gorbachev គឺជាមនុស្សដំបូងដែលណែនាំឲ្យមានការថ្កោលទោសការបំភិតបំភ័យរបស់លោក Stalinតាម រយៈគណៈកម្មាធិការគោលនយោបាយរបស់គណបក្សកុម្មុយនិស្តសូវៀត ហើយលោកបានហៅលោក Stalin ថាជាឧក្រិដ្ឋជន។ ហើយលោក Boris Nikolaevich Yeltsin ដែលឪពុកម្ដាយរបស់លោកត្រូវបានចាប់ខ្លួនក្នុងរបបគ្រប់គ្រងរបស់លោក Stalin បានយល់ឃើញយ៉ាងច្បាស់ដែរថា លោក Stalin គឺជាឧក្រិដ្ឋជន។ ហើយនៅក្នុងឆ្នាំ ២០០០ ការទទួលយកគោលនយោបាយស្តាលីនឡើងវិញដោយស្ងាត់ៗបានចាប់ផ្ដើមបន្តិចម្ដងៗ ហើយក៏មានខ្សែភាពយន្តប្រវត្តិសាស្ត្រប្រឌិតកាន់តែច្រើនឡើងបានចាប់ផ្ដើមលេចឡើង ដែលក្នុងនោះរូបលោក Stalin និងមេប៉ូលិសសម្ងាត់ឈ្មោះ Lavrenty Beria ត្រូវបានគេតុបតែងដើម្បីកុំឲ្យមើលទៅដូចជាបិសាច»។
លោក Vladimir Ryzhkov បានកត់សម្គាល់ថា សៀវភៅប្រវត្តិសាស្ត្ររុស្ស៊ីដែលរដ្ឋាភិបាលអនុម័តដាក់ឲ្យប្រើប្រាស់កាលពីប៉ុន្មានឆ្នាំកន្លងទៅនេះ បានចាត់ទុកភាពសាហាវយង់ឃ្នងរបស់លោក Stalin កាលពីទសវត្សរ៍ឆ្នាំ ១៩៣០ ថាជា «ការរំលោភបំពានទៅលើគោលការណ៍ប្រជាធិបតេយ្យសង្គមនិយម»។
លោក Vladimir Ryzhkov បាននិយាយថា៖ «នេះជាផ្នែកមួយនៃគោលនយោបាយដ៏ល្អិតល្អន់របស់រដ្ឋាភិបាលក្នុងការបោសសម្អាតឧក្រិដ្ឋជន»។
ប៉ុន្តែផ្ទុយពីលោក Dmitry Oreshkin លោក Vladimir Ryzhkov ជឿថា ការស្តារឡើងវិញនូវឥទ្ធិពលរបស់លោក Stalin គឺមានប្រយោជន៍សម្រាប់រដ្ឋាភិបាលរុស្ស៊ីនាពេលបច្ចុប្បន្ននេះ។
លោក Vladimir Ryzhkov បាននិយាយថា៖ «គំរូរបស់លោក Stalin គឺដូចទៅនឹងជំរំយោធាមួយ ឬប្រទេសជាតិមួយដែលមានការប្រមូលផ្ដុំរួបរួមគ្នាដូច្នេះដែរ ដែលនៅក្នុងនោះ អាជ្ញាធរអាចរិះគន់អំពីភាពខ្វះចន្លោះនៃការគ្រប់គ្រងរបស់ពួកគេទៅលើបរិយាកាសបង្កហេតុខាងក្រៅបាន»។
លោក Vladimir Ryzhkov បាននិយាយបន្ថែមថា៖ «ចំពោះគំរូនេះ គេអាចចំណាយថវិកាលើអ្វីៗបានទាំងអស់ ដូចជាការធ្វើឲ្យបុគ្គលមួយចំនួនកាន់តែមានបានឡើងៗជាដើម។ ជាងនេះទៅទៀត គេអាចបន្ថែមខ្ទង់ចំណាយសម្រាប់វិស័យយោធាកាន់តែច្រើនទៀងផង ដោយចំណាយទៅឲ្យអ្នកណាដែលការពាររដ្ឋាភិបាល»៕
ប្រែសម្រួលដោយ នៀម ឆេង
