អង្គការសិទ្ធិមនុស្សក្នុងស្រុកមួយ បានបញ្ជាក់ពីក្តីបារម្ភចំពោះច្បាប់ស្តីពីទូរគមនាគមន៍ថាមានការរឹតត្បិតសេរីភាពយ៉ាងខ្លាំងដល់អ្នកប្រើប្រាស់ប្រព័ន្ធអ៊ីនធឺណិត នឹងបើកឲ្យអាជ្ញាធរកម្ពុជា លូកដៃចូលទំនាក់ទំនងឯកជនតាមរយៈការតាមដានឧបករណ៍ទូរគមនាគមន៍ជាដើម។
ក្នុងបទវិភាគផ្នែកច្បាប់មួយ ដែលធ្វើឡើងដោយអង្គការសិទ្ធិមនុស្ស លីកាដូ និងបានចេញផ្សាយនាថ្ងៃព្រហស្បតិ៍នេះបានឲ្យដឹងថា ច្បាប់ថ្មីដែលដាក់ឲ្យប្រើប្រាស់នេះ គឺមានលក្ខណៈរឹតត្បិតសិទ្ធិបញ្ចេញមតិ របស់អ្នកប្រើប្រាស់អ៊ីនធឺណិត «បំភិត បំភ័យបុគ្គលម្នាក់ៗ ដាក់ទណ្ឌកម្មដល់ការអនុវត្តសិទ្ធិសេរីភាពជាមូលដ្ឋាន និងកាត់បន្ថយបុគ្គលឬក្រុមជំទាស់»។ អង្គការសិទ្ធិមនុស្សដដែល បានឲ្យដឹង ថាច្បាប់ស្តីពីទូរគមនាគមន៍នេះគឺជាវិធានថ្មីមួយ សម្រាប់រដ្ឋាភិបាលកម្ពុជា ដើម្បីទប់ស្កាត់និងរារាំងសកម្មភាពរបស់សង្គមស៊ីវិលក្នុងពេលបោះឆ្នោតឃុំសង្កាត់នាឆ្នាំ ២០១៧ និងបោះឆ្នោតជាតិ ឆ្នាំ២០១៨ខាងមុខដោយច្បាប់ផ្តល់អាទិភាព ដល់អាជ្ញាធរក្នុងការជ្រៀតជ្រែក ឬតាមដានការប្រើប្រាស់ប្រព័ន្ធទូរគមនាគមន៍ដ៏ពេញនិយមនេះ។
លោកស្រី ណាលី ពីឡូក (Naly Pilorge) នាយិកាអង្គការលីកាដូ ក៏បានបញ្ជាក់ក្នុងសេចក្តីប្រកាសព័ត៌មានដែល VOA ទទួលបាននាថ្ងៃព្រហស្បតិ៍នេះថា ការកាត់ទោសលើយុវជន គង់ រ៉ៃយ៉ា ដែលបង្ហោះសារលើទំព័រហ្វេសប៊ុកផ្ទាល់ខ្លួនអំពី«បដិវត្តន៍ពណ៌» នាពេលថ្មីៗនេះ គឺសរឲ្យឃើញពីឆន្ទៈរួចជាស្រេចរបស់រដ្ឋាភិបាល ក្នុងការដាក់ទណ្ឌកម្មលើការបញ្ចេញមតិលើប្រព័ន្ធអ៊ីនធឺណិត និងគាបសង្កត់ទៅលើមតិរិះគន់ដែលច្បាប់នេះមិនអនុញ្ញាត។
លោកស្រីណាលី ពីឡូក ត្រូវបានគេស្រង់សម្តីដើមយ៉ាងដូច្នេះ៖ «ដោយការប្រើប្រាស់ច្បាប់ស្តីពីប្រព័ន្ធទូរគមនាគមន៍ ដែលអនុញ្ញាត ឲ្យមានការស្តាប់ ដោយសម្ងាត់ និងដាក់ទណ្ឌកកម្ម ទៅលើការបញ្ចេញមតិនានានៅលើប្រព័ន្ធអ៊ីនធឺណិត ទោះជាលក្ខណៈ ឯកជនក្តី ជាលក្ខណៈសាធារណៈក្តី រាជរដ្ឋាភិបាលបានបង្ហាញយ៉ាងរឹតតែច្បាស់នូវបំណងរបស់រាជរដ្ឋាភិបាលក្នុងការរំលោភបំពាន លើសេរីភាពក្នុងការបញ្ចេញមតិតាមប្រព័ន្ធអ៊ីនធឺណិត»។
អង្គការសិទ្ធិមនុស្សលីកាដូ ក៏បានឲ្យដឹងផងដែរថាច្បាប់ថ្មីដែលមាន១១២មាត្រានិង១៥ជំពូកនេះ ក៏អនុញ្ញាតឲ្យមានការបង្កើតអង្គភាពពិសេស ដើម្បីធ្វើការតាមដានលើប្រព័ន្ធអ៊ីនធឺណិត ផងដែរ។ លើសពីនេះទៀត ច្បាប់នេះក៏មានការពិន័យនិងដាក់ពន្ធនាគារពី៧ ទៅ១៥ឆ្នាំ ចំពោះជនណាដែលតុលាការយល់ថាប្រព្រឹត្តបទល្មើសប៉ះពាល់ដល់សន្តិសុខជាតិ។
យ៉ាងណាក៏ដោយ លោក ហ៊ុន សារឿន អ្នកនាំពាក្យរបស់ក្រសួងប្រៃសណីយ៍និងទូរគមនាគមន៍ បានថ្លែងការពារច្បាប់ថ្មីនេះថា៖«ទីមួយឱ្យសូមជម្រាបថាច្បាប់ស្តីពីទូរគមនាគមន៍គឺ អត់មានទេការរឹតត្បិត នូវសេរីភាពក្នុងការបញ្ចេញមតិ ទោះបីដោយប្រព័ន្ធណាក៏ដោយ មិនថាប្រព័ន្ធទំនាក់ទំនងសង្គម ឬក៏ប្រព័ន្ធទូរស័ព្ទ ប្រព័ន្ធណាមួយដែលពាក់ព័ន្ធនឹងផ្នែកទូរគមនាគមន៍ទេ។ ហើយការផ្តល់សិទ្ធិឲ្យទៅអាជ្ញាធរក្នុងការស្តាប់ការសន្ទនាអីនោះ ក៏អត់មានដែរ»។
លោកបន្តថា ច្បាប់ស្តីពីទូរគមនាគមន៍គឺធ្វើឡើងដើម្បីឆ្លើយតបទៅនឹងគោលបំណងបីធំៗក្នុងនោះគឺការការពារអ្នកប្រើប្រាស់ប្រព័ន្ធទូរគមនាគមន៍ អ្នកផ្តល់សេវាកម្មប្រព័ន្ធនេះនិងការប្រមូលថវិកាចូលរដ្ឋជាដើម។ លោក ហ៊ុន សារឿន ក៏ច្រានចោលទាក់ទិននឹងការចោទពីភាពមិនច្បាស់លាស់និងការដាក់ទណ្ឌកម្មធ្ងន់ធ្ងរ ដោយលើកឡើងថាច្បាប់ស្តីពីទូរគមនាគមន៍គឺធ្វើឡើងស្របតាមគតិយុត្តិរបស់កម្ពុជា ហើយមានការពិគ្រោះយោបល់ពីក្រសួងអ្នកជំនាញនឹងអង្គការសង្គមស៊ីវិលផងដែរ។
ច្បាប់នេះត្រូវបានប្រកាសដាក់ឲ្យប្រើប្រាស់ចាប់តាំងពីថ្ងៃទី៣០ ខែវិច្ឆិកាឆ្នាំ ២០១៥មក។ យ៉ាងណាក៏ដោយមិនទាន់មានជនណាម្នាក់ត្រូវបានកាត់ទោសដោយច្បាប់នេះនៅឡើយទេ៕
