មីស៊ីលមួយគ្រាប់របស់រុស្ស៊ីបានបាញ់ចំទីក្រុង Odesa នៅភាគខាងត្បូងប្រទេសអ៊ុយក្រែននៅព្រឹកថ្ងៃពុធនេះ ដោយបានធ្វើឱ្យមនុស្សយ៉ាងតិច ៣ នាក់ស្លាប់និង ១៣ នាក់ទៀតរងរបួស។
យោធាអ៊ុយក្រែនបានបញ្ជាក់ថា មីស៊ីលស្វ័យនាំផ្លូវ Kalibr ៤ គ្រាប់ត្រូវបានរុស្ស៊ីប្រើនៅក្នុងការវាយប្រហារនេះ។
អាជ្ញាធរមូលដ្ឋានបាននិយាយថា មីស៊ីលមួយគ្រាប់បានបាញ់ចំឃ្លាំងមួយកន្លែងដោយបានសម្លាប់មនុស្ស ៣ នាក់ និងថាការវាយប្រហាររបស់រុស្ស៊ីនេះក៏បានធ្វើឱ្យខូចខាតផងដែរដល់ផ្ទះសម្បែងនិងហាងមួយចំនួននៅកណ្ដាលក្រុង Odesa។
មន្ត្រីនានាបានបញ្ជាក់ថា ក្រុមអ្នកជួយសង្គ្រោះបានរុករកក្រែងមានមនុស្សនៅកប់ក្រោមគំនរបាក់បែករបស់អគារ។ ទីភ្នាក់ងារមនុស្សធម៌អង្គការសហប្រជាជាតិបានថ្កោលទោសការវាយប្រហារនេះ។
អ្នកសម្របសម្រួលកិច្ចការមនុស្សធម៌របស់អង្គការសហប្រជាជាតិប្រចាំប្រទេសអ៊ុយក្រែនអ្នកស្រី Denise Brown បានបញ្ជាក់នៅក្នុងសេចក្ដីថ្លែងការណ៍មួយថា៖ «ជាថ្មីម្ដងទៀត មនុស្សនៅក្នុងទីក្រុង Odesa បានក្រោកពីដេកឃើញមនុស្សជាទីស្រឡាញ់របស់ខ្លួនត្រូវបានសម្លាប់ឬរងរបួសដោយសារការវាយប្រហារតាមអាកាសនេះ។ នេះមិនមែនជាករណីដាច់ដោយឡែកមួយនោះទេ។ ចាប់តាំងពីរុស្ស៊ីបានឈ្លានពានអ៊ុយក្រែនមក ការវាយប្រហារមិនរើសមុខនិងការប្រើគ្រាប់ផ្ទុះដែលមានផលប៉ះពាល់ទូលំទូលាយនៅក្នុងតំបន់ដែលមានប្រជាជនរស់នៅបានធ្វើឱ្យជនស៊ីវិលរាប់ពាន់នាក់ រួមទាំងកុមារផងដែរត្រូវបានសម្លាប់និងរងរបួស។ ករណីនេះត្រូវតែបញ្ឈប់»។
នៅក្នុងខេត្ត Donetsk នៅភាគខាងកើតប្រទេសអ៊ុយក្រែនឯណោះវិញ មន្ត្រីនានាបាននិយាយថា ការវាយប្រហារដោយមីស៊ីលបានសម្លាប់មនុស្សយ៉ាងតិច ៣ នាក់នៅក្នុងទីក្រុង Kramatorsk និងទីក្រុង Konstantinovka។
ការិយាល័យរដ្ឋអាជ្ញាអ៊ុយក្រែនបានបញ្ជាក់ថា ការបាញ់ផ្លោងនៅថ្ងៃពុធនេះនៅក្នុងតំបន់ Sumy នៅភាគឦសានប្រទេសអ៊ុយក្រែនបានប៉ះចំរថយន្តមួយគ្រឿងនៅជិតព្រំដែនប្រទេសរុស្ស៊ី ដោយបានសម្លាប់មនុស្ស ៦ នាក់៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP, AFP និងReuters។
