មន្ត្រីអ៊ុយក្រែនម្នាក់បាននិយាយថា កងទ័ពរុស្ស៊ីបានរុលចូលដល់កណ្តាលទីក្រុង Sievierodonetsk ដែលស្ថិតនៅភាគខាងកើតអ៊ុយក្រែន ហើយកំពុងបន្តបាញ់ផ្លោងដាក់រោងចក្រគីមីមួយកន្លែងដែលជាជម្រករបស់កងទ័ពអ៊ុយក្រែននិងជនស៊ីវិលរាប់រយនាក់នៅទីនោះ។
អភិបាលតំបន់នេះ លោក Serhiy Haidai បាននិយាយនៅថ្ងៃចន្ទម្សិលមិញនៅលើ Telegramថា កងទ័ពរុស្ស៊ីកំពុងត្រួតត្រាទីក្រុងនោះប្រមាណ៧០ភាគរយ ហើយបានរុញច្រានកងកម្លាំងអ៊ុយក្រែនចេញពីកណ្តាលទីក្រុងនេះ។
លោកបានបន្ថែមទៀតថា រោងចក្រគីមី Azot របស់ទីក្រុងនេះជាកន្លែងដែលជនស៊ីវិលអ៊ុយក្រែនរាប់រយកំពុងជ្រកពួននៅទីនោះ ត្រូវបានកងទ័ពរុស្ស៊ីបាញ់ផ្លោងដាក់យ៉ាងខ្លាំង។
លោក Haidai និយាយទៀតថា ជនស៊ីវិលប្រមាណ៥០០នាក់កំពុងស្ថិតនៅក្នុងបរិវេណរោង ចក្រនោះហើយកងទ័ពអ៊ុយក្រែនកំពុងព្យាយាមយកពួកគេទៅកាន់កន្លែងសុវត្ថិភាព។
រុស្ស៊ីនិយាយថា ស្ពានទាំងអស់នៅក្នុងទីក្រុងនេះត្រូវបានបំផ្លាញ។ រីឯមន្រ្តីអ៊ុយក្រែនថា នៅមានផ្លូវមួយផ្សេងទៀតដែលអាចចេញពីទីក្រុងនេះបាន ក៏ប៉ុន្តែផ្លូវនេះមានការខូចខាតជាខ្លាំង។
ប្រធានាធិបតីអ៊ុយក្រែនលោក Volodymyr Zelenskyy បាននិយាយថា សមរភូមិប្រយុទ្ធនៅក្នុងតំបន់ Donbas នឹងត្រូវចារក្នុងប្រវត្តិសាស្ត្រយោធាថាជាសមរភូមិប្រយុទ្ធគ្នាដ៏ខ្លាំងបំផុតមួយនៅក្នុងតំបន់អឺរ៉ុប»។
លោក Zelenskyy បាននិយាយកាលពីយប់ថ្ងៃចន្ទថា៖ «សម្រាប់យើង ផលវិបាកនៅក្នុងសមរភូមិនេះមានសភាពធំធេងណាស់។ វាគួរឱ្យភ័យខ្លាច»។
លោកបានអំពាវនាវម្តងហើយម្តងទៀតឱ្យប្រទេសជាដៃគូផ្តល់កាំភ្លើងធំទំនើបៗមកឱ្យអ៊ុយក្រែនដើម្បីប្រើប្រាស់ប្រឆាំងនឹងកងទ័ពរុស្ស៊ី។
លោក Mykhailo Podolyak ដែលជាទីប្រឹក្សារបស់លោកប្រធានាធិបតី Zelenskyy បានបង្ហោះសារលើ Twitter កាលពីព្រឹកថ្ងៃចន្ទថា ដើម្បីបញ្ចប់សង្គ្រាមបាន អ៊ុយក្រែនត្រូវការអាវុធធន់ធ្ងន់។ លោកបានរាប់ឈ្មោះអាវុធធន់ធ្ងន់ទាំងនោះមានដូចជាកាំភ្លើងធំចំនួន ១.០០០ គ្រឿង ប្រព័ន្ធបាញ់រ៉ុក្កែតហ្វូងចម្រុះចំនួន៣០០គ្រឿង រថគ្រោះ៥០០គ្រឿង រថពាសដែកចំនួន២០០០គ្រឿងនិងយន្តហោះដ្រូនគ្មានមនុស្សបើកចំនួន១០០០គ្រឿង។
លោក Podolyakបាននិយាយថា៖ «កិច្ចប្រជុំនៃក្រុមទំនាក់ទំនងរដ្ឋមន្ត្រីការពារជាតិនឹងជួបប្រជុំគ្នានៅក្នុងទីក្រុងព្រុចសែល ប្រទេសប៊ែលហ្សិកនៅថ្ងៃទី១៥ ខែមិថុនានេះ។ អ៊ុយក្រែនកំពុងរង់ចាំនូវការសម្រេចរបស់ពួកគេ»។
រដ្ឋមន្ត្រីការពារជាតិអាមេរិក លោក Lloyd Austin កំពុងបើកកិច្ចប្រជុំមួយនៅទីស្នាក់ការធំរបស់អង្គការអូតង់ក្នុងទីក្រុងព្រុចសែល។ កិច្ចប្រជុំតាមអនឡាញកាលពីខែមុនមានតំណាងចូលរួមពី៤៧ប្រទេស ពីអង្គការអូតង់និងសហភាពអឺរ៉ុបផងដែរ៕
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារព័ត៌មាន Reuters ទីភ្នាក់ងារព័ត៌មាន AP និងទីភ្នាក់ងារព័ត៌មាន AFP។
