បណ្តាញព័ត៌មានសហរដ្ឋអាមេរិកបានរាយការណ៍ថា រដ្ឋបាលលោកប្រធានាធិបតី Joe Biden នឹងចាប់ផ្តើមជំរុញឲ្យប្រជាជនអាមេរិកាំងទាំងអស់ដែលបានចាក់វ៉ាក់សាំងកូវីដ១៩បានពេញលេញហើយនោះត្រូវចាក់វ៉ាក់សាំងមួយដូសបន្ថែមទៀត។ ដូសបន្ថែមនោះមានគោលបំណងផ្តល់ការការពារប្រឆាំងវីរុសកូរ៉ូណាប្រភេទដែលតា (delta) ដែលឆ្លងរហ័សដែលបាននាំឲ្យមានរលកឆ្លងថ្មី។
ក្រុមមន្ត្រីសុខាភិបាលសហព័ន្ធត្រូវគេរំពឹងថា នឹងប្រកាសនៅសប្តាហ៍នេះថា ប្រជាជនអាមេរិកាំងត្រូវចាក់មួយដូសថែមទៀតដែលហៅថា ដូសជំរុញ គឺ៨ខែបន្ទាប់ពីចាក់លើកដំបូង។ ប្រជាជនអាមេរិកាំងភាគច្រើនបានចាក់វ៉ាក់សាំង Pfizer ឬ Moderna ចំនួន២ដូស រីឯអ្នកខ្លះទៀតបានចាក់វ៉ាក់សាំង Johnson & Johnson ដែលចាក់មួយដូស។
ពួកមន្ត្រីកាលពីពេលមុនបានច្រានចោលការអំពាវនាវឲ្យចាក់វ៉ាក់សាំងកូវីដ១៩ដូសជំរុញដោយនិយាយថា អ្នកបានចាក់វ៉ាក់សាំងហើយមានការការពារប្រឆាំងវីរុស រួមទាំងវីរុសប្រភេទដែលតាផងដែរ។ ក៏ប៉ុន្តែការសិក្សាថ្មីរបស់ប្រទេសអ៊ីស្រាអែលបង្ហាញថា ប្រសិទ្ធភាពរបស់វ៉ាក់សាំង Pfizer បានធ្លាក់ចុះយ៉ាងខ្លាំងនៅក្នុងចំណោមមនុស្សចាស់ ដែលបានចាក់នៅដើមឆ្នាំនេះ។ ទិន្នន័យនេះបានជំរុញឲ្យប្រទេសអ៊ីស្រាអែលចាប់ផ្តើមចាក់ដូសជំរុញដល់មនុស្សដែលមានអាយុចាប់ពី៥០ឆ្នាំឡើងទៅ។
ដូសជំរុញនេះទំនងជានឹងចាប់ផ្តើមចាក់ក្នុងខែកញ្ញា បន្ទាប់ពីទីភ្នាក់ងារម្ហូបអាហារ និងឱសថ (FDA) យល់ព្រមសំណើរបស់ក្រុមហ៊ុន Pfizer ចាក់វ៉ាក់សាំងដូសទី៣។ មនុស្សដំបូងដែលនឹងទទួលបានដូសជំរុញគឺបុគ្គលិកសុខាភិបាល អ្នកនៅកន្លែងថែទាំមនុស្សចាស់ និងមនុស្សចាស់ៗ គឺក្រុមដែលមានសិទ្ធិចាក់មុនគេក្នុងការចាក់លើកទី១នៅក្នុងសហរដ្ឋអាមេរិក។
បណ្តាញទូរទស្សន៍ CNN រាយការណ៍ថាពួកអ្នកជំនាញរំពឹងថា គោលនយោបាយនេះនឹងអនុវត្តចំពោះអ្នកដែលបានចាក់វ៉ាក់សាំង Johnson & Johnson ដែលចាក់មួយដូស នៅពេលគេមានទិន្នន័យថែមទៀត។
ទីភ្នាក់ងារម្ហូបអាហារ និងឱសថ និងទីភ្នាក់ងារគ្រប់គ្រងនិងបង្ការជំងឺ (CDC)កាលពីសប្តាហ៍មុន បានស្នើការចាក់ដូសទី៣របស់ Pfizer និង Moderna សម្រាប់មនុស្សខ្លះដែលខ្សោយប្រព័ន្ធការពារជំងឺ៕
(ព័ត៌មានខ្លះក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មានAssociated Press។)
