អតីតប្រធានាធិបតីប្រទេស ហៃទី លោក Rene Preval ដែលដឹកនាំប្រទេសក្នុងអំឡុងពេលដែលប្រទេសនេះស្ថិតក្នុងគ្រោះរញ្ជួយដីដ៏អាក្រក់កាលពីឆ្នាំ២០១០នោះ បានទទួលមរណភាពកាលពីថ្ងៃសុក្រ ក្នុងវ័យ ៧៤ឆ្នាំ។
រដ្ឋាភិបាលមិនទាន់បានបញ្ជាក់ពីមូលហេតុនៃការស្លាប់របស់លោកនោះទេ ប៉ុន្តែប្រព័ន្ធផ្សព្វផ្សាយព័ត៌មានក្នុងស្រុកបានដកស្រង់ពាក្យសម្តីរបស់ក្រុមគ្រួសារសពថា លោក Preval បានស្លាប់ដោយសារតែគាំងបេះដូង។
លោក Preval កាន់តំណែងជាប្រធានាធិបតីរយៈពេល២អាណត្តិគឺពីចន្លោះឆ្នាំ១៩៩៦ ដល់ឆ្នាំ២០០១ និងពីចន្លោះឆ្នាំ ២០០៦ ដល់ឆ្នាំ២០១១។ លោកគឺជាប្រធានាធិបតីហៃទីដំបូងដែលបានឈ្នះការបោះឆ្នោតបែបលទ្ធិប្រជាធិបតេយ្យ និងបានកាន់តំណែងពេញមួយអាណត្តិ ហើយក្រោយមកលោកបានផ្ទេរតំណែងប្រកបដោយសន្តិវិធីទៅកាន់អ្នកស្នងតំណែងពីលោក។ លោកក៏ជាប្រធានាធិបតីដំបូងដែលបានកាន់តំណែងចំនួន២អាណត្តិដោយពុំត្រូវបានចាប់ខ្លួន និរទេ្ទសខ្លួន ឬត្រូវបានសម្លាប់ផងដែរ។
នៅក្នុងសារមួយបង្ហោះនៅលើបណ្តាញសង្គម Twitter លោកប្រធានាធិបតី Jovenel Moise បានហៅលោក Preval ថាជា «កូនប្រុសដ៏មានកិត្តិយសរបស់ហៃទី»។
មន្ត្រីកាទូតរបស់អាមេរិកនៅក្នុងប្រទេសហៃទី ក៏បានចូលរួមរំលែកទុក្ខផងដែរ៕
