កាលពីថ្ងៃទី ៣១ ខែកក្កដា ឆ្នាំ ២០២០ កម្លាំងប្រដាប់អាវុធប្រមាណជា ៥០ នាក់ បានឡោមព័ទ្ធផ្ទះរបស់លោក រ៉ុង ឈុន មេដឹកនាំសហជីពកម្ពុជាចាស់វស្សាមួយរូបនៅក្នុងរាជធានីភ្នំពេញ ដោយបានចូលទៅចាប់ខ្លួនលោក រ៉ុង ឈុន នៅក្នុងផ្ទះរបស់លោក។
បទល្មើសដែលត្រូវបានយកទៅចោទលើលោក រ៉ុង ឈុន គឺបទញុះញង់ឲ្យប្រព្រឹត្តបទឧក្រិដ្ឋ ឬរំខានដល់សន្តិសុខសង្គម ដោយផ្តើមចេញពីការបង្ហោះសារតាមបណ្តាញសង្គមដែលលោកបានចោទរដ្ឋាភិបាលកម្ពុជា ថាបានប្រគល់ដីក្នុងការចរចាព្រំដែនជាមួយប្រទេសវៀតណាម។
ដំណើរការជំនុំជម្រះក្តី និងការកាត់ទោសជាបន្តបន្ទាប់លើលោក រ៉ុង ឈុន រួមជាមួយនឹងសកម្មជនវ័យក្មេងពីររូបទៀត រហូតដល់ពេលលោកត្រូវបានដោះលែង កាលពីខែវិច្ឆិកា ឆ្នាំ ២០២១ បានគូសបង្ហាញពីយុទ្ធសាស្ត្រដែលរដ្ឋាភិបាលនិងតុលាការកម្ពុជាបានអនុវត្តបទព្រហ្មទណ្ឌស្តីពីសកម្មភាពញុះញង់ ដើម្បីបង្ក្រាបលើក្រុមអ្នកប្រកាន់និន្នាការនយោបាយមិនរណបរដ្ឋាភិបាល ចំពេលមានការបង្ក្រាបលើក្រុមអ្នករិះគន់ និងគូប្រជែងនយោបាយរបស់គណបក្សកាន់អំណាច។ នេះបើយោងតាមរបាយការណ៍ដែលទើបចេញថ្មីពីគណៈមេធាវីអាមេរិកាំង (ABA)។
នៅក្នុងរបាយការណ៍របស់ខ្លួនស្តីពីការកាត់ក្តី មជ្ឈមណ្ឌលសិទ្ធិមនុស្សរបស់គណៈមេធាវីអាមេរិកាំង បានកត់សម្គាល់ថា ការប្រើប្រាស់មាត្រា ៤៩៥ នៃក្រមព្រហ្មទណ្ឌកម្ពុជា ដែលកំណត់សកម្មភាពញុះញង់ ត្រូវបានរិះគន់យ៉ាងខ្លាំង ទាំងក្នុង និងក្រៅប្រទេសកម្ពុជា។
របាយការណ៍នោះបានគូសបញ្ជាក់ថា៖ «ជនណាដែលត្រូវបានចោទប្រកាន់នៅក្រោមបទប្បញ្ញត្តិនេះ បានបង្ហាញពីការជំទាស់យ៉ាងខ្លាំងថា បទចោទនេះត្រូវបានធ្វើឡើងក្នុងហេតុផលនយោបាយសុទ្ធសាធ ជាមធ្យោបាយក្នុងការបំបិទមាត់សកម្មជន ឬអ្នករិះគន់រដ្ឋាភិបាលទាំងឡាយនោះ។ ការកាត់ទោសលោក រ៉ុង ឈុន ក៏មិនទំនងជាផ្លាស់ប្តូរមតិជាច្រើនបែបនេះដែរ»។
ទោះបីជាការចាប់ខ្លួនអ្នកបញ្ចេញមតិរិះគន់ បានក្លាយជារឿងសាមញ្ញទៅហើយនៅក្នុងប្រទេសកម្ពុជាក្តី ក៏ការចាប់ខ្លួនលោក រ៉ុង ឈុន បានធ្វើឲ្យមានប្រតិកម្មខ្លាំងក្លាជាច្រើន។ លោកបានដឹកនាំសហជីពគ្រូបង្រៀនឯករាជ្យដ៏ធំបំផុតនៅកម្ពុជាជាយូរឆ្នាំមកហើយ។ លោកក៏បានដឹកនាំសហព័ន្ធសហជីព ដែលត្រូវបានផ្សារភ្ជាប់ទៅនឹងបាតុកម្មតវ៉ាទ្រង់ទ្រាយធំមួយចំនួនកាលពីឆ្នាំ ២០១៣ របស់គណបក្សប្រឆាំងដ៏សំខាន់មួយកាលពីគ្រានោះ ដែលបានធ្វើឲ្យមានការផ្អាកដំណើរការរបស់វិស័យ កាត់ដេរមួយរយៈពេលខ្លី ហើយដែលបានជំរុញឱ្យមានបាតុកម្មប្រឆាំងរដ្ឋាភិបាលជាបន្តបន្ទាប់មកទៀតនោះ។
លោក រ៉ុង ឈុន ក៏ត្រូវបានតែងតាំងជាសមាជិកម្នាក់នៃគណៈកម្មាធិការជាតិរៀបចំការបោះឆ្នោត (គ.ជ.ប) តំណាងឲ្យសំឡេងរបស់គណបក្សប្រឆាំង ដែលជាផ្នែកនៃកិច្ចចរចាបែងចែកអំណាចមួយរយៈពេលខ្លីប៉ុណ្ណោះ បន្ទាប់ពីការបោះឆ្នោតថ្នាក់ជាតិឆ្នាំ២០១៣។
ក៏ប៉ុន្តែខណៈលោកនាយករដ្ឋមន្ត្រី ហ៊ុន សែន បានបាត់បង់ភាពអត់ធ្មត់របស់លោកចំពោះក្រុមមតិប្រឆាំងក្នុងអំឡុងរយៈពេលមួយទសវត្សរ៍កន្លងមកនេះ លោក រ៉ុង ឈុន បានបន្តលើកឡើងពីបញ្ហាចម្រូងចម្រាសជាច្រើន រួមទាំងបញ្ហារសើបខ្លាំងអំពីកិច្ចការព្រំដែនកម្ពុជាជាមួយប្រទេសវៀតណាម ដែលជាចំណុចប្រវត្តិសាស្ត្រដ៏ឈឺចាប់មួយរបស់កម្ពុជា។
ទោះជាយ៉ាងណាក្តី របាយការណ៍របស់គណៈមេធាវីអាមេរិកាំងក៏បានកត់សម្គាល់ផងដែរថា លោក រ៉ុង ឈុន បានទទួលស្គាល់ថា ការសរសេរ និងផ្សព្វផ្សាយតាមហ្វេសប៊ុករបស់លោក គឺផ្អែកលើកិច្ចសម្ភាសន៍របស់លោកជាមួយប្រជាពលរដ្ឋ ដែលរស់នៅក្បែរព្រំដែនជាប់នឹងប្រទេសវៀតណាម ហើយដែលពួកគេបានបាត់បង់ដីធ្លី។
ទោះយ៉ាងណាក៏ដោយ របាយការណ៍ដដែលនេះបានរៀបរាប់លម្អិតអំពីកិច្ចការដែលព្រះរាជអាជ្ញាមិនសម្រេចបានក្នុងការបង្ហាញថា លោក រ៉ុង ឈុន មានចេតនាញុះញង់អ្នកដទៃឱ្យប្រព្រឹត្តបទឧក្រិដ្ឋ ឬរំខានដល់សណ្តាប់ធ្នាប់សង្គម ដែលគួរតែជាចំណុចចាំបាច់ក្នុងការឲ្យចៅក្រមសម្រេចបាននូវសាលក្រមផ្តន្ទាទោស។
ក្នុងអំឡុងពេលសវនាការដែលបានចាប់ផ្តើមនៅថ្ងៃទី ១៥ ខែមករា ឆ្នាំ ២០២១ លោក រ៉ុង ឈុន បានប្រាប់តុលាការថា ការបង្ហោះសាររបស់លោកគឺធ្វើឡើងក្នុងគោលបំណងទាក់ទាញការចាប់អារម្មណ៍របស់សាធារណជន ចំពោះដីដែលបានបាត់បង់ទៅដោយសង្ឃឹមថា រដ្ឋាភិបាលនឹងធ្វើអន្តរាគមន៍ដោះស្រាយបញ្ហានោះ។
ព្រះរាជអាជ្ញាបានអះអាងថា ការបង្ហោះសាររបស់លោក គឺចង់បំភ័ន្តសាធារណជន បង្កភាពចលាចល និងរំខានដល់សណ្តាប់ធ្នាប់សង្គម ហើយថា លោក រ៉ុង ឈុន គ្មានមូលដ្ឋានក្នុងការសន្និដ្ឋាន ឬជំនាញបច្ចេកទេស ដើម្បីកំណត់ទីតាំងនៃការគូសព្រំដែននោះទេ។
ចៅក្រមបានយល់ស្របតាមការលើកឡើងរបស់ព្រះរាជអាជ្ញា ដោយច្រានចោលការអះអាងរបស់លោក រ៉ុង ឈុន ដែលថា ការបង្ហោះសាររបស់លោកគឺជាការអំពាវនាវដោយស្មោះត្រង់ ដោយផ្អែកលើការសង្កេត និងបទសម្ភាសន៍របស់លោកផ្ទាល់។ ចៅក្រមក៏បានច្រានចោលការអះអាងរបស់លោក រ៉ុង ឈុន ដែលថា យុវជនពីររូបរួមមាន កញ្ញា ស កណ្ណិកា និងលោក តុន និមល ដែលជាសកម្មជនត្រូវបានចោទប្រកាន់ជាមួយលោកដែរនោះ មិនពាក់ព័ន្ធនឹងការសរសេររបស់លោក។ ចៅក្រមបានសម្រេចកាត់ទោសឲ្យពួកគេម្នាក់ៗជាប់ពន្ធនាគាររយៈពេល ២០ ខែ។
របាយការណ៍របស់គណៈមេធាវីអាមេរិកាំងបានលើកឡើងថា៖ «ក្នុងសំណុំរឿងកាត់ក្តីលោក រ៉ុង ឈុន ចៅក្រមបានរកឃើញថា ជនជាប់ចោទទាំងបីនាក់បានដឹងថា សាធារណជននឹងឃើញការសរសេរនោះ ហេតុដូច្នេះ ពួកគេមានចេតនាបង្កឱ្យសាធារណជនចលាចលនិងខឹងសម្បារជាមួយនឹងគណៈកម្មាធិការចម្រុះស្តីពីកិច្ចការព្រំដែនផង និងរដ្ឋាភិបាលទូទៅផង»។
របាយការណ៍ដដែលនោះក៏បានរៀបរាប់បន្តទៀតថា៖ «ចំណុចនេះហើយដែលតុលាការបានរកឃើញថាជាការបង្កឲ្យមានការតវ៉ា ភាពច្របូកច្របល់ ភាពវឹកវរ និងការរំខានដល់សន្តិសុខសង្គម។ ជាថ្មីម្តងទៀត គួរកត់សម្គាល់ថា គ្មានការតវ៉ាណាមួយត្រូវបានផ្ទុះឡើងទេ បន្ទាប់ពីលោក រ៉ុង ឈុន បានសរសេរនៅលើបណ្តាញសង្គមស្តីអំពីបញ្ហាព្រំដែននោះទេ ហើយការតវ៉ាអំពីបញ្ហានេះក៏មិនទំនងនឹងកើតឡើងនាពេលអនាគតផងដែរ។ ផ្ទុយទៅវិញ ការតវ៉ាបែរបានកើតឡើង នៅពេលមានការចាប់ខ្លួនលោក រ៉ុង ឈុន ក្នុងករណីជាប់ពាក់ព័ន្ធនឹងការសរសេររបស់លោកទៅវិញទេ»។
របាយការណ៍នេះបានកត់សម្គាល់ទៀតថា រដ្ឋាភិបាលក៏បានបញ្ជូនក្រុមមន្ត្រីទៅភូមិដដែលនោះដែលលោក រ៉ុង ឈុន បានជួបសម្ភាសជាមួយប្រជាពលរដ្ឋដែលបានអះអាងថា ពួកគេបានបាត់បង់ដីធ្លី។ ហើយមន្ត្រីរដ្ឋាភិបាលទាំងនោះបានកំណត់ថា មិនមានភស្តុតាងនៃការបាត់បង់ដីព្រំដែននោះទេ ហើយការរកឃើញបែបនេះត្រូវបានយកទៅផ្សព្វផ្សាយយ៉ាងទូលំទូលាយ។
«ក្នុងន័យនេះ ការចាប់ខ្លួន និងការផ្តន្ទាទោសលោក រ៉ុង ឈុន គឺជារឿងហួសហេតុលើសពីភាពចាំបាច់ ក្នុងការជម្រះភាពយល់ច្រឡំណាមួយរបស់ប្រជាពលរដ្ឋ ដែលជាវិធានការដែលរដ្ឋាភិបាលបានអនុវត្ត ក្រោយការចេញសេចក្តីថ្លែងការណ៍របស់លោក រ៉ុង ឈុន ដែលគួរតែគ្រប់គ្រាន់ក្នុងការការពារសន្តិសុខជាតិ និងសណ្តាប់ធ្នាប់សាធារណៈ»។
គណៈមេធាវីអាមេរិកាំងលើកឡើងអំពីករណីរបស់លោក រ៉ុង ឈុន ថាជាឧទាហរណ៍ជាបន្តបន្ទាប់នៃយុទ្ធសាស្ត្ររបស់តុលាការកម្ពុជាក្នុងការអនុវត្តយ៉ាងទូលំទូលាយលើមាត្រា ៤៩៥ ដែលជាបទប្បញ្ញត្តិស្តីពីការញុះញង់ឲ្យប្រព្រឹត្តបទឧក្រិដ្ឋ នៅពេលអនុវត្តលើក្រុមអ្នករិះគន់ សកម្មជន និងអ្នកនយោបាយប្រឆាំង។
គណៈមេធាវីអាមេរិកាំងក៏អំពាវនាវដល់ភាគីពាក់ព័ន្ធអន្តរជាតិ រួមទាំងអង្គការសហប្រជាជាតិ សហរដ្ឋអាមេរិក និងសហភាពអឺរ៉ុប ឱ្យ «លើកទឹកចិត្តកម្ពុជាឱ្យអនុវត្តតាមច្បាប់អន្តរជាតិ និងបញ្ឈប់ការធ្វើទុក្ខបុកម្នេញលើអ្នកការពារសិទ្ធិមនុស្ស ដូចជាលោក រ៉ុង ឈុន»។
ហើយគណៈមេធាវីអាមេរិកាំងក៏ទាមទារឱ្យមានកំណែទម្រង់ផ្លូវច្បាប់ រួមទាំងការធ្វើវិសោធនកម្មលើក្រមព្រហ្មទណ្ឌ ដើម្បីតម្រូវឱ្យចៅក្រមពិភាក្សាឱ្យបានច្បាស់លាស់នូវអំណះអំណាង ដែលបង្ហាញពីចេតនាប្រព្រឹត្តបទឧក្រិដ្ឋ និងសំដៅឱ្យច្បាស់លាស់ចំពោះគោលការណ៍កាត់ទោសដែលមានចែងក្នុងក្រមនេះ នៅពេលធ្វើការសម្រេចកាត់ទោស។
លោក ជិន ម៉ាលីន អ្នកនាំពាក្យក្រសួងយុត្តិធម៌កម្ពុជា មានប្រសាសន៍ថា របាយការណ៍របស់គណៈមេធាវីអាមេរិកាំង គឺផ្អែកលើព័ត៌មានមិនល្អពីក្រុមប្រឆាំងនឹងរដ្ឋាភិបាល ហើយបានច្រានចោលការសន្និដ្ឋានរបស់របាយការណ៍នេះ។
លោកបានថ្លែងប្រាប់វីអូអេថា៖ «អ្នកណាក៏ដឹងដែរ គាត់ជាសកម្មជននយោបាយរបស់បក្សប្រឆាំងដែរ ក៏ប៉ុន្តែប្រើប្រាស់រូបភាពអង្គការសង្គមស៊ីវិល សមាគមហ្នឹង គឺដើម្បីបិទបាំងនូវសកម្មភាពនយោបាយរបស់គាត់ អាហ្នឹងគឺបង្ហាញ ពីចេតនាទុច្ចរិតរបស់គាត់ក្នុងការធ្វើម៉េចឱ្យមានការភាន់ច្រឡំ ធ្វើម៉េចឱ្យមានការមន្ទិលសង្ស័យ ឱ្យប្រជាពលរដ្ឋបាត់បង់ទំនុកចិត្ត បំផ្លាញនូវការខិតខំប្រឹងប្រែង បំផ្លាញនូវទំនាក់ទំនងការទូត ទំនាក់ទំនងអន្តរជាតិរវាងប្រទេសនិងប្រទេស ជាពិសេសគឺបញ្ឆេះនូវកំហឹងពូជសាសន៍ ដែលយើងឃើញថាមេដឹកនាំរបស់គាត់ ហើយនិងបក្សពួករបស់គាត់តែងតែធ្វើ ហើយត្រូវបានអន្តរជាតិថ្កោលទោសជាហូរហែនាពេលកន្លងមក»។
លោកបានថ្លែងបន្ថែមថា៖ «ហើយនៅក្នុងសវនាការ ដំណើរការនីតិវិធីតុលាការ គាត់អត់មានមូលដ្ឋានអីក្នុងការដោះបន្ទុកទាល់តែសោះ ទៅនឹងភស្តុតាងសក្ខីកម្មមូលដ្ឋានដែលសមត្ថកិច្ចមានក្នុងការចោទប្រកាន់ ក្រៅតែពីរការបញ្ជាក់ថា អាហ្នឹងជាសិទ្ធិសេរីភាពនៃការបញ្ចេញមតិ ហើយក្រៅពីហ្នឹងគឺមិនមានអីទាំងអស់ក្នុងការដោះបន្ទុក»។
លោក ជិន ម៉ាលីន បានបញ្ជាក់ថា រដ្ឋាភិបាលបានទាក់ទងជាមួយមន្ត្រីការទូតរួចហើយអំពីករណីនេះ ដើម្បី «ឆ្លើយតបបំភ្លឺ» ព័ត៌មានដែលមកពីអ្នករិះគន់។
លោកបានលើកឡើងថា៖ «ហើយគាត់គោរពទៅនឹងការបកស្រាយ ទៅនឹងយន្តការច្បាប់របស់កម្ពុជា ហើយជាពិសេសគឺអធិបតេយ្យភាពរបស់កម្ពុជា ដែលគាត់មិនបានធ្វើការជ្រៀតជ្រែក ហើយក៏មិនបានធ្វើការបង្គាប់បញ្ជាមកកម្ពុជា ក្នុងនាមជារដ្ឋអធិបតេយ្យនោះដែរ»។
ជាការឆ្លើយតបទៅនឹងការអត្ថាធិប្បាយរបស់លោក ជិន ម៉ាលីន ទីប្រឹក្សាដែលធ្វើការនៅមជ្ឈមណ្ឌលសិទ្ធិមនុស្សនៅគណៈមេធាវីអាមេរិកាំង និយាយថា៖ «របាយការណ៍នេះគឺផ្អែកលើភស្តុតាងដែលអាចទុកចិត្តបានពីប្រភពដែលគួរឱ្យទុកចិត្តជាច្រើន។ ការសន្និដ្ឋានទាំងអស់ គឺជាលទ្ធផលនៃការវិភាគឯករាជ្យដោយប្រុងប្រយ័ត្ន ដោយផ្អែកលើព័ត៌មានដែលមាន»។
គណៈមេធាវីអាមេរិកាំង ជាក្រុមចុងក្រោយបង្អស់ដែលលើកសំណួរអំពីករណីសំណុំរឿងរបស់លោក រ៉ុង ឈុន និងការប្រើប្រាស់បទចោទស្តីពីការញុះញង់ ដើម្បីគាបសង្កត់សេរីភាពបញ្ចេញមតិនៅកម្ពុជា។
ការិយាល័យឧត្តមស្នងការទទួលបន្ទុកសិទ្ធិមនុស្សរបស់អង្គការសហប្រជាជាតិ រួមជាមួយនឹងក្រុមសិទ្ធិមនុស្សក្នុងស្រុកមួយចំនួន បានលើកឡើងនៅឆ្នាំ ២០២០ ថា មេដឹកនាំសហជីពរូបនេះគ្រាន់តែបញ្ចេញមតិប៉ុណ្ណោះ ហើយការចាប់ខ្លួនលោក គឺជាការបំពាន។
មន្ត្រីរដ្ឋាភិបាលបានច្រានចោលក្តីបារម្ភទាំងនោះ ខណៈលោកនាយករដ្ឋមន្ត្រី ហ៊ុន សែន បានគំរាមអ្នកដែលតវ៉ានឹងការចាប់ខ្លួនលោក រ៉ុង ឈុន។ លោកនាយករដ្ឋមន្ត្រីក៏បានរឹតបន្តឹងបន្ថែមលើការរិះគន់ពាក់ព័ន្ធនឹងព្រំដែនផងដែរ។
ក្នុងសុន្ទរកថាមួយកាលពីខែសីហា ឆ្នាំ ២០២២ លោកនាយករដ្ឋមន្ត្រី ហ៊ុន សែន បានថ្លែងថា៖ «រឿងព្រំដែនមិនមែនរឿងលេងសើចទេ កុំញុះញង់ឱ្យមានចម្បាំងរាំងជល់ ជាមួយប្រទេសជិតខាង តាមរយៈនៃសាររបស់អ្នកឯងចង្អុល កន្លែងនេះ ឬកន្លែងនោះ»។
លោកបានបន្ថែមថា៖ «ចាំមើលមានអ្នកនិយាយ [រឿងព្រំដែន] ប៉ុន្មាននាក់ចេញមកទៀត? សុំផ្ញើសារ មានចេញប៉ុន្មានចាប់ប៉ុណ្ណឹង»។
កាលពីឆ្នាំ ២០១៥ លោក អ៊ុំ សំអាន និងលោក ហុង សុខហួរ អតីតតំណាងរាស្រ្តគណបក្សសង្គ្រោះជាតិដែលត្រូវបានតុលាការកំពូលរំលាយ ក៏ត្រូវបានចាប់ខ្លួន ដោយសារការតស៊ូមតិជុំវិញបញ្ហាព្រំដែន ដែលបានក្លាយជាបញ្ហាក្តៅគគុក បន្ទាប់ពីមានការចោទប្រកាន់ថា មានការលុកលុយព្រំដែនពីភាគីវៀតណាមក្នុងអំឡុងពេលនោះ។
ទោះបីជាយ៉ាងណាក៏ដោយ សម្រាប់មន្ត្រីបក្សកាន់អំណាច បញ្ហាជាច្រើនបានក្លាយជារឿងដែលមិនអាចយកមកពិភាក្សាបានជាដាច់ខាតក្នុងរយៈពេលប៉ុន្មានឆ្នាំចុងក្រោយនេះ រាប់ចាប់ពីសកម្មភាពបំផ្លាញបរិស្ថាន ការរិះគន់លើការឆ្លើយតបរបស់រដ្ឋាភិបាលចំពោះជំងឺកូវីដ១៩ រហូតដល់ការបង្ហោះពាក្យប្រមាថមើលងាយនាយករដ្ឋមន្ត្រី ឬព្រះមហាក្សត្រជាដើម។
បច្ចុប្បន្ននេះ អង្គការសិទ្ធិមនុស្សលីកាដូ បានរាយបញ្ជី «អ្នកទោសមនសិកា» ចំនួន ៤៩ នាក់នៅក្នុងប្រទេសកម្ពុជា ដែលករណីរបស់ពួកគេមានលក្ខណៈនយោបាយហួសហេតុ ហើយជារឿយៗពាក់ព័ន្ធនឹងការចោទប្រកាន់ពីបទញុះញង់។
កាលពីឆ្នាំ ២០២២ នេះ ក្រុមមេដឹកនាំគណបក្សសង្គ្រោះជាតិដែលត្រូវបានរំលាយ ត្រូវបានកាត់ទោសកំបាំងមុខក្នុងការកាត់ក្តីពីបទញុះញង់ទ្រង់ទ្រាយធំ ដែលភាគច្រើនទាក់ទងនឹងសកម្មភាពផ្សព្វផ្សាយតាមបណ្តាញសង្គមរបស់ពួកគេពីក្រៅប្រទេស។
លោក រ៉ុង ឈុន បានប្រាប់ VOA កាលពីខែធ្នូថា លោកនឹងមិនបញ្ឈប់ការរិះគន់រដ្ឋាភិបាលនាពេលអនាគតនោះទេ បើលោកមិនយល់ថា ការធ្វើបែបនេះគឺដើម្បីប្រយោជន៍របស់កម្ពុជានោះ។
«ជំហររបស់ខ្ញុំ ខ្ញុំនៅតែប្រកាន់ ការនិយាយការពិត បើរដ្ឋាភិបាលធ្វើអ្វីផ្ទុយពីការពិត និងរំលោភបំពាន មិនមានភាពចំណេញដល់កម្ពុជា ខ្ញុំនៅតែបន្តនិយាយការពិត។ ខ្ញុំមិនអាចដកថយ មិននិយាយទេ»។
លោកបានថ្លែងបន្ថែមថា៖ «មិនត្រឹមតែនិយាយទេ យើងនឹងធ្វើការទាមទារបន្ថែមទៀត។ យើងនឹងដឹកនាំកម្មករ គ្រូបង្រៀន ធ្វើការទាមទារបន្តបន្ទាប់ទៀត ទោះបីខ្ញុំប្រឈមត្រូវបានចាប់ខ្លួនក្តី និងបន្តនឹងការចាប់ខ្លួនក្តី»។
លោក រ៉ុង ឈុន បានលើកឡើងថា របាយការណ៍របស់គណៈមេធាវីអាមេរិកាំងបានឆ្លុះបញ្ចាំងពីការពិតនៃសំណុំរឿងរបស់លោក ហើយលោកសង្ឃឹមថា វានឹងជួយកែទម្រង់ប្រព័ន្ធតុលាការទៅជាតុលាការដែលធ្វើឡើងដោយវិជ្ជាជីវៈ ជាជាងធ្វើជាឧបករណ៍ និងកូនអុករបស់អ្នកមានទ្រព្យនិងមានអំណាច៕
