មានជនភៀសខ្លួនជាង៦៨លាននាក់នៅជុំវិញពិភពលោក នេះយោងតាមរបាយការណ៍ថ្មីមួយដោយឧត្តមស្នងការទទួលបន្ទុកជនភៀសខ្លួនរបស់អង្គការសហប្រជាជាតិ UNHCR។ លោក Chris Boian (BOY-en) អ្នកនាំពាក្យនិយាយថា ស្ថានភាពនេះមានភាពធ្ងន់ធ្ងរណាស់។ លោក Chris Boian (BOY-en) បានថ្លែងថា៖ «មានមនុស្សម្នាក់ដែលគ្មានទីកន្លែងរស់នៅដោយសារការបង្ខិតបង្ខំឲ្យភៀសខ្លួនចោលផ្ទះសម្បែងរៀងរាល់២វិនាទីនៅពេលឥឡូវនេះ។ មានមនុស្សដែលកំពុងរត់គេចខ្លួនដោយការបង្ខំចិត្ត ពីព្រោះតែពួកគេមិនមានជម្រើស ក៏ប៉ុន្តែ ត្រូវរត់គេចខ្លួន ប្រសិនបើ ពួកគេចង់នៅមានជីវិត»។
លោក Boian (BOY-en) និយាយថា សង្គ្រាម ជម្លោះនិងការធ្វើទុកបុកម្នេញបានធ្វើឲ្យពិភពលោកមានមនុស្សគ្មានទីកន្លែងរស់នៅដ៏ច្រើនបែបនេះ។ លោក Chris Boian (BOY-en) អ្នកនាំពាក្យរបស់ UNHCR បានថ្លែងថា៖ «យើងបានឃើញជម្លោះថ្មីៗកើតមានឡើងនៅក្នុងប្រទេសនានានិងនៅក្នុងតំបន់ផ្សេងៗទៀតជុំវិញពិភពលោកដែលមិនមានកាលពីពេលមុន ហើយ ការណ៍នេះកំពុងធ្វើឲ្យមនុស្សយ៉ាងច្រើនបំផុតគ្មានទីកន្លែងរស់នៅ»។
លោក Boian (BOY-en) និយាយថា គ្មាននរណាម្នាក់ចង់ក្លាយជាជនភៀសខ្លួនទេ។ លោក Boian (BOY-en) បានថ្លែងថា៖ «ពួកជនភៀសខ្លួនជាមនុស្សជាតិដូចជាលោក អ្នកនិងខ្ញុំដែលជួបប្រទះក្នុងកាលៈទេសៈអភ័ព្ទ»។
ក៏ប៉ុន្តែ គោលការណ៍មនុស្សធម៌ដ៏សំខាន់ត្រូវគេបំភ្លេចនៅពេលប្រឈមទៅនឹងវិបត្តិជនភៀសខ្លួន។ លោក Eskinder Negash ជាប្រធាននិងអគ្គនាយកនៃគណៈកម្មាធិការទទួលបន្ទុកជនភៀសខ្លួនសហរដ្ឋអាមេរិកនិយាយថា រដ្ឋាភិបាលជារឿយៗចាត់ទុកវិបត្តិជនភៀសខ្លួនជាបញ្ហាសន្តិសុខជាតិជាជាងបញ្ហាមនុស្សធម៌។ លោក Negash និយាយថា៖ «រដ្ឋាភិបាលទាំងនោះមើលមិនឃើញជនភៀសខ្លួនជាមនុស្សជាតិទេ។ រដ្ឋាភិបាលមើលឃើញថា ជនភៀសខ្លួនជាបន្ទុកមួយដល់សង្គម។រដ្ឋាភិបាលប្រាកដជាកំពុងធ្វើឲ្យជនភៀសខ្លួនភ័យខ្លាច។ នៅពេលដែលលោក បំភ័យនរណាម្នាក់គឺ លោក អ្នកមិនស្វាគមន៍ពួកគេទេ»។
លោក Negash និយាយថា បញ្ហាជនភៀសខ្លួនសម័យទំនើបបានចាប់ផ្តើមប្រហែល៦០ឆ្នាំមុន នៅពេលដែលសហគមន៍អន្តរជាតិបានចាប់ផ្តើមព្យាយាមផ្តល់ជម្រកឲ្យជនភៀសខ្លួន។ លោក Negash ថ្លែងថា៖ «នៅពេលដែលលោក អ្នក រក្សាទុកជនភៀសខ្លួនក្នុងទីកន្លែងមួយក្នុងរយៈពេល២០ឆ្នាំ ៣០ឆ្នាំ ៥០ឆ្នាំ ៦០ឆ្នាំ ការណ៍នេះប្រាកដជាវិបត្តិមនុស្សធម៌ដ៏សំខាន់មួយ»។
ក៏ប៉ុន្តែ លោក Boian (BOY-en) និយាយថា ការណ៍នេះមិនមែនជាបញ្ហាដែលអាចត្រូវដោះស្រាយដោយប្រទេសរៀងៗខ្លួន។លោក Christopher Boian (BOY-en) អ្នកនាំពាក្យ UNHCH បាននិយាយថា៖ «នេះប្រាកដជាបញ្ហាសាកលលោក វាជាបញ្ហាមនុស្សជាតិ។ ហើយ យើងគាំទ្រប្រទេសទាំងអស់ធ្វើការជាមួយគ្នាដើម្បីស្វែងរកដំណោះស្រាយរួមដល់បញ្ហារួមនេះ»។
ប្រទេសអេស្ប៉ាញកាលពីពេលថ្មីៗនេះបានផ្តល់ឧទាហរណ៍ដ៏ល្អមួយពីការដោះស្រាយបញ្ហារួមនេះ។ លោក Christopher Boian (BOY-en) បាននិយាយទៀតថា៖ «ការឆ្លើយតបដែលប្រទេសអេស្ប៉ាញបានបង្ហាញក្នុងរយៈពេលជាងមួយសប្តាហ៍កន្លងមកនេះគឺការអនុញ្ញតកប៉ាល់មួយគ្រឿងនៅក្នុងសមុទ្ររលកធំៗផ្ទុកទៅដោយមនុស្សដែលអស់សង្ឃឹម។ នេះជាឧទាហរណ៍មួយនៃអំពើមនុស្សធម៌ មេត្តាធម៌ ហើយនិងការងារត្រឹមត្រូវដែលត្រូវធ្វើ»។
លោក Christopher Boian (BOY-en) បាននិយាយបន្ថែមថា៖ «ការណ៍នេះមានសារៈសំខាន់ដើម្បីក្លាយជាវិធីសាស្ត្រមួយហើយវាមានសារៈសំខាន់ដើម្បីថែរក្សា គោលការណ៍ដ៏សំខាន់ទាំងនោះជាអាទិភាពនៃផ្នត់គំនិតរបស់យើង ថាតើយើងចង់ឲ្យពិភពលោករបស់យើងមានសភាពបែបណានៅពេលសព្វថ្ងៃនេះ ឬថាតើយើងចង់ធ្វើឲ្យពិភពលោកមានសភាពយ៉ាងដូចម្តេចសម្រាប់កូននិងចៅរបស់យើង តើអ្វីដែលមានសារៈសំខាន់សម្រាប់យើង? ឥឡូវនេះ វាជាពេលវេលាដើម្បីធ្វើការសម្រេច»។
ខណៈដែលបញ្ហាជនភៀសខ្លួនពិតជាវិបត្តិសាកលលោកនោះ លោក Boian (BOY-en) និយាយថា បញ្ហានេះអាចរៀបចំចាត់ចែងបាន។ វិបត្តិនេះតម្រូវឲ្យមានភាពក្លាហាន ភាពជាមេដឹកនាំនិងទស្សនៈដែលគិតអំពីពិភពលោកទាំងមូល៕
ប្រែសម្រួលដោយ ជឹង ប៉ូជីន
