មន្ត្រីរុស្ស៊ីនិយាយនៅថ្ងៃព្រហស្បតិ៍នេះថាការវាយប្រហាររំលងអធ្រាត្រដោយកងកម្លាំងអ៊ុយក្រែនធ្វើឲ្យខូចស្ពានមួយភ្ជាប់ជ្រោយ Crimea ទៅតំបន់ Khersonនៅប៉ែកខាងត្បូងអ៊ុយក្រែន។
ប្រទេសរុស្ស៊ីបានកាន់កាប់តំបន់ Crimea តាំងពីភ្ជាប់តំបន់នេះចូលក្នុងទឹកដីរុស្ស៊ីនៅឆ្នាំ២០១៤។ សហគមន៍អន្តរជាតិភាគច្រើនបដិសេធទង្វើបែបនេះ។
ស្ពានដែលរងការខូចខាតស្ថិតនៅលើតាមផ្លូវមួយដែលប្រើប្រាស់ដោយកងកម្លាំងរុស្ស៊ី ដើម្បីចល័តចុះឡើងពីតំបន់ Crimeaទៅតំបន់ផ្សេងៗទៀតរបស់អ៊ុយក្រែនដែលស្ថិតក្រោមការគ្រប់គ្រងដោយរុស្ស៊ី។
កាលពីថ្ងៃពុធម្សិលមិញ សហភាពអឺរ៉ុប បានដាក់ទណ្ឌកម្មលើរុស្ស៊ីចំពោះសង្គ្រាមប្រឆាំងអ៊ុយក្រែន ដោយដៅប្រទេសនានាដែលមានក្រុមហ៊ុនប្រើប្រាស់ចន្លោះប្រហោងនៅក្នុងទណ្ឌកម្មមុនៗ ដើម្បីបន្តធ្វើពាណិជ្ជកម្មជាមួយរុស្ស៊ី និងគាំទ្រការឈ្លានពានរបស់ប្រធានាធិបតីរុស្ស៊ីលោក Vladimir Putin អស់១៦ខែមកហើយ។
សហភាពអឺរ៉ុបដែលមានសមាជិក២៧ប្រទេស បានដាក់ទណ្ឌកម្មជុំទី១០លើក្រុមហ៊ុននានារបស់រុស្ស៊ី ព្រមទាំងបង្កកទ្រព្យសម្បត្តិនិងហាមការធ្វើដំណើររបស់មន្ត្រីជាង១០០០នាក់។
ទណ្ឌកម្មថ្មីនេះ មានគោលបំណងកុំឲ្យទំនិញនិងសម្ភារៈសំខាន់ៗបម្រើដល់ការធ្វើសង្គ្រាម អាចទៅដល់រុស្ស៊ីកាត់តាមប្រទេសនានាដែលធ្វើពាណិជ្ជកម្មជាមួយសហភាពអឺរ៉ុប តែក៏ចង់រក្សាទំនាក់ទំនងពាណិជ្ជកម្មធម្មតាជាមួយរុស្ស៊ី។
ប្រធានគណៈកម្មការអឺរ៉ុប អ្នកស្រី Ursula von der Leyen ដែលជាប្រមុខខាងនីតិប្រតិបត្តិរបស់សហភាពអឺរ៉ុប និយាយថាទណ្ឌកម្មថ្មីនេះ នឹង«បន្ទុចបង្អាក់ថែមទៀតដល់ក្បាលម៉ាស៊ីនសង្គ្រាមរបស់លោក Putin ដោយមានការរឹតបន្តឹងការរឹតត្បិតលើការនាំចេញ សំដៅដល់ក្រុមហ៊ុនដែលគាំទ្ររបបក្រុងមូស្គូ»។
ព័ត៌មានខ្លះសម្រាប់រឿងនេះមានប្រភពពីទីភ្នាក់ងារសារព័ត៌មាន The Associated Press, Agence France-Presse និង Reuters.
រុស្ស៊ីនិយាយថាអ៊ុយក្រែន កម្ទេចស្ពានភ្ជាប់តំបន់ Crimea
