គណបក្សប្រជាជនកម្ពុជា ដែលជាគណបក្សគ្រប់គ្រងប្រទេស បានប្តឹងទៅគណៈកម្មាធិការជាតិរៀបចំការបោះឆ្នោត (គ.ជ.ប.) ឲ្យចាត់វិធានការចំពោះលោក ជូង ជូងី ចំពោះសកម្មភាពរបស់លោកតាមបណ្តាញសង្គមហ្វេសប៊ុក ក្នុងការរារាំងមិនឲ្យពលរដ្ឋទៅបោះឆ្នោត។ នេះបើតាមការបញ្ជាក់របស់អ្នកនាំពាក្យគណបក្សកាន់អំណាច និងសេចក្តីប្រកាសរបស់គ.ជ.ប.។
បណ្តឹងរបស់គណបក្សប្រជាជនកម្ពុជាប្រឆាំងនឹងលោកមេធាវី ជូង ជូងី ដែលគេដឹងថា ជាអ្នកការពារក្តីដល់មេដឹកនាំនយោបាយ និងសកម្មជនគណបក្សប្រឆាំងនោះ បានធ្វើឡើង បន្ទាប់ពីលោកបានថ្លែងលើទំព័រហ្វេសប៊ុករបស់លោក ដោយលើកឡើងថា អ្នកដែលមិនបានបោះឆ្នោតនោះគឺមិនមានទោសនោះទេ ហើយការអំពាវនាវរបស់គណបក្សប្រឆាំងពីខាងក្រៅប្រទេសមិនឲ្យពលរដ្ឋទៅបោះឆ្នោតនោះ ក៏មិនមានការខុសទាស់អីនោះដែរ។
សេចក្តីប្រកាសរបស់គណៈកម្មាធិការជាតិរៀបចំការបោះឆ្នោត ចុះថ្ងៃទី២៤ ខែកក្ដដា បានលើកឡើងអំពីបរិយាកាសនៃការឃោសនាបោះឆ្នោតថា បានប្រព្រឹត្តទៅដោយរលូន គ្មានអំពើហិង្សា នៅក្របខ័ណ្ឌទូទាំងប្រទេស។
សេចក្តីប្រកាសក៏បានបញ្ជាក់ថា៖
«មានករណីមួយដោយឡែកគឺគណបក្សប្រជាជនកម្ពុជាស្នើសុំគ.ជ.ប. ចាត់វិធានការចំពោះលោកជូង ជូងី ដែលបានប្រើប្រាស់មធ្យោបាយតាមបណ្តាញទំនាក់ទំនងសង្គម (Facebook) ប្រព្រឹត្តអំពើទុច្ចរិត បំពានច្បាប់ ក្នុងគោលបំណងរារាំងប្រជាពលរដ្ឋដែលមានសិទ្ធិបោះឆ្នោត មិនឲ្យទៅបោះឆ្នោត»។
VOA មិនអាចទាក់ទងអ្នកនាំពាក្យគ.ជ.ប. ដើម្បីសុំសេចក្តីអធិប្បាយបន្ថែមលើចំណាត់ការរបស់គ.ជ.ប.បាននោះទេ។
លោក សុខ ឥសាន អ្នកនាំពាក្យគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន បានប្រាប់ VOA នៅថ្ងៃពុធនេះថា ប្រជាពលរដ្ឋមានសិទ្ធិទៅ ឬមិនទៅបោះឆ្នោត ហើយបើមានអ្នកដែលរារាំងពលរដ្ឋមិនឲ្យទៅបោះឆ្នោតនោះ នោះគ.ជ.ប.នឹងត្រូវចាត់វិធានការ។
លោកមានប្រសាសន៍បន្ថែមថា លោក ជូង ជូងី បានបំពានបម្រាមរបស់តុលាការកំពូលដែលបានហាមមិនឲ្យមន្ត្រីគណបក្សប្រឆាំងចំនួន១១៨នាក់ធ្វើនយោបាយ។ លោកបានបញ្ជាក់ថា លោកជូង ជូងីមានឈ្មោះនៅក្នុងបញ្ជីមន្ត្រីទាំង១១៨នាក់នោះ។
«ខ្ញុំយល់ថា លោកជូង ជូងីនេះក៏មានឈ្មោះមួយនៅក្នុងចំណោម១១៨នាក់ ដែលហាមឃាត់ដោយតុលាការកំពូល មិនឲ្យធ្វើសកម្មភាពនយោបាយ។ ឥឡូវនេះ បើសិនណាជាគាត់និយាយអីចឹងបានសេចក្តីថា គាត់នៅតែធ្វើនយោបាយ បំពានលើបម្រាមសាលដីកាស្ថាពររបស់តុលាការកំពូល។ អាហ្នឹងក៏នៅតែជាប់ ពិរុទ្ធភាពផ្លូវច្បាប់ដែលត្រូវប្រឈមមុខតុលាការហើយ បាទ»។
VOA មិនទាន់អាចសុំការអធិប្បាយពីលោកជូង ជូងី បានភ្លាមៗនៅឡើយទេ នៅថ្ងៃពុធនេះ។ ប៉ុន្តែការអធិប្បាយ និងការបង្ហោះវីដេអូឃ្លីបនៅលើទំព័រហ្វេសប៊ុករបស់លោកជូង ជូងី បានឲ្យដឹងថា មេធាវីរូបនេះបានពន្យល់ថា ការមិនទៅបោះឆ្នោតមិនអាចទទួលបានការដាក់ទោសនោះឡើយ ហើយថាសកម្មភាពអំពាវនាវរបស់អ្នកគាំទ្រគណបក្សប្រឆាំងពីក្រៅស្រុក មិនឲ្យពលរដ្ឋទៅបោះឆ្នោតនោះ ក៏មិនអាចទទួលរងការដាក់ទោសនោះដែរ។ លោកត្រូវបានគេឃើញថ្លែងក្នុងវីដេអូឃ្លីបមានរយៈពេលជាង១០នាទី បង្ហោះនៅថ្ងៃទី១៧ ខែកក្កដាក្នុងទំព័រហ្វេសប៊ុកថា៖
«អ្នកខ្លះដែលគាំទ្រគណបក្សប្រឆាំង គាត់នៅក្រៅប្រទេស គាត់ស្រែកមកថា កុំឲ្យទៅបោះឆ្នោត។ អាហ្នឹងម៉េចហៅថា រារាំង? អាហ្នឹងគេហៅថា បញ្ចុះបញ្ចូលកុំឲ្យទៅបោះឆ្នោត។ អាហ្នឹងមិនមែនរារាំងទេ ពីព្រោះអ្នកដែលនៅក្នុងស្រុក គាត់ចង់ទៅបោះឆ្នោត ទៅបានតើ? ហើយអ្នកដែលនៅក្រៅស្រុក គាត់មានអាចមក ចាប់ចងជើង ចងដៃមិនឲ្យបោះឆ្នោតបានណា? អីចឹង បើបងប្អូនចង់ទៅបោះឆ្នោត តើអ្នកនៅក្រៅប្រទេសរារាំងបងប្អូនរបៀបម៉េចបាន? អីចឹង យើងកុំយកអាពាក្យបញ្ចុះបញ្ចូលហ្នឹងមកបន្លំថា រារាំង។ អានេះគឺជាគំនិតទុច្ចរិត ឬមួយជាអំពើទុច្ចរិតរបស់បុគ្គលពាលមួយចំនួន»។
អត្ថបទរបស់អង្គភាពព័ត៌មាន Freshnews ដែលស្និទ្ធនឹងរដ្ឋាភិបាលបានឲ្យដឹងថា លិខិតរបស់គណបក្សប្រជាជនកម្ពុជានោះស្នើសុំឲ្យគ.ជ.ប.ចាត់វិធានការចំពោះលោកជូង ជូងី។
លិខិតស្នើសុំនោះត្រូវបានអង្គភាពព័ត៌មាននេះដកស្រង់ខ្លឹមសារតាមន័យដើមថា៖
«កាលពីថ្ងៃទី១៧ ខែកក្កដា ឆ្នាំ២០១៨ និងបន្ដរហូតមកដល់បច្ចុប្បន្ននេះ ឈ្មោះ ជូង ជូងី ដែលមានអាស័យដ្ឋានស្នាក់នៅផ្ទះលេខ១២បេ ផ្លូវ១៩៧ សង្កាត់ទំបន់ទឹក ខណ្ឌចំការមន រាជធានីភ្នំពេញ បាននិងកំពុងធ្វើសកម្មភាពផ្សព្វផ្សាយ តាមបណ្ដាញសង្គម Facebook របស់ខ្លួន ប្រព្រឹត្តអំពើទុច្ចរិត រំលោភបំពានលើបញ្ញត្តិមាត្រា១៤២នៃច្បាប់ស្ដីពីការបោះឆ្នោតជ្រើសតាំងតំណាងរាស្ដ្រ។ សកម្មភាពរបស់ឈ្មោះជូង ជូងីនេះគឺពិតជាមានចេតនា និងគោលបំណងច្បាស់លាស់ ក្នុងការបំផុសគំនិតទប់ស្កាត់ និងរារាំងប្រជាពលរដ្ឋ ដែលមានសិទ្ធិបោះឆ្នោត មិនឲ្យទៅបោះឆ្នោត ដែលនឹងប្រព្រឹត្តទៅនាថ្ងៃទី២៩ ខែកក្កដា ឆ្នាំ២០១៨ខាងមុខនេះ»។
ប្រទេសកម្ពុជាគ្រោងនឹងធ្វើការបោះឆ្នោតជាតិនៅថ្ងៃអាទិត្យ ទី២៩ ខែកក្កដា ឆ្នាំ២០១៨ ដោយមានគណបក្សកាន់អំណាច និងគណបក្សនយោបាយចំនួន១៩ផ្សេងទៀតចូលរួម តែមិនមានវត្តមានរបស់គណបក្សសង្គ្រោះជាតិ ដែលត្រូវបានរំលាយចោលកាលពីឆ្នាំមុន ក្នុងសំណុំរឿងក្បត់ជាតិ។ អវត្តមានរបស់គណបក្សប្រឆាំងដ៏សំខាន់នេះបានបង្កការរិះគន់ជាច្រើនពីក្រុមអង្គការសិទ្ធិមនុស្សអន្តរជាតិ អំពីភាពស្របច្បាប់នៃការបោះឆ្នោតនាពេលខាងមុខនេះ៕
