សកម្មជនសិទ្ធិមនុស្ស អ្នកនយោបាយមកពីគណបក្សទាំងពីរ និងមនុស្សជាច្រើនផ្សេងទៀតដែលមានការរំជួលចិត្តចំពោះកេរ្តិ៍តំណែលរបស់លោក John Lewis បានចូលរួមកាន់ទុក្ខសពលោក បន្ទាប់ពីលោកបានស្លាប់កាលពីថ្ងៃសុក្រដោយសារជំងឺមហារីកលំពែង។ លោក John Lewis នៅពេលមានជីវិត គឺជាសមាជិករដ្ឋសភា និងជាអ្នកគាំទ្រចលនាសិទ្ធិស៊ីវិល។
អ្នកដែលចូលរួមកាន់ទុក្ខលោកបានរំឭកអំពីភាពរឹងមាំ ភាពក្លាហាន និងភាពសប្បុរសរបស់លោក ដែលជាបុរសម្នាក់ដែលតស៊ូពេញមួយជីវិតប្រឆាំងនឹងការរើសអើងជាតិសាសន៍តាំងពីលោកចូលរួមនៅក្នុងការតវ៉ានៅលើស្ពាន Edmund Pettus ក្នុងទីក្រុង Selma រដ្ឋ Alabama កាលពីឆ្នាំ ១៩៦៥ រហូតដល់ពេលដែលលោកធ្វើជាសមាជិករដ្ឋសភាមុនពេលដែលលោកស្លាប់។
លោកប្រធានាធិបតី Donald Trump បានបង្ហោះសារនៅលើ Twitter កាលពីថ្ងៃសៅរ៍ថា៖ «ខ្ញុំសោកស្ដាយណាស់ ដែលបានឮអំពីដំណឹងមរណភាពរបស់វីរបុរសទាមទារសិទ្ធិស៊ីវិល លោក John Lewis។ Melania និងខ្ញុំសូមចូលរួមរំលែកទុក្ខដល់ក្រុមគ្រួសាររបស់លោក Lewis»។
លោកអតីតប្រធានាធិបតី George W. Bush និយាយថា៖ «ក្នុងនាមជាបុរសស្បែកខ្មៅវ័យក្មេងមួយរូបដែលដើរតវ៉ាដើម្បីសិទ្ធិស្មើគ្នានៅក្នុងទីក្រុង Selma រដ្ឋ Alabama លោក John Lewis បានឆ្លើយតបជាមួយនឹងអំពើហិង្សាឃោរឃៅដោយក្ដីសង្ឃឹមដ៏ក្លាហាន។ ហើយពេញមួយអាជីពរបស់លោកក្នុងនាមជាមេដឹកនាំសិទ្ធិស៊ីវិល និងជាមន្ត្រីរដ្ឋការម្នាក់ លោកបានធ្វើការដើម្បីធ្វើឲ្យសហរដ្ឋអាមេរិកក្លាយជាសហព័ន្ធដ៏ប្រសើរបំផុតជាងមុនមួយ»។
លោកអតីតប្រធានាធិបតី Barack Obama បានរំឭកពេលលោកស្បថចូលកាន់តំណែងជាប្រធានាធិបតីនៅអាណត្តិទីមួយរបស់លោកថា៖ «ខ្ញុំបានឱបលោក Lewis នៅលើវេទិកា មុនពេលខ្ញុំស្បថចូលកាន់តំណែង ហើយខ្ញុំបានប្រាប់លោកថា ខ្ញុំអាចមកឈរជើងទីនេះបាន គឺដោយសារការលះបង់ដែលលោកបានធ្វើ»។
សមាជិកព្រឹទ្ធសភាខាងគណបក្សប្រជាធិបតេយ្យប្រចាំរដ្ឋ California អ្នកស្រី Kamala Harris បានកត់សម្គាល់ថា លោក Lewis មិនត្រឹមតែបានតតាំងឲ្យមានការបញ្ចប់ការរើសអើងជាតិសាសន៍ប៉ុណ្ណោះទេ ប៉ុន្តែថែមទាំងបានតតាំងដើម្បីសិទ្ធិរបស់អ្នកស្រលាញ់ភេទដូចគ្នា ដូចជានៅពេលដែលលោកប្រឆាំងនឹងបម្រាមរបស់រដ្ឋាភិបាលសហព័ន្ធស្ដីពីការរៀបការរបស់អ្នកស្រលាញ់ភេទដូចគ្នាជាដើម និងតតាំងដើម្បីសិទ្ធិរបស់ជនអន្តោប្រវេសន៍ ដូចជាការបញ្ចប់នូវគោលនយោបាយបំបែកសមាជិកគ្រួសារជាដើម»។
គេនៅមិនទាន់ឃើញមានការប្រកាសបន្ទាន់ណាមួយអំពីគម្រោងពិធីបុណ្យសពរបស់លោក Lewis នៅឡើយទេ ដែលពិធីនេះអាចរងការប៉ះពាល់ដោយសារវិបត្តិជំងឺកូវីដ១៩។ អភិបាលរដ្ឋ Georgia លោក Brian Kemp បាននិយាយថា ទង់ជាតិនៅអគាររដ្ឋនានានឹងត្រូវបង្ហូតត្រឹមពាក់កណ្ដាលដងរហូតដល់ពេលថ្ងៃលិច នៅថ្ងៃបញ្ចុះសពរបស់លោក Lewis៕
