ក្រុមមន្ត្រីអ៊ុយក្រែននិយាយនៅថ្ងៃព្រហស្បតិ៍នេះថា កងកម្លាំងរុស្ស៊ី បានវាយប្រហារដោយគ្រាប់មីស៊ីលជាច្រើនគ្រាប់លើតំបន់ Odesa ភាគខាងត្បូងអ៊ុយក្រែនកាលពីយប់មិញ ដោយសម្លាប់មនុស្សយ៉ាងតិចណាស់ក៏ម្នាក់ដែរ។
អភិបាលតំបន់ Odesa លោក Oleh Kiper បាននិយាយថា ការវាយប្រហារនោះ បានធ្វើឱ្យខូចខាតអគារសន្តិសុខតូចមួយ ខូចឧបករណ៍មួយចំនួននៅស្ថានីយ៍ផ្ទុកទំនិញ និងខូចឡាន២គ្រឿង។
លោក Kiper បន្តទៀតថា ការវាយប្រហារនោះ មានគ្រាប់មីស៊ីលជាច្រើនគ្រាប់ ត្រូវបានបាញ់ចេញពីនាវាមុជទឹកមួយគ្រឿងក្នុងសមុទ្រខ្មៅ។
កងកម្លាំងការពារដែនអាកាសអ៊ុយក្រែននិយាយថា ខ្លួនបានបាញ់ទម្លាក់គ្រាប់មីស៊ីលមួយ ក្នុងចំណោមគ្រាប់មីស៊ីល២គ្រាប់ ដែលរុស្ស៊ីបានបាញ់សំដៅតំបន់ Odesa ស្របពេលដែលប្រព័ន្ធការពារដែនអាកាសអ៊ុយក្រែន ក៏បានបាញ់ទម្លាក់ដ្រូនចំនួន៨គ្រឿង ដែលរុស្ស៊ីបានប្រើប្រាស់កាលពីយប់ផងដែរ។
ប្រធានាធិបតីអ៊ុយក្រែនលោក Volodymyr Zelenskyy បាននិយាយលើបណ្តាញសង្គមថា លោកបានទៅពិនិត្យមើលទីក្រុង Dnipro ភាគអាគ្នេយ៍អ៊ុយក្រែន ដើម្បីជួបប្រជុំជាមួយក្រុមមេបញ្ជាការ និងពិភាក្សាពីបញ្ហាផ្តល់គ្រឿងផ្គត់ផ្គង់ និងពង្រឹងប្រព័ន្ធការពារដែនអាកាសផងដែរ។
ការទម្លាក់គ្រាប់បែករបស់រុស្ស៊ី បានធ្វើឱ្យប៉ះពាល់ធ្ងន់ធ្ងរលើតាំងវប្បធម៌នានារបស់អ៊ុយក្រែន ក៏ដូចជាការផ្គត់ផ្គង់គ្រាប់ធញ្ញជាតិ ដែលអ៊ុយក្រែនធ្លាប់នាំចេញទៅកាន់ប្រទេសក្រីក្រមួយចំនួនក្នុងពេលកន្លងទៅ។
ការខូចខាតធ្ងន់ធ្ងរដោយការវាយប្រហាររបស់រុស្ស៊ី ត្រូវបានលើកឡើងនៅក្នុងកិច្ចប្រជុំជាប់ៗគ្នា ស្តីពីប្រទេសអ៊ុយក្រែន ដែលមិនធ្លាប់មានពីមុនមក របស់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃពុធ កន្លងទៅ។
យោងទៅលើអង្គការ UNESCO បានឱ្យដឹងថា ចាប់តាំងពីសង្គ្រាមរុស្ស៊ីក្នុងប្រទេសអ៊ុយក្រែនកើតឡើងកាលពីខែកុម្ភៈ ឆ្នាំ២០២២មក ទីតាំងវប្បធម៌អ៊ុយក្រែនយ៉ាងតិចណាស់ក៏ចំនួន២៧៤កន្លែងដែរ បានទទួលរងការខូចខាត ដែលក្នុងនោះមាន១១៧កន្លែង ជាកន្លែងគោរពសាសនាផងដែរ៕
ព័ត៌មានមួយចំនួននៅក្នុងរបាយការណ៍នេះបានមកពីទីភ្នាក់ងារសារព័ត៌មានAP, AFP និងReuters ។
