វិមានក្រឹមឡាំងបាននិយាយនៅថ្ងៃពុធនេះថា ការផ្តល់អាវុធមានវង់ប្រតិបត្តិការឆ្ងាយឱ្យអ៊ុយក្រែនដោយប្រទេសលោកខាងលិចនឹងមិនកែប្រែគោលដៅយោធារបស់រុស្ស៊ីក្នុងប្រទេសអ៊ុយក្រែន ឬកែប្រែការប្រយុទ្ធលើសមរភូមិទេ។
រដ្ឋាភិបាលក្រុងកៀវចាប់ផ្តើមសុំកងយន្តហោះប្រតិកម្មប្រយុទ្ធទំនើបនិងមីស៊ីលបាញ់បានឆ្ងាយពីប្រទេសគាំទ្រពួកគេខាងយោធាដើម្បីវាយប្រហារទីដៅជ្រៅជាងមុនក្នុងដែនដីគ្រប់គ្រងដោយរុស្ស៊ី។
អ្នកនាំពាក្យវិមានក្រឹមឡាំងលោក Dmitry Peskov បាននិយាយប្រាប់ក្រុមអ្នកកាសែតថា៖ «នេះជាចំណាត់ការដោយផ្ទាល់ដើម្បីបង្កើនភាពតានតឹងនិងកម្រិតនៃការប្រយុទ្ធគ្នា។ ការណ៍នេះតម្រូវឱ្យមានការប្រឹងប្រែងជាងមុនរបស់យើង។ តែវានឹងមិនកែប្រែព្រឹត្តិការណ៍ទេ»។
លោក Peskov បានឆ្លើយតបនឹងក្រុមអ្នកសារព័ត៌មានដែលបាននិយាយយោងដល់របាយការណ៍សារព័ត៌មាននានាដែលថា រដ្ឋាភិបាលក្រុងវ៉ាស៊ីនតោនគ្រោងនឹងផ្តល់ឱ្យអ៊ុយក្រែននូវមីស៊ីលមានវង់ប្រតិបត្តិការឆ្ងាយដែលអាចបាញ់បានចម្ងាយ១៥០គ.ម.។
រហូតមកដល់ពេលនេះ ពួកសម្ព័ន្ធមិត្តរបស់អ៊ុយក្រែនបានប្រកែកមិនព្រមផ្តល់អាវុធបែបនេះដោយសារមានកង្វល់ថា អាវុធទាំងនេះអាចត្រូវប្រើដើម្បីវាយប្រហារលើទីដៅនៅខាងក្នុងប្រទេសរុស្ស៊ី ដែលអាចនាំឱ្យសង្គ្រាមនេះធ្ងន់ធ្ងរជាងមុនថែមទៀត។
លោក Peskov ក៏បាននិយាយប្រាប់ក្រុមអ្នកកាសែតនៅថ្ងៃពុធនេះដែរថា វិមានក្រឹមឡាំងមិនបានពិចារណាអំពីផែនការស្តីពីការចរចារវាងប្រធានាធិបតីរុស្ស៊ីលោក Vladimir Putin និងប្រធានាធិបតីស.រ.អ.លោក Joe Biden ទេ។
លោក Biden បានមានប្រសាសន៍កាលពីថ្ងៃអង្គារថា លោកនឹងពិភាក្សាជាមួយប្រធានាធិបតីអ៊ុយក្រែនលោក Volodymyr Zelenskyy អំពីសំណើថ្មីៗបំផុតរបស់អ៊ុយក្រែនដើម្បីទទួលអាវុធទំនើបៗ។
ការអំពាវនាវសុំកងយន្តហោះប្រតិកម្មប្រយុទ្ធនិងមីស៊ីលបាញ់បានឆ្ងាយមានឡើងក្រោយពីប្រទេសលោកខាងលិចបានសម្រេចកាលពីសប្តាហ៍មុនថាផ្តល់ឱ្យកងកម្លាំងរដ្ឋាភិបាលក្រុងកៀវនូវកងរថក្រោះធុនធ្ងន់ ក្រោយពីមានការពិភាក្សាគ្នាយ៉ាងយូរមក៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP Reuters និង AFP។
