ប្រទេសរុស្ស៊ី ធ្វើជាម្ចាស់ផ្ទះរៀបចំការពិភាក្សានៅក្នុងរដ្ឋធានីមូស្គូនៅថ្ងៃពុធនេះ ដើម្បីស្វះស្វែងការពារឥទ្ធិពលរបស់ខ្លួននៅក្នុងតំបន់អាស៊ីកណ្តាល និងដើម្បីជំរុញឲ្យមានចំណាត់ការប្រឆាំងនឹងពួកអ្នកប្រយុទ្ធរដ្ឋអ៊ីស្លាមដែលរុស្ស៊ីនិយាយថា បានប្រមូលផ្តុំគ្នានៅក្នុងប្រទេសអាហ្វហ្គានីស្ថាន។ នេះ បើតាមសេចក្តីរាយការណ៍របស់ទីភ្នាក់ងារព័ត៌មាន AFP។
ការពិភាក្សាដែលមានការចូលរួមដោយមន្ត្រីមកពីប្រទេសចំនួន១០ ដែលរួមមានប្រទេសចិននិងប៉ាគីស្ថានផងដែរ ជាជំនួបអន្តរជាតិដ៏សំខាន់មួយចាប់តាំងពីក្រុមតាលីបង់បានក្តោបក្តាប់អំណាចកាលពីពាក់កណ្តាលខែសីហាមក។
កិច្ចប្រជុំអន្តរជាតិនេះ កើតមានឡើងបន្ទាប់ពីប្រធានាធិបតីរុស្ស៊ីលោក Vladimir Putin បានព្រមានកាលពីសប្តាហ៍មុនថា ក្រុមអ្នកប្រយុទ្ធរដ្ឋអ៊ីស្លាម បានប្រមូលផ្តុំគ្នានៅក្នុងប្រទេសអាហ្វហ្គានីស្ថាន ដើម្បីពង្រីកជម្លោះនៅក្នុងបណ្តាប្រទេសដែលធ្លាប់ស្ថិតនៅក្រោមអតីតសហភាពសូវៀតដែលនៅជាប់ប្រទេសរុស្ស៊ី។
រដ្ឋមន្ត្រីការបរទេសរុស្ស៊ីលោក Sergei Lavrov មានគម្រោងថ្លែងសុន្ទរកថាទៅកាន់ជំនួបនោះ។
គណៈប្រតិភូតាលីបង់ ដែលដឹកនាំដោយឧបនាយករដ្ឋមន្ត្រី Abdul Salam Hanafi ជាឥស្សរជនជាន់ខ្ពស់នៅក្នុងថ្នាក់ដឹកនាំថ្មីរបស់អាហ្វហ្គានីស្ថានដែលបានដឹកនាំការចរចាជាមួយសហភាពអឺរ៉ុប និងសហរដ្ឋអាមេរិកកាលពីសប្តាហ៍មុន។
ជំនួបទាំងនោះ កើតមានឡើងបន្ទាប់ពីការចរចានៅក្នុងទីក្រុងអង់ការ៉ានៃប្រទេសតួកគីរវាងក្រុមតាលីបង់ និងមន្ត្រីតួកគី។
សហភាពអឺរ៉ុប បានសន្យាផ្តល់ប្រាក់ចំនូន១ពាន់ ២០០លាន ដុល្លារដើម្បីបញ្ចៀសវិបត្តិមនុស្សធម៌ បន្ទាប់ពីការកាន់អំណាចរបស់ក្រុមជ្រុលនិយមតាលីបង់មក។
ក្រសួងការបរទេសរុស្ស៊ី បានបញ្ជាក់កាលពីថ្ងៃអង្គារថា គោលដៅនៃជំនួបក្នុងទីក្រុងមូស្គូនេះ គឺបង្កើនការខំប្រឹងប្រែងរបស់សហគមន៍អន្តរជាតិដើម្បីរារាំងវិបត្តិមនុស្សធម៌៕
