ក្រសួងការពារជាតិចក្រភពអង់គ្លេសបានបញ្ជាក់នៅថ្ងៃចន្ទនេះថា ចំនួនបេសកកម្មដែលធ្វើឡើងដោយយន្តហោះចម្បាំងកលយុទ្ធរុស្ស៊ីលើប្រទេសអ៊ុយក្រែន «បានថយចុះគួរឱ្យកត់សម្គាល់» ទៅចំនួនប្រហែល «រាប់សិបដងក្នុងមួយថ្ងៃ បើប្រៀបជាមួយនឹងចំនួនខ្ពស់រហូតដល់ ៣០០ ដងក្នុងមួយថ្ងៃ»។
នៅក្នុងការជូនដំណឹងថ្មីចុងក្រោយបង្អស់នៃព័ត៌មានស៊ើបការណ៍សម្ងាត់របស់ខ្លួនដែលបង្ហោះនៅលើបណ្តាញ Twitter ក្រសួងនេះបានលើកឡើងថា រុស្ស៊ីបានបាត់បង់យន្តហោះចម្បាំងចំនួនជាង ៦០ គ្រឿង។
ក្រសួងការពារជាតិចក្រភពអង់គ្លេសបានបញ្ជាក់ទៀតថា ការថយចុះនៃបេសកកម្មរបស់រុស្ស៊ីនេះ «ទំនងជាលទ្ធផលនៃការគំរាមកំហែងខ្លាំងក្លាជាបន្តពីកងការពារដែនអាកាសរបស់អ៊ុយក្រែន សមត្ថភាពមានកម្រិតនៃពេលវេលាហោះហើររបស់យន្តហោះរុស្ស៊ី និងធាតុអាកាសមិនល្អ»។
ប្រធានាធិបតីអ៊ុយក្រែនលោក Volodymyr Zelenskyy បានថ្លែងនៅក្នុងសុន្ទរកថាប្រចាំថ្ងៃរបស់លោកកាលពីថ្ងៃអាទិត្យថា ប្រទេសអ៊ុយក្រែនមានអ្វីមួយដែលរុស្ស៊ីមិនមាន ដែលនោះគឺ «យើងការពារមាតុភូមិរបស់យើង ហើយករណីនេះហើយដែលផ្ដល់ឱ្យយើងនូវការជំរុញទឹកចិត្តយ៉ាងខ្លាំងតាមដែលអាចធ្វើទៅបាន។ យើងប្រយុទ្ធដើម្បីសេរីភាព ហើយករណីនេះហើយដែលតែងតែធ្វើឱ្យកម្លាំងរបស់យើងកាន់តែកើនឡើង។ យើងការពារសច្ចភាព ហើយករណីនេះហើយដែលរួបរួមពិភពលោកទាំងមូលឱ្យគាំទ្រអ៊ុយក្រែន»។
លោក Zelenskyy ក៏បានជំរុញផងដែរឱ្យពលរដ្ឋអ៊ុយក្រែនជួយគ្នាទៅវិញទៅមក «ដើម្បីឆ្លងឱ្យផុតរដូវរងានេះ»។ លោកបាននិយាយថា៖ «សូមកុំសួរថាតើអ្នកអាចជួយបានឬក៏អត់និងតាមវិធីណា។ គឺអ្នកគ្រាន់តែជួយនៅពេលណាដែលអ្នកឃើញថាអាចធ្វើបាន»។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បាននិយាយកាលពីថ្ងៃអាទិត្យថា ផលវិបាកដែលរុស្ស៊ីទទួលបានពីទណ្ឌកម្មរបស់ក្រុមបស្ចិមប្រទេសគឺកើនឡើងជារៀងរាល់ថ្ងៃ ដោយធ្វើឱ្យរដ្ឋាភិបាលរុស្ស៊ីកាន់តែលំបាកនៅក្នុងការបំពេញសព្វាវុធរបស់ខ្លួនឱ្យដូចដើមវិញដើម្បីជំរុញទៅមុខនូវសង្គ្រាមជាបន្តរបស់ខ្លួនជាមួយនឹងអ៊ុយក្រែន៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន Reuters និងទីភ្នាក់ងារសារព័ត៌មាន AFP។
ចក្រភពអង់គ្លេសថា រុស្ស៊ីកាត់បន្ថយការវាយប្រហារតាមអាកាសលើអ៊ុយក្រែន
