ក្រុមហ៊ុនដែលជ្រើសរើសពលករទៅធ្វើការក្រៅប្រទេសមួយចំនួនមិនបានធ្វើតាមការសន្យាការងារដូចច្បាប់កំណត់ទេ ហើយមន្ត្រីរដ្ឋាភិបាលមិនមានសមត្ថភាពគ្រប់គ្រាន់ក្នុងការធ្វើអធិការកិច្ច ដែលធ្វើឱ្យពលករមួយចំនួនត្រូវចាញ់បោកគេ ឬអ្នកដែលបានទៅធ្វើការក្រៅប្រទេស ហើយរងការធ្វើទុកបុកម្នេញ។ នេះបើតាមការលើកឡើងរបស់អ្នកតំណាងរាស្ត្រ។
លោកស្រី មូរ សុខហួរ អ្នកតំណាងរាស្រ្តគណបក្សសង្គ្រោះជាតិបានបញ្ជាក់ក្នុង កម្មវិធីហេឡូវីអូអេប្រចាំខែស្តីពីបញ្ហាចំណាកស្រុកថាតាមផ្លូវច្បាប់គឺ៖
«ការទទួលខុសត្រូវរបស់ក្រុមហ៊ុនមានតាំងពីពេល ដែលកម្មករសុំមកចុះឈ្មោះ ហើយជួយធ្វើលិខិតស្នាមរហូតទៅដល់នាំទៅព្រលានយន្តហោះ រហូតទៅដល់ ក្រុមហ៊ុននោះត្រូវមានភ្នាក់ងាររបស់ខ្លួននៅឯប្រទេសដែលត្រូវទទួល ហើយនៅប្រទេសដែលត្រូវទទួលក៏មានភ្នាក់ងារដៃគូរបស់ភ្នាក់ងារខ្មែរយើងដែរ ដែលទទួលស្គាល់ដោយរដ្ឋាភិបាលនៃប្រទេសដែលទទួលពលករខ្មែរយើង»។
លោកស្រីបន្ថែមថា ការទទួលខុសត្រូវក្រុមហ៊ុននៅមានបន្តទៀតក្នុងពេលដែលពួកគេកំពុងបំពេញការងារនៅក្រៅប្រទេស៖
«ជាមួយគ្នានោះដែរ រហូតទៅដល់បើសិនជាពលករយើងមានបញ្ហានៅប្រទេសដែលទទួលពលករខ្មែរយើង ក្រុមហ៊ុននោះត្រូវតែដោះស្រាយបញ្ហា ពីព្រោះគេមានភ្នាក់ងាររបស់គេ ហើយត្រូវតែផ្តល់ព័ត៌មានមកក្រសួងពាក់ព័ន្ធ គឺក្រសួងការងារ ឬមួយអង្គទូតរបស់យើងដែលទទួលពលកររបស់យើង។ លើសពីនេះ នៅពេលដែលចប់ហើយ ឬក៏មានការត្រូវធ្វើមាតុភូមិនិវត្តន៍ក្រុមហ៊ុននោះក៏ត្រូវតែធ្វើដំណើរជូនពលករយើងមកដល់ប្រទេសជាតិយើងវិញ»។
លោកស្រីបញ្ជាក់ថា កម្ពុជាមានច្បាប់ អនុក្រិត និងសេចក្តីប្រកាសដែលចែងច្បាស់ពីការទទួលខុសត្រូវរបស់ក្រុមហ៊ុនជ្រើសរើសពលករទៅធ្វើការក្រៅប្រទេស ប៉ុន្តែការអនុវត្តមិនបានល្អ ដោយសារតែសមត្ថភាពមន្ត្រីជំនាញរបស់រាជរដ្ឋាភិបាលក្នុងការឆ្លើយតបនឹងចំនួនពលករខ្មែរ ដែលចាកចេញពីប្រទេសទៅធ្វើការទាំងស្របច្បាប់ និងមិនស្របច្បាប់ គឺមិនមានតុល្យភាពគ្នាទេ ហើយពួកគេមានការខ្វះខាតនៅលើផ្នែកជាច្រើនក្នុងការបំពេញការងារប្រកបដោយប្រសិទ្ធភាព។
លោកស្រីបានបន្ថែមថា៖«មន្ត្រីទាំងនោះត្រូវតែទទួលបានការឧបត្ថម្ភ មានការបណ្តុះបណ្តាល មានប្រាក់ខែឱ្យបានគ្រប់គ្រាន់ មានឆន្ទៈ មានឧត្តមគតិ ហើយនឹងត្រូវតែជៀសបំផុតចូលទៅក្នុងអ្វីដែលជាអំពើពុករលួយ»។
មានពលករខ្មែរជាងមួយលាននាក់បានទៅធ្វើការទាំងស្របច្បាប់ និងមិនស្របច្បាប់នៅប្រទេសថៃ កូរ៉េខាងត្បូង ម៉ាឡេស៊ី និងឥណ្ឌូនេស៊ីជាដើម។
ក្នុងពេលថ្មីៗនេះមានក្រុមហ៊ុនពីរបានបោកប្រាស់ពលករខ្មែរជាង២០០នាក់ ដោយសន្យាថា ផ្តល់ការងារខាងផ្នែកកសិកម្មនៅប្រទេសជប៉ុន ប៉ុន្តែបានរត់ចោល និងបិទទ្វារក្រុមហ៊ុន។
លោក ជា វុត្ថា ដែលបានចាញ់បោកក្រុមហ៊ុនបានលើកឡើងថា កន្លងមកក្រុមហ៊ុននោះបានធ្វើការផ្សព្វផ្សាយតាមបណ្តាញវិទ្យុ និងសារព័ត៌មានផ្សេងៗពីការជ្រើសរើសពលករទៅធ្វើការនៅប្រទេសជប៉ុន ដែលធ្វើឱ្យលោក និងអ្នកដទៃទៀតមានការជឿជាក់ និងដាក់ពាក្យសុំទៅធ្វើការ។ ប៉ុន្តែបែរជាត្រូវចាញ់បោកអស់លុយកាក់ទៅវិញ។
មានអំពើពុករលួយចូលពាក់ព័ន្ធក្នុងក្រុមអធិការកិច្ចរបស់ក្រសួង។ នេះបើតាមការបញ្ជាក់របស់លោកស្រី មូរ សុខហួរ។ លោកស្រីបន្ថែមថា មានក្រុមហ៊ុនខ្លះទទួលបានអាជ្ញាបណ្ណ ហើយប៉ុន្តែមិនព្រមអនុវត្តការងារបែរជាលក់អាជ្ញាបណ្ណបន្តទៅឱ្យក្រុមហ៊ុនផ្សេងទៀត។
«អធិការកិច្ចមិនបានឃើញទេ? ឬមួយមិនចង់ឃើញទេ? គឺមានការលក់អាជ្ញាបណ្ណរហូតដល់មានបិទទ្វារក្រុមហ៊ុនទៀត»។
កន្លងមកក៏មានពលករមួយចំនួនត្រូវថៅកែវាយធ្វើបាបរហូតដល់ស្លាប់ ហើយអ្នកខ្លះទៀតធ្លាក់ខ្លួនពិការ ប៉ុន្តែការដាក់ទោសទណ្ឌលើក្រុមហ៊ុនមិនទាន់មាននៅឡើយ៕
