រទេះភ្លើងផ្ទុកទៅដោយជនភៀសខ្លួននៅទីបញ្ចប់បានទៅដល់ប្រទេសអាល្លឺម៉ង់នៅថ្ងៃសៅរ៍នេះ បន្ទាប់ពីពន្យាពេលអស់ជាច្រើនថ្ងៃនៅឯស្ថានីយ៍រថភ្លើង Keleti ក្នុងរដ្ឋធានីប៊ុយដាប៉េសនៃប្រទេសហុងគ្រី។
របាយការណ៍ពីប្រទេសអាល្លឺម៉ង និងអូទ្រីសបានប្រាប់ឲ្យដឹងថា រថភ្លើងទីមួយដែលដឹកជនភៀសខ្លួនបានចាកចេញពីប្រទេសអូទ្រីសទៅកាន់ប្រទេសអាល្លឺម៉ង់នៅថ្ងៃសៅរ៍នេះទើបតែប៉ុន្មានម៉ោង បន្ទាប់ពីពួកគេបានឡើងជិះរថយន្តក្រុងពីរដ្ឋធានីប៊ុយដាប៉េសទៅកាន់ព្រំដែនប្រទេសអូទ្រីស។
ជនចំណាកស្រុករាប់ពាន់នាក់ឥឡូវនេះកំពុងចូលក្នុងប្រទេសអូទ្រីស។ ការណ៍នេះ ជា ការបំបែកភាពទាល់ច្រក បន្ទាប់ពីភាពមិនប្រាកដប្រជាអស់រយៈពេលជាច្រើនថ្ងៃអំពីការស្វះស្វែងរកឋានៈជាជនភៀសខ្លួននៅខាងក្នុងព្រំដែនរបស់សហភាពអឺរ៉ុប។
ក្រុមមន្រ្តីអូទ្រីសបាននិយាយនៅថ្ងៃសៅរ៍នេះថា ជនភៀសខ្លួនច្រើនពាន់នាក់បានឆ្លងកាត់ចូលទៅក្នុងប្រទេសអូទ្រីសរួចហើយ ដែលនៅទីនោះពួកគេបានត្រូវទទួលស្វាគមន៍ដោយកម្មវិធីជំនួយ ហើយទីកន្លែងសម្រាប់ស្នាក់នៅ។ លោក Wolfgang Mueller មន្រ្តីអូទ្រីសបានប្រាប់ពួកអ្នកយកព័ត៌មានថា ជនភៀសខ្លួន៨០០នាក់ បានជិះរទេះភ្លើងរួចទៅហើយ ដែលដឹកជញ្ជូនពួកគេទៅកាន់រដ្ឋធានីវីយ៉ែន ហើយបន្ទាប់មកធ្វើដំណើរទៅកាន់ប្រទេសអាល្លឺម៉ង់។
អង្គការកាកបាទក្រហមអូទ្រីសបានទទួលជនភៀសខ្លួននៅតំបន់ Hegyeshalom ដែលឆ្លងចូលព្រំដែនអូទ្រីស។
អធិការបតីនៃប្រទេសអូទ្រីសបាននិយាយថា ប្រទេសរបស់លោក និងអាល្លឺម៉ង់នឹងអនុញ្ញាតឲ្យជនចំណាកស្រុកចូលដោយគ្មានការរារាំង។
លោកអធិការបរតី Werner Faymann បានប្រកាសការសម្រេចនៅព្រឹកថ្ងៃសៅរ៍នេះបន្ទាប់ពីការពិភាក្សាជាមួយលោកស្រីអធិការបតី Angela Merkel នៃប្រទេសអាល្លឺម៉ង់មក។
លោក Faymann បានមានប្រសាសន៍ថា ការសម្រេចនេះបណ្តាលមកពីស្ថានភាពគ្រាអាសន្ននៅពេលបច្ចុប្បន្ននេះនៅព្រំដែនប្រទេសហុងគ្រី។
ឥឡូវនេះជនភៀសខ្លួននៅព្រំដែនប្រទេសអូទ្រីស បានចាកចេញពីស្ថានីយរទេះភ្លើង Keleti ក្នុងរដ្ឋធានី Budapest នៃប្រទេសហុងហ្គារីដោយធ្វើដំណើរតាមជើងកាលពីថ្ងៃសុក្របន្ទាប់ពីរង់ចាំមន្រ្តីហុងគ្រីអស់រយៈពេលជាច្រើនថ្ងៃដើម្បីអនុញ្ញាតឲ្យពួកគេធ្វើដំណើរ។
បន្ទាប់មកប្រទេសហុងគ្រីបានបញ្ជូនរថយន្តក្រុងទៅដឹកជនចំណាកស្រុករាប់រយនាក់ដែលដើរពេលលើផ្លូវ Highway នៅពេលដែលពួកគេធ្វើដំណើរឆ្ពោះទៅកាន់ព្រំដែនភាគខាងលិចប្រទេស៕
