អ្នកស្រាវជ្រាវ និងសកម្មជនសិទ្ធិមនុស្សនានាព្រមានថា ការបំពុលខ្យល់អាកាសដែលបណ្តាលមកពីភ្លើងឆេះ ដោយសារការបំផ្លិចបំផ្លាញព្រៃឈើដោយគ្មានការយកចិត្តទុកដាក់នៅក្នុងតំបន់ព្រៃអាម៉ាហ្សូននៃប្រទេសប្រេស៊ីល អាចបង្កើនអត្រាស្លាប់ក្នុងចំណោមអ្នកឆ្លងជំងឺកូវីដ១៩ ជាពិសេសនៅក្នុងបណ្ដាទីក្រុងនៅជិតព្រៃតំបន់ត្រូពិកនេះ។
អ្នកស្រី Luciana-Tellez-Chevez អ្នកស្រាវជ្រាវផ្នែកបរិស្ថាននៃអង្គការសិទ្ធិមនុស្ស Human Rights Watch បាននិយាយថា ការសិក្សាមួយដែលបានធ្វើឡើងដោយអង្គការ Human Rights Watch បានរកឃើញថា ប្រព័ន្ធសុខាភិបាលដែលកំពុងមានការលំបាកនៅក្នុងការផ្តល់សេវាព្យាបាលដល់អ្នកជំងឺកូវីដ១៩ ដែលមានវ័យចំណាស់ នឹងចាល់ជាមួយនឹងលំហូរអ្នកជំងឺថ្មីដ៏ច្រើន ដែលរងគ្រោះដោយសារជំងឺផ្លូវដង្ហើមដែលបណ្តាលមកពីការឆេះព្រៃអាម៉ាហ្សូន។
អង្គការសិទ្ធិមនុស្សនោះក៏បានប្រាប់ឲ្យដឹងទៀតថា មនុស្ស ២.១៩៥ នាក់ បានចូលសម្រាកព្យាបាលនៅមន្ទីរពេទ្យដោយសារជំងឺផ្លូវដង្ហើម ដែលបណ្ដាលមកពីការឆេះព្រៃអាម៉ាហ្សូនកាលពីឆ្នាំ ២០១៩។
អ្នកស្រី Maria Laura Canineu នាយកអង្គការសិទ្ធិមនុស្ស Human Rights Watch ប្រចាំនៅប្រទេសប្រស៊ីល បាននិយាយថា ការបំពុលខ្យល់អាកាសដែលបណ្តាលមកពីផ្សែងឆេះព្រៃ បានបណ្ដាលឲ្យអ្នករងគ្រោះមានបញ្ហាសុខភាពរ៉ាំរ៉ៃ។
ប្រធានាធិបតីប្រទេសប្រេស៊ីលលោក Jair Bolsonaro បានបញ្ជូនទាហានទៅពន្លត់ភ្លើងឆេះព្រៃកាលពីខែឧសភា ក៏ប៉ុន្តែអ្នកជំនាញបរិស្ថានបានចោទសួរថា តើកិច្ចប្រឹងប្រែងបែបនេះ មានប្រសិទ្ធភាព ឬ ក៏អត់នៅក្នុងការធ្វើឲ្យប្រសើរឡើងនូវគុណភាពខ្យល់៕
