គណបក្សកាន់អំណាច Bharatiya Janata ដែលហៅកាត់ថា គណបក្ស (BJP) នៅក្នុងប្រទេសឥណ្ឌា ទទួលបានការគាំទ្រយ៉ាងខ្លាំងនៅក្នុងការបោះឆ្នោតថ្នាក់តំបន់ ដែលទទួលបានការគ្រប់គ្រងនៅក្នុងរដ្ឋ Assam និងអាចពង្រីកឥទ្ធិពលរបស់ខ្លួននៅក្នុងតំបន់ផ្សេងទៀតដែលគណបក្សនេះមិនធ្លាប់កាន់កាប់ពីមុនមកថែមទៀតផង។
២ឆ្នាំបន្ទាប់ពីចូលរួមនៅក្នុងការបោះឆ្នោតថ្នាក់ជាតិ ការបោះឆ្នោតដែលបានធ្វើឡើងនៅក្នុងរដ្ឋចំនួន៥ បានបង្កជាផលប៉ះពាល់ដល់គណបក្សប្រឆាំងដែលជាគណបក្សធំបំផុតនៅក្នុងប្រទេសឥណ្ឌា គឺគណបក្សសមាជ។
គណបក្ស BJP បានប្រកាសពីជ័យជម្នះរបស់ខ្លួននៅក្នុងរដ្ឋ Assam កាលពីព្រឹកថ្ងៃព្រហស្បតិ៍ ខណៈដែលការរាប់សន្លឹកឆ្នោតបានបង្ហាញថា គណបក្សនេះបានទទួលជ័យជម្នះលើគណបក្សសមាជ ដែលបានកាន់អំណាចនៅក្នុងរដ្ឋនេះអស់រយៈពេល១៥មកហើយ។ ដំណឹងនេះត្រូវបានទម្លាយឡើងក្រោយពីការចាញ់យ៉ាងអាម៉ាស់មុខនៅក្នុងរដ្ឋចំនួន២ គឺរដ្ឋ Delhi និងរដ្ឋ Bihar កាលពីឆ្នាំមុន ដែលបានចោទសំណួរអំពីការបាត់បង់កម្លាំងចិត្តរបស់គណបក្សជាតិនិយមហិណ្ឌូ ដែលជាចំណុចរបត់មួយនៅក្នុងការបោះឆ្នោតជាតិកាលពីឆ្នាំ២០១៤។
លោកនាយករដ្ឋមន្ត្រីឥណ្ឌា Narendra Modi បានបង្ហោះសារលើបណ្តាញសង្គម Twitter ដោយបានហៅលទ្ធផលនៃការបោះឆ្នោតនៅរដ្ឋ Assam ថាជ័យជម្នះដ៏អស្ចារ្យមួយ និងជាជ័យជម្នះមួយដែលមានលក្ខណៈប្រវត្តិសាស្រ្ត។ នេះគឺជាលើកទីមួយហើយដែលគណបក្ស BJP នឹងកាន់អំណាចនៅក្នុងរដ្ឋ Assam៕
