ខណៈអង្គការសហប្រជាជាតិបញ្ចប់ការចាក់វ៉ាក់សាំងជំងឺស្វិតដៃជើងសម្រាប់កុមារភាគច្រើននៅក្នុងតំបន់ហ្កាហ្សា សេវាកម្មសង្គ្រោះបន្ទាន់សុខាភិបាលលីបង់ថា ខ្លួនបានទាញចេញសាកសពចំនួន ៣០ ចេញពីគំនរអគារលំនៅឋានមួយកន្លែង ដែលត្រូវរងការវាយប្រហារពីអ៊ីស្រាអែលកាលពីយប់មុននោះ។ កិច្ចប្រឹងប្រែងស្វែងរកជនរងគ្រោះមានបន្តកាលពីថ្ងៃពុធ ហើយគេមិនដឹងច្បាស់ថា តើមានអ្នកនៅរស់រាន និងសាកសពប៉ុន្មាន ដែលនៅជាប់ក្រោមគំនរ។
ការវាយប្រហារតាមអាកាសនេះ កើតមានឡើងដោយមិនមានការព្រមានពីមុន។ យោធាអ៊ីស្រាអែលមិនបានចេញសេចក្តីថ្លែងការណ៍អ្វីទេ ទាក់ទងនឹងការវាយប្រហារនេះ ហើយគេមិនបានដឹងភ្លាមៗទេ ថាអ្វីជាគោលដៅនៃការវាយប្រហារនោះទេ។ កាលពីថ្ងៃអង្គារនាយករដ្ឋមន្ត្រីអ៊ីស្រាអែល លោក Benjamin Netanyahu បានបណ្តេញចេញរដ្ឋមន្ត្រីការពារជាតិ លោក Yoav Gallant ចេញពីតំណែងនៅក្នុងការប្រកាសដ៏គួរឱ្យភ្ញាក់ផ្អើលមួយ ដែលបានបណ្តាលឱ្យមានបាតុកម្មនៅទូទាំងប្រទេស។ រដ្ឋមន្ត្រីការបរទេសលោក Israel Katz ដែលជាអ្នកស្មោះស្ម័គ្រនឹងលោក Netanyahu នឹងត្រូវជំនួសលោក Gallant។
ថ្វីបើលោក Netanyahu បានអំពាវនាវឱ្យមានការបន្តដាក់សម្ពាធខាងយោធាលើក្រុមហាម៉ាស់ក្តី ក៏លោក Gallant វិញថា កងកម្លាំងយោធាបានបង្កើតរួចហើយ នូវលក្ខខណ្ឌដែលយ៉ាងហោចណាស់អាចនាំឱ្យមានកិច្ចព្រមព្រៀងការទូតបណ្ដោះអាសន្នមួយ ដែលអាចឱ្យក្រុមសកម្មប្រយុទ្ធដោះលែងចំណាប់ខ្មាំង។
សង្គ្រាមរវាងអ៊ីស្រាអែលនិងក្រុមហាម៉ាស់ បានចាប់ផ្តើមឡើង ក្រោយក្រុមសកម្មប្រយុទ្ធប៉ាឡេស្ទីននេះបានសម្រុកចូលវាយប្រហារអ៊ីស្រាអែលកាលពីថ្ងៃទី៧ ខែតុលា ឆ្នាំ២០២៣ ដោយសម្រាប់មនុស្សប្រមាណ ១.២០០នាក់ ដែលភាគច្រើនជាជនស៊ីវិល និងចាប់ពង្រត់មនុស្ស២៥០នាក់ផ្សេងទៀត។ ការឆ្លើយតបខាងយោធារបស់អ៊ីស្រាអែលនៅហ្កាហ្សាបានសម្លាប់មនុស្សជាង ៤៣.០០០នាក់ នេះបើតាមមន្ត្រីសុខាភិបាលប៉ាឡេស្ទីន។ នៅក្នុងតួលេខនេះ ពួកគេមិនបានបែងចែករវាងជនស៊ីវិលនិងអ្នកសកម្មប្រយុទ្ធទេ ប៉ុន្តែថា ជាងពាក់កណ្តាលនៃអ្នកដែលបានស្លាប់ជាស្ត្រីនិងកុមារ។
ចាប់តាំងពីជម្លោះរវាងអ៊ីស្រាអែលនិងក្រុមហេសបូឡា (Hezbollah) នៅលីបង់បានផ្ទុះឡើងកាលពីឆ្នាំ២០២៣ មានមនុស្សយ៉ាងតិច ៣.០០០នាក់បានត្រូវសម្លាប់ និងប្រមាណ១៣.៥០០នាក់រងរបួសនៅលីបង់។ នេះបើតាមក្រសួងសុខាភិបាលលីបង់៕
វេទិកាបញ្ចេញមតិ