ទីភ្នាក់ងារព័ត៌មានមួយចំនួនកំពុងតែរាយការណ៍ថា លោកប្រធានាធិបតីអាមេរិក Donald Trump នឹងដកសហរដ្ឋអាមេរិកចេញពីកិច្ចព្រមព្រៀងអាកាសធាតុទីក្រុងប៉ារីសឆ្នាំ២០១៥ ដែលមានលក្ខណៈប្រវត្តិសាស្រ្ត ដែលការណ៍នេះផ្ទុយស្រឡះពីគោលនយោបាយក្នុងយុគសម័យលោក Obama នៅពេលកាន់តំណែង។ បើសិនជាអាមេរិកដកខ្លួនចេញពីកិច្ចព្រមព្រៀងនេះមែន នោះនឹងធ្វើឲ្យសមាជិកខាងគណបក្សសាធារណរដ្ឋពេញចិត្ត ប៉ុន្តែធ្វើឲ្យក្រុមសម្ព័ន្ធមិត្តរបស់អាមេរិកមានការខឹងសម្បា។
ប៉ុន្តែលោក Trump បានបញ្ជាក់កាលពីថ្ងៃពុធថា សេចក្តីសម្រេចចិត្តនេះនៅមិនទាន់សម្រេចចុងក្រោយនៅឡើយទេ ដោយលោកបានបង្ហោះសារមួយលើបណ្តាញសង្គម Twitter ថា លោកនឹងប្រកាសអំពីសេចក្តីសម្រេចចិត្តរបស់លោកទៅលើសន្ធិសញ្ញានេះ «ក្នុងរយៈពេលប៉ុន្មានថ្ងៃខាងមុខ»។
ដំណឹងនេះលេចឡើងក្នុងរយៈពេលប៉ុន្មានថ្ងៃ បន្ទាប់ពីសមាជិកព្រឹទ្ធសភាខាងគណបក្សសាធារណរដ្ឋ២២នាក់បញ្ជូនលិខិតមួយច្បាប់ទៅឲ្យលោក Trump ដោយជំរុញឲ្យលោក «ដកខ្លួនឲ្យឆ្ងាយពីកិច្ចព្រមព្រៀងទីក្រុងប៉ារីស»។ លិខិតនោះបានអះអាងថា «ការបន្តនៅក្នុងកិច្ចព្រមព្រៀងនោះនឹងធ្វើឲ្យសហរដ្ឋអាមេរិកប្រឈមនឹងហានិភ័យចម្រូងចម្រាស» ដែលអាចធ្វើឲ្យកិច្ចខិតខំប្រឹងប្រែងរបស់លោក Trump ក្នុងការលុបចោលបទបញ្ញត្តិថាមពលស្អាតក្នុងយុគសម័យលោក Obama មានភាពស្មុគស្មាញ។
ព័ត៌មានអំពីការដកខ្លួនចេញរបស់អាមេរិកពីសន្ធិសញ្ញានេះ ធ្វើឲ្យក្រុមសម្ព័ន្ធមិត្តនៅអឺរ៉ុបមានការព្រួយបារម្ភយ៉ាងខ្លាំង៕
