ប្រទេសអាល្លឺម៉ង់និងសម្ពន្ធមិត្តអឺរ៉ុបរបស់ខ្លួនមានផែនការនឹងបញ្ជូនរថក្រោះ Leopard 2 ប្រមាណ ៨០ គ្រឿង ទៅឱ្យប្រទេសអ៊ុយក្រែនក្នុងរយៈពេលប៉ុន្មានសប្តាហ៍ខាងមុខនេះ។ នេះបើតាមការឱ្យដឹងរបស់រដ្ឋាភិបាលក្រុងប៊ែរឡាំង ដែលបានប្រកាសពីការផ្លាស់ប្តូរនយោបាយរបស់ខ្លួនក្នុងសប្តាហ៍នេះ បន្ទាប់ពីមានសម្ពាធយ៉ាងខ្លាំងពីរដ្ឋាភិបាលអ៊ុយក្រែន និងដៃគូប្រទេសលោកខាងលិចរបស់ខ្លួនរួចមក។
រថគ្រោះ Leopard 2 ត្រូវបានគេចាត់ទុកថាជាប្រភេទរថក្រោះចម្បាំងដ៏មានថាមពលបំផុត ក្នុងពិភពលោក និងមានលក្ខណៈសមស្របយ៉ាងខ្លាំងទៅនឹងស្ថានភាពជម្លោះនៅក្នុងប្រទេសអ៊ុយក្រែននោះ។
ចក្រភពអង់គ្លេសនិងសហរដ្ឋអាមេរិកក៏កំពុងបញ្ជូនរថក្រោះប្រយុទ្ធរបស់ខ្លួនជាច្រើនគ្រឿងទៅឱ្យប្រទេសអ៊ុយក្រែនផងដែរ។ ការសម្រេចនេះបង្ហាញពីជំហានដ៏សំខាន់មួយទៀត នៅក្នុងការផ្គត់ផ្គង់សព្វាវុធរបស់បណ្តាប្រទេសលោកខាងលិចទៅឱ្យអ៊ុយក្រែន ហើយត្រូវបានអង្គការអូតង់មើលឃើញថា គឺជាពេលវេលាដ៏សំខាន់បំផុតមួយនៅក្នុងសង្គ្រាម ហើយការណ៍នេះក៏នឹងជំរុញបណ្តាប្រទេសលោកខាងលិចមួយចំនួនលូកដៃចូលកាន់តែជ្រៅថែមទៀតទៅក្នុងសង្គ្រាមនេះ។
អាល្លឺម៉ង់មិនត្រឹមតែបញ្ជូនរថក្រោះ ១៤ គ្រឿង ទៅឱ្យអ៊ុយក្រែនប៉ុណ្ណោះទេ ប៉ុន្តែថែមទាំងបានផ្តល់ការអនុញ្ញាតដល់សម្ពន្ធមិត្តរបស់ខ្លួនដទៃទៀត ឱ្យបញ្ជូនរថក្រោះ Leopard ដែលផលិតដោយប្រទេសអាល្លឺម៉ង់នេះ ទៅឱ្យអ៊ុយក្រែនផងដែរ។ រដ្ឋមន្ត្រីការពារជាតិអាល្លឺម៉ង់លោក Boris Pistorius និយាយថា អាល្លឺម៉ង់នឹងបញ្ជូនរថក្រោះទៅឱ្យអ៊ុយក្រែន នៅត្រឹមដំណាច់ខែមីនាខាងមុខនេះ។
ប្រទេសប៉ូឡូញ អេស្ប៉ាញ ន័រវេស និងប្រទេសហ្វាំងឡង់ និយាយថា ពួកគេក៏មានបំណងនឹងបញ្ជូនរថក្រោះ Leopard 2 ទៅឱ្យអ៊ុយក្រែនផងដែរ។ ទន្ទឹមនឹងនេះដែរ ប្រទេសកាណាដាក៏បានប្រកាសកាលពីថ្ងៃព្រហស្បតិ៍ម្សិលមិញថា ខ្លួននឹងបញ្ជូនរថក្រោះប្រភេទនេះ ៤ គ្រឿង ទៅឱ្យអ៊ុយក្រែនដែរ។
បន្ថែមលើនេះទៀត ប្រទេសអ៊ុយក្រែននឹងទទួលបានរថក្រោះ Challenger 2 របស់អង់គ្លេសចំនួន ១៤ គ្រឿង ក្នុងប៉ុន្មានសប្តាហ៍ឆាប់ៗខាងមុខនេះ ហើយសហរដ្ឋអាមេរិកក៏នឹងបញ្ជូនរថគ្រោះ Abrams របស់ខ្លួនចំនួន ៣១ គ្រឿង ទៅឱ្យអ៊ុយក្រែនផងដែរ នៅពេលខាងមុខ។
កងទ័ពអ៊ុយក្រែនត្រូវការពេលវេលាជាច្រើនសប្តាហ៍ដើម្បីហ្វឹកហាត់ប្រើប្រាស់រថក្រោះទាំងនេះ។ នេះបើតាមការបញ្ជាក់របស់លោក John Lough អ្នកស្រាវជ្រាវកម្មវិធីអឺរ៉ុបអាស៊ីនិងរុស្ស៊ីនៃវិទ្យាស្ថានគោលនយោបាយ Chatham House ដែលមានមូលដ្ឋានក្នុងក្រុងឡុងដ៍នៃចក្រភពអង់គ្លេស៕
