អគ្គលេខាធិការអង្គការអូតង់ (NATO) លោក Jens Stoltenberg បាននិយាយនៅថ្ងៃព្រហស្បតិ៍នេះ ថា សង្គ្រាមនៅអ៊ុយក្រែនបង្ហាញឱ្យឃើញអំពីតម្រូវការនៅក្នុងការឈរជាមួយនឹងអ៊ុយក្រែននិងបន្តផ្ដល់ការគាំទ្រដល់អ៊ុយក្រែន។
លោក Stoltenberg បានប្រាប់អ្នកយកព័ត៌មាន នៅពេលលោកបានធ្វើដំណើរទៅដល់ទីស្នាក់ការកណ្ដាលអង្គការអូតង់ថា បន្ទាប់ពីបានធ្វើការវាយបកទៅវិញ អ៊ុយក្រែនបានសម្រេចបានមួយចំនួននិងបានរំដោះដែនដីមួយចំនួនដែលកងទ័ពរុស្ស៊ីកាន់កាប់មកវិញក្នុងអំឡុងពេលប្រយុទ្ធគ្នាខ្លាំងក្លា។
លោក Stoltenberg បាននិយាយថា៖ «នេះគឺដោយសារភាពក្លៀវក្លា ភាពក្លាហាន និងជំនាញរបស់ទាហានអ៊ុយក្រែន ប៉ុន្តែវាក៏បានបង្ហាញផងដែរថា ការគាំទ្រដែលសម្ព័ន្ធមិត្តអូតង់បានផ្ដល់ជូនអ៊ុយក្រែនអស់រយៈពេលជាច្រើនខែកន្លងមក គឺពិតជាធ្វើឱ្យមានការប្រែប្រួលនៅសមរភូមិ»។
លោកបានបន្ថែមថា អ៊ុយក្រែនទទួលបានជោគជ័យប៉ុនណានៅក្នុងដំណាក់កាលនេះ អ៊ុយក្រែននឹងដាក់សម្ពាធប៉ុននោះលើប្រធានាធិបតីរុស្ស៊ីលោក Vladimir Putin ឱ្យចូលមកកាន់តុចរចា និងផ្ដល់ឱ្យអ៊ុយក្រែននូវឥទ្ធិពលមានប្រៀបនៅក្នុងការចរចាសន្តិភាព។
លោក Stoltenberg បាននិយាយថា ប្រសិនបើសម្ព័ន្ធមិត្តចង់ឱ្យមានសន្តិភាពឋិតថេរនៅក្នុងប្រទេសអ៊ុយក្រែន ពួកគេត្រូវតែបន្តផ្ដល់ការគាំទ្រផ្នែកយោធាដល់កងទ័ពអ៊ុយក្រែន។
នៅមុនការប្រជុំរបស់បណ្ដាមេដឹកនាំផ្នែកការពារជាតិនៃអង្គការអូតង់ ក្រុមទាក់ទងអ៊ុយក្រែនដែលដឹកនាំដោយសហរដ្ឋអាមេរិកបានរៀបចំការប្រជុំរបស់ខ្លួននៅថ្ងៃព្រហស្បតិ៍នេះក្នុងទីក្រុងព្រុចសែល ប្រទេសបែលហ្ស៊ិក ដើម្បីពិភាក្សាអំពីជំនួយយោធាសម្រាប់អ៊ុយក្រែន។
រដ្ឋមន្ត្រីការពារជាតិសហរដ្ឋអាមេរិកលោក Lloyd Austin បាននិយាយនៅពេលបើកការប្រជុំនេះថា ការប្រយុទ្ធគ្នានៅក្នុងប្រទេសអ៊ុយក្រែន «គឺទាមទារឱ្យមានការតស៊ូស្វិតស្វាញ មិនមែនបង្ខំឱ្យលឿននោះទេ»។
លោកបានលើកឡើងអំពីតម្រូវការនៅក្នុងការផ្ដល់ឱ្យកងទ័ពអ៊ុយក្រែននូវប្រព័ន្ធការពារដែនអាកាសដែលសំខាន់សម្រាប់ការពារជនស៊ីវិលអ៊ុយក្រែនពីការវាយប្រហារតាមអាកាសរបស់រុស្ស៊ី។
យោធាអ៊ុយក្រែនបានបញ្ជាក់នៅថ្ងៃព្រហស្បតិ៍នេះថា ខ្លួនបានបាញ់ទម្លាក់មីស៊ីលស្វ័យនាំផ្លូវមួយគ្រាប់របស់រុស្ស៊ីនិងដ្រូនបំផ្ទុះ ២០ គ្រឿងទៀតដែលរុស្ស៊ីបានបាញ់។
នៅក្នុងតំបន់ Crimea ដែលរុស្ស៊ីកាន់កាប់ មន្ត្រីរុស្ស៊ីបាននិយាយថា រុស្ស៊ីបានបាញ់ទម្លាក់ដ្រូន ៩ គ្រឿងរបស់អ៊ុយក្រែន៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP, AFP និង Reuters
