លោក Sergey Lavrov រដ្ឋមន្រ្តីការបរទេសរុស្ស៊ីនិយាយថា រដ្ឋាភិបាលក្រុងម៉ូស្គូនឹងបណ្តេញអ្នកការទូតសហរដ្ឋអាមេរិកចំនួន៦០នាក់បន្ទាប់ពីរដ្ឋាភិបាលក្រុងវ៉ាស៊ីនតោនបានប្រកាសថា ខ្លួនបានបញ្ជាឲ្យបណ្តេញអ្នកការទូតរុស្ស៊ីរាប់សិបនាក់ដោយការដាក់ថ្នាំបំពុលអតីតចារបុរសរុស្ស៊ីម្នាក់នៅក្នុងចក្រភពអង់គ្លេស។
លោករដ្ឋមន្រ្តីការបរទេសរុស្ស៊ី Lavrov បាននិយាយកាលពីថ្ងៃព្រហស្បតិ៍ថា រុស្ស៊ីក៏នឹងបិទស្ថានកុងស៊ុលសហរដ្ឋអាមេរិកនៅក្នុងទីក្រុង Saint Petersburg ដែរ។
សហរដ្ឋអាមេរិករួមជាមួយប្រទេសជាង២០ទៀតបានបញ្ជាឲ្យបណ្តេញអ្នកការ ទូតរុស្ស៊ីបន្ទាប់ពីរដ្ឋាភិបាលក្រុងម៉ូស្គូបានទទួលរងការស្តីបន្ទោសចំពោះការប្រើប្រាស់សារធាតុធ្វើឲ្យខូចសរសៃប្រសាទលើលោក Sergei Skripal អតីតចារបុរសមុខ២ហើយនឹងកូស្រីរបស់លោកកាលពីដើមខែនេះនៅក្នុងទីក្រុង Salisbury ចក្រភពអង់គ្លេស។
រុស្ស៊ីបានបដិសេធថា ខ្លួនមិនទទួលខុសត្រូវចំពោះការវាយប្រហារដោយប្រើសារធាតុធ្វើឲ្យខូចសរសៃប្រសាទនោះទេហើយបានចោទប្រកាន់ថា ការដាក់ថ្នាំបំពុលនោះបានត្រូវធ្វើឡើងដោយទីភ្នាក់ងារស៊ើបការណ៍សម្ងាត់អង់គ្លេសដើម្បីធ្វើឲ្យប្រទេសរុស្ស៊ីមានកេរ្តិ៍ឈ្មោះអាក្រក់។ អង់គ្លេសបានច្រានចោលការចោទប្រកាន់នេះ។
ក្នុងការនិយាយទូរសព្ទនៅសប្តាហ៍នេះជាមួយប្រធានាធិបតីអាមេរិក ដូណាល់ ត្រាំលោកស្រីនាយករដ្ឋមន្រ្តី Theresa May នៃចក្រភពអង់គ្លេសបានសរសើរការឆ្លើយតបដ៏ខ្លាំងបំផុតដោយសហរដ្ឋអាមេរិកបន្ទាប់ពីការដាក់ថ្នាំបំពុលនេះ។
សេតវិមានបានប្រាប់ឲ្យដឹងថា មេដឹកនាំទាំង២បានព្រមព្រៀងគ្នាស្តីពីសារៈសំខាន់នៃការរំលាយបណ្តាញចារកម្មរបស់រុស្ស៊ីនៅក្នុងចក្រភពអង់គ្លេសនិងសហ រដ្ឋអាមេរិកដើម្បីទប់ស្កាត់សកម្មភាពលួចលាក់របស់រុស្ស៊ីហើយនឹងរារាំងការវាយប្រហារអាវុធគីមីនៅពេលខាងមុខនៅលើទឹកដីប្រទេសនេះ៕
