គណៈកម្មាធិការផ្នែកស៊ើបការសម្ងាត់របស់សភាតំណាងរាស្ត្រអាមេរិកាំងបានចេញផ្សាយអនុស្សារណៈមានជម្លោះមួយដែលគូសបញ្ជាក់ការចោទប្រកាន់ដោយពួកសាធារណរដ្ឋថាពួកអ្នកស៊ើបអង្កេតរបស់ FBI បានរំលោភអំណាចរបស់ពួកគេនៅក្នុងការស៊ើបអង្កេតរបស់ពួកគេស្តីពីការជ្រៀតជ្រែករបស់រុស្សីក្នុងការបោះឆ្នោតប្រធានាធិបតីស.រ.អា.កាលពីឆ្នាំ២០១៦។
អនុស្សារណៈនេះបានត្រូវផ្សព្វផ្សាយកាលពីថ្ងៃសុក្រក្រោយពីប្រធានាធិបតី Donald Trump បានយល់ព្រមដល់ការចាត់ទុកឯកសារនេះថាមិនមានភាពជាការសម្ងាត់។លោក Devin Nunes ប្រធាននៃគណៈកម្មាធិការនេះខាងគណបក្សសាធារណរដ្ឋជាអ្នកសរសេរអនុស្សារណៈនេះ។
សេតវិមានបាននិយាយថាអនុស្សារណៈនេះបានបង្កើន «កង្វល់យ៉ាងប្រាកដប្រជា» អំពីការស៊ើបអង្កេតរបស់ក្រសួងយុត្តិធ៌មនិង FBI ស្តីពីការជ្រៀតជ្រែករបស់រុស្សី។ទីភ្នាក់ងារទាំងពីរនេះបានជំទាស់នឹងការផ្សព្វផ្សាយអនុស្សារណៈនេះដោយចោទសួរអំពីភាពត្រឹមត្រូវរបស់ឯកសារនេះ។
ប្រធានាធិបតី Trump បានព៌ណនាសេចក្តីនៅក្នុងអនុស្សារណៈនេះថា«អាក្រក់»។
លោក Nunes បានចេញសេចក្តីថ្លែងការណ៍មួយកាលពីថ្ងៃសុក្រសម្តែងសេចក្តីសង្ឃឹមថាសកម្មភាពទាំងនេះរបស់ពួកសាធារណរដ្ឋក្នុងគណៈកម្មាធិការផ្នែកស៊ើបការសម្ងាត់អាច «បំភ្លឺ» អំពីអ្វីដែលលោកហៅថា «ហេតុការណ៍គួរឱ្យភ្ញាក់ផ្អើលមួយចំនួននេះ»។
សេចក្តីថ្លែងការណ៍មួយរបស់គណបក្សប្រជាធិបតេយ្យបានចោទប្រកាន់ពួកសាធារណរដ្ឋថាបានធ្វើឱ្យមាន «ការមានពីមុនដ៏អាក្រក់» មួយដោយបានផ្សព្វផ្សាយព័ត៌មានសម្ងាត់ដែលនឹងនាំឱ្យមានការខូចខាតក្នុងរយៈពេលយូរដល់សហគមន៍ស៊ើបការសម្ងាត់ក្នុងគោលបំណងការពារ Trump ប្រឆាំងនឹងការចោទប្រកាន់ត្រូវរំពឹងថានឹងមាននៅក្នុងការស៊ើបអង្កេតអំពីការជ្រៀតជ្រែករបស់រុស្សីក្នុងការបោះឆ្នោតប្រធានាធិបតីស.រ.អា.កាលពីឆ្នាំ២០១៦៕
