ក្រោយការបោះឆ្នោតថ្នាក់ជាតិអាណត្តិទី ៧ កាលពីថ្ងៃអាទិត្យ បានបញ្ចប់ទៅ គណបក្សរាជានិយមចាស់វស្សាមួយ គឺគណបក្សហ្វ៊ុនស៊ិនប៉ិច អះអាងថា ខ្លួនទទួលបានអាសនៈតំណាងរាស្ត្រប្រមាណ ៥ អាសនៈ ក្នុងចំណោម ១២៥ អាសនៈនៅរដ្ឋសភាជាតិ។ នេះបើតាមលទ្ធផលបោះឆ្នោតក្រៅផ្លូវការ។
រីឯគណបក្សប្រជាជនកម្ពុជា ដែលកំពុងដឹកនាំរដ្ឋាភិបាលបច្ចុប្បន្ន បានឈ្នះអាសនៈនៅសល់ចំនួន ១២០ ដែលជាចំនួនភាគច្រើន ក្នុងការបោះឆ្នោតដែលអវត្តមានគណបក្សជំទាស់ដ៏ធំ គឺគណបក្សភ្លើងទៀន បន្ទាប់ពីគណបក្សនេះត្រូវបានបដិសេធចុះឈ្មោះចូលរួមប្រកួត។
អាសនៈទាំង៥ ដែលគណបក្សហ៊្វុនស៊ិនប៉ិចឈ្នះបាន រួមមានមណ្ឌលភ្នំពេញ ១អាសនៈ ដែលព្រះអង្គម្ចាស់ នរោត្តម ចក្រាវុធ ជាព្រះប្រធានគណបក្សហ៊្វុនស៊ិនប៉ិច និងជាបុត្រារបស់ព្រះអង្គម្ចាស់ក្រុមព្រះ ឈរជាតំណាងរាស្ត្រលេខរៀងទី ១ មណ្ឌលខេត្តកំពង់ចាម ១អាសនៈ ខេត្តកំពង់ធំ ១អាសនៈ ខេត្តកណ្តាល ១អាសនៈ និងមណ្ឌលខេត្តព្រៃវែង ១អាសនៈ។ នេះបើតាម លោក ញឿន រ៉ាដែន អ្នកនាំពាក្យរបស់គណបក្សហ្វ៊ុនស៊ិនប៉ិច។
លោកបានប្រាប់វីអូអេនៅថ្ងៃចន្ទនេះថា តួលេខនៃលទ្ធផលដែលគណបក្សទទួលបាន៥ អាសនៈនេះ គឺជាតួលេខដែលគណបក្សផ្ទៀងផ្ទាត់ជាមួយតួលេខរបស់គណៈកម្មាធិការជាតិរៀបចំការបោះឆ្នោត។ លោកបន្តថា គណបក្សនឹងចាំមើលលទ្ធផលផ្លូវការបន្តទៀត។
បើតាមអ្នកនាំពាក្យរូបនេះ គណបក្សទទួលបានសំឡេងគាំទ្រនេះ ដោយសារតែប្រជាប្រិយភាព និង «បារមី» របស់ព្រះអង្គនរោត្តមចក្រាវុធ ដែលជាព្រះប្រធានបក្ស។ លោក ញឿន រ៉ាដែន បានអរគុណម្ចាស់ឆ្នោតដែលបោះឆ្នោតគាំទ្រគណបក្សលោកផងដែរ។
លោកថ្លែងថា៖ «បាទជាការពិតណាស់! ព្រះអង្គជាបញ្ញវន្ត ហើយជាញាតិវង្សមួយដែលលេចធ្លោអាចជួយប្រជារាស្ត្របាន ហើយជាពិសេសអនាគត លោកអាចធ្វើយ៉ាងណា ជួយប្រទេសជាតិយើង។ តាមរយៈគណបក្សហ្វ៊ុនស៊ិនប៉ិចនេះ គឺអាចធ្វើយ៉ាងណាឱ្យប្រជារាស្ត្រយើងមានជីវភាពថ្លែថ្នូរ ដូចអ្វីដែលគោលនយោបាយរបស់យើងបានដាក់ចេញ។ បូករួមគោលនយោបាយ និងប្រជាប្រិយភាពរបស់ព្រះអង្គ ធ្វើឱ្យគណបក្សរាជានិយមហ្វ៊ុនស៊ិនប៉ិចទទួលបានការគាំទ្រ ជាពិសេសសន្ទុះនៃសំឡេង ទោះបីជាខេត្តមួយចំនួនមិនទាន់ទទួលបាន ប៉ុន្តែមានការកើនឡើងប្លែកខុសពីអាណត្តិកន្លងទៅ»។
លោក ញឿន រ៉ាដែន លើកឡើងថា ដំណើរការបោះឆ្នោតនេះមានបញ្ហាតិចតួច ប៉ុន្តែមិនមែនជាបញ្ហាធំដុំ ដែលគណបក្សមិនអាចទទួលយកបាននោះទេ។
លោកបន្តថា៖ «ក្នុងនាមខ្ញុំជាតំណាងគណបក្ស យើងអត់មានបញ្ហាអ្វីទេ។ ទោះបីជាបញ្ហាតិចតួចវាបានកើតឡើង ត្រូវបានដោះស្រាយ ដូចអត់មានអីធ្ងន់ធ្ងរទេ»។
ចំណែកអ្នកនាំពាក្យគណបក្សប្រជាជនកម្ពុជា លោក សុខ ឥសាន ក៏បានអះអាងថា គណបក្សកាន់អំណាចបានឈ្នះការបោះឆ្នោតនេះដោយភ្លូកទឹកភ្លូកដី។
លោកប្រាប់វីអូអេកាលពីថ្ងៃអាទិត្យថា៖ «ក្នុង ៨៤,៥៨%នេះ គឺគណបក្សប្រជាជនបានពី ៧៨% ទៅ ៨០%។ អ៊ីចឹងវាអាចមានគណបក្សខ្លះ បានមួយឬពីរ[អាសនៈ]»។
លោក សុខ ឥសាន ចាត់ទុកការបោះឆ្នោតកាលពីថ្ងៃអាទិត្យថាដំណើរការទៅដោយគោរពទៅតាមឆន្ទៈរបស់ប្រជាពលរដ្ឋ។
លោកបន្តថា៖ «ហើយការបោះឆ្នោតនេះ ជាការបោះឆ្នោតសម្តែងឆន្ទៈរបស់ប្រជាពលរដ្ឋ ដែលចង់បានសន្តិភាព ចង់បានការអភិវឌ្ឍរបស់ប្រទេសជាតិ»។
ដោយឡែក ស្ថាប័នជាតិរៀបចំការបោះឆ្នោតបានធ្វើសន្និសីទសារព័ត៌មានមួយ បន្ទាប់ពីបិទបញ្ចប់ការបោះឆ្នោតកាលពីថ្ងៃអាទិត្យ ដោយគេឃើញមន្ត្រីរបស់គណបក្សហ្វ៊ុនស៊ិនប៉ិចម្នាក់ គឺលោក វ៉ាន់ នីសា បានសំណូមពរទៅកាន់ស្ថាប័ន គ.ជ.ប មិនឱ្យផ្តល់សិទ្ធិទៅកាន់សហភាពសហព័ន្ធយុវជនកម្ពុជា ហៅកាត់ថា ស.ស.យ.ក ដែលដឹកនាំដោយលោក ហ៊ុន ម៉ានី កូនប្រុសរបស់លោកនាយករដ្ឋមន្ត្រីហ៊ុន សែន ព្រោះបង្ហាញរូបភាពលម្អៀង។ ស្ថាប័នមួយនេះបានដាក់អ្នកសង្កេតការណ៍ច្រើនជាងគេ គឺរហូតទៅដល់ ៣៦.០០០នាក់។
លោកថ្លែងថា៖ «ខ្ញុំសូមខាង គ.ជ.ប ជួយសម្រួល ពាក់ព័ន្ធជាមួយ[ការ] កុំផ្តល់សិទ្ធិទៅដល់ខាង ស.ស.យ.ក ដើម្បីមានភាពងាយស្រួលក្នុងការឱ្យអ្នកសង្កេតការណ៍ពីគណបក្សនយោបាយគាត់បានចូលរួមក្នុងការសង្កេតការណ៍ ពីព្រោះអ្វីដែលខ្ញុំឃើញ គាត់មិនមែនឈរនៅកណ្តាល គឺគាត់ឈរលម្អៀងទៅខាងគណបក្សប្រជាជនកម្ពុជា»។
ប៉ុន្តែភ្លាមៗនោះ មន្ត្រីគណបក្សប្រជាជនកម្ពុជា លោក ចាន់ សុខសាន ចេញមុខច្រានចោលចំពោះការលើកឡើងរបស់លោក វ៉ាន់ នីសា។ លោកថា គណបក្សប្រជាជនកម្ពុជាមិនអាចទទួលយកបានឡើយ ចំពោះការលើកឡើងបែបនេះ។
លោកថ្លែងថា៖ «ខ្ញុំយល់ថា នេះគ្រាន់តែការយល់ឃើញ និងវាយតម្លៃសម្រាប់ខ្លួនគាត់ទេ។ រឿងការបំពេញកាតព្វកិច្ច ការចូលរួមសង្កេតការណ៍បោះឆ្នោត ការយល់ឃើញយ៉ាងម៉េចរបស់អង្គការសង្គមស៊ីវិល អាហ្នឹងជារឿងរបស់គាត់។ ប៉ុន្តែបើជាការវាយតម្លៃដែលគ្មានអំណះអំណាង ឬភស្តុតាងណាមួយ សម្រាប់គណបក្សប្រជាជនគឺមិនអាចទទួលយកបាន»។
ក្នុងសន្និសីទសារព័ត៌មានដដែលនោះ លោក ទេព នីថា អគ្គលេខាធិការ គ.ជ.ប បញ្ជាក់ថា អ្នកសង្កេតការណ៍ គឺជាអង្គការមិនមែនរដ្ឋាភិបាល ដែលបានចុះបញ្ជីនៅក្រសួងមហាផ្ទៃ ដូច្នេះ គ.ជ.ប មិនមានសិទ្ធិហាមមិនឱ្យចូលរួមសង្កេតការណ៍នោះទេ។
លោកថ្លែងថា៖ «គឺយើងអនុញ្ញាតឱ្យអង្គការដែលចុះបញ្ជីត្រឹមត្រូវទៅតាមច្បាប់ នៅក្រសួងមហាផ្ទៃ ដើម្បីសង្កេតមើលការបោះឆ្នោត។ អ៊ីចឹងយើងគ្រាន់តែអនុវត្តតាមច្បាប់ ហើយអង្គការដែលដាក់មកយើងពិនិត្យមើលមានឈ្មោះត្រឹមត្រូវ មានឯកសារត្រឹមត្រូវ គឺយើងយល់ព្រម។ ហើយ គ.ជ.ប ក៏គ្មានសិទ្ធិបដិសេធអ្នកណាដែលគេអនុវត្តស្របច្បាប់ដែរ»។
ចំណែកសន្លឹកឆ្នោតមិនបានការនៃការបោះឆ្នោតនេះ មានជាង ៤០ ម៉ឺនសន្លឹកឬប្រមាណ ៥% នៃសន្លឹកឆ្នោតសរុប ដែលសន្លឹកឆ្នោតមិនបានការនេះ មានចំនួនតិចជាងការបោះឆ្នោតជាតិអាណត្តិទី ៦ ដែលមានប្រមាណ ៩%។ នេះបើតាមលទ្ធផលក្រៅផ្លូវការ។ ប្រជាពលរដ្ឋដែលបានចេញទៅបោះឆ្នោតកាលពីថ្ងៃអាទិត្យ មានចំនួនជាង ៨លាន ២សែននាក់ ស្មើ ៨៤,៥៨% នៃចំនួនពលរដ្ឋដែលមានឈ្មោះក្នុងបញ្ជីបោះឆ្នោត។
ថ្លែងក្នុងសន្និសីទសារព័ត៌មាននោះ លោក ប្រាជ្ញ ចន្ទ ប្រធាន គ.ជ.ប គូសបញ្ជាក់ ការប្រកាសលទ្ធផលផ្លូវការនៃការបោះឆ្នោតជ្រើសតាំងតំណាងរាស្ត្រនីតិកាលទី ៧ នេះ នឹងធ្វើឡើងចន្លោះថ្ងៃទី ៩ ខែសីហា ដល់ថ្ងៃទី ៤ ខែកញ្ញា ឆ្នាំ២០២៣៕
