មន្ត្រីតុលាការខេត្តរតនគិរីផ្តល់ហេតុផលផ្សេងគ្នាលើបណ្តឹងប្រឆាំងនឹងសកម្មភាពចុះធ្វើសេចក្តីរាយការណ៍របស់អ្នកយកព័ត៌មានពីររូបនៃកាសែត The Cambodia Daily នៅស្រុកអូរយ៉ាដាវ។ ព្រះរាជអាជ្ញាថា ការស៊ើបអង្កេតកំពុងដំណើរការ ប៉ុន្តែព្រះរាជអាជ្ញារងថា គ្មានភស្តុតាងសម្រាប់ដាក់បន្ទុកលើបណ្តឹងនោះ។ មន្ត្រីគណៈកម្មាធិការជាតិរៀបចំការបោះឆ្នោតខេត្តថ្លែងថា គណៈកម្មាធិការមិនដែលទទួលបានបណ្តឹងណាមួយនោះឡើយ។
អ្នកយកព័ត៌មានពីររូបរបស់កាសែត The Cambodia Daily រួមមានលោក Zsombor Peterជនជាតិកាណាដា និងលោក អូន ភាព បានរងការចោទប្រកាន់អំពីការ«ញុះញង់និងគំរាមកំហែង» អ្នកបោះឆ្នោត។
កាលពីសប្តាហ៍មុន ពួកគេបានដើរសួរប្រជាពលរដ្ឋនៅស្រុកអូរយ៉ាដាវ ខេត្តរតនគិរីអំពីការបោះឆ្នោតឃុំ-សង្កាត់ថា តើប្រជាពលរដ្ឋក្នុងមូលដ្ឋាននោះ បានបោះឆ្នោតឲ្យគណបក្សមួយណាកាលពីឆ្នាំ២០១២?
បន្ទាប់ពីការសួរនាំនោះ បណ្តឹងមួយពីមេឃុំនិងពលរដ្ឋនៅឃុំប៉ាតេ ត្រូវបានដាក់ទៅកាន់អធិការដ្ឋាននគរបាលស្រុកអូរយ៉ាដាវ កាលពីថ្ងៃទី២២ ខែឧសភា។ ពាក្យបណ្តឹងបានចោទថា សកម្មភាពរបស់អ្នកសារព័ត៌មានទាំង២រូប គឺផ្ទុយពីច្បាប់បោះឆ្នោត ដែលកំណត់ដោយគណៈកម្មាធិការជាតិរៀបចំការបោះឆ្នោត(គ.ជ.ប)។
លោកព្រះរាជអាជ្ញា ជា ពេជ្រ នៃសាលាដំបូងខេត្តរតនគិរី ថ្លែងកាលពីថ្ងៃពុធនេះថា ការស៊ើបអង្កេតកំពុងបន្តលើបណ្តឹង ដែលបានបញ្ជូនមកតុលាការ ព្រោះតាមការបកស្រាយរបស់ គណៈកម្មាធិការរៀបចំការបោះឆ្នោតខេត្ត ហៅកាត់ថា PEC (ប៉ិក) បានឲ្យដឹងថា គណៈកម្មាធិការពុំមានអំណាចស៊ើបអង្កេតលើបណ្តឹងប្រឆាំងនឹងអ្នកកាសែតទាំងពីរនាក់នោះឡើយ។ លោកអះអាងថា មិនមានការច្រានចោលបណ្តឹងប្រឆាំងនឹងអ្នកកាសែតពីរនាក់នោះទេ។
ព្រះរាជអាជ្ញារូបនេះបញ្ជាក់ប្រាប់ VOA ថា៖
«រឿងពាក់ព័ន្ធសកម្មភាពហ្នឹង យើងចង់ឲ្យជំហានដំបូងឲ្យខាង PEC ហ្នឹងដើម្បីត្រួតពិនិត្យមើលថា តើសកម្មភាពហ្នឹងវាពាក់ព័ន្ធនឹងសកម្មភាពសមត្ថកិច្ចរបស់ PEC អត់ ដល់តែឥឡូវខ្ញុំគាត់ពិនិត្យមើលទៅ គាត់ថា សមត្ថកិច្ចហ្នឹង មិនមែនសមត្ថកិច្ចគាត់ទេ ជាសមត្ថកិច្ចរបស់តុលាការ។ យោងលើចំណុចផ្សេងៗ ដែលគាត់បង្ហាញពីវិជ្ជាជីវៈគាត់ពាក់ព័ន្ធនឹងច្បាប់ការបោះឆ្នោត។ អញ្ចឹងក៏បញ្ជូនមកតុលាការ តុលាការសម្រេចចុះបណ្តឹងធ្វើការស៊ើបអង្កេតទៅលើចំណុចហ្នឹង»។
លោកព្រះរាជអាជ្ញា ជា ពេជ្រ សុំមិនផ្តល់សេចក្តីអធិប្បាយបន្ថែម ជុំវិញកិច្ចស៊ើបអង្កេតរបស់តុលាការ។
ប៉ុន្តែលោកព្រះរាជអាជ្ញារង ហាក់ ហួន នៃតុលាការខេត្តរតនគិរីបានផ្តល់សេចក្តីអធិប្បាយដល់កាសែត The Cambodia Daily កាលពីថ្ងៃអង្គារថា តុលាការគ្មានភស្តុតាងគ្រប់គ្រាន់ដើម្បីបន្តរឿងក្តីនេះ។
លោកត្រូវបានដកស្រង់សម្តីក្នុងន័យដើមថា៖
«យើងបានពិនិត្យមើលពាក្យបណ្តឹង ហើយឃើញថា វាមិនត្រឹមត្រូវតាមច្បាប់។ វាជាការពណ៌នាសកម្មភាពនានា ហើយគ្មានភស្តុតាងដើម្បីគាំទ្រពាក្យបណ្តឹងនោះ»។
នៅពេល VOA សួរលោកបន្ថែមថា តើតុលាការពិតជាបានច្រានបណ្តឹងនេះចោល ឬបន្តស៊ើបអង្កេត លោក ហាក់ ហួន ថ្លែងថា ពាក្យបណ្តឹងបានដល់ដៃព្រះរាជអាជ្ញា ហើយពាក្យបណ្តឹងដដែលនោះត្រូវបានបញ្ជូនទៅគណៈកម្មាធិការរៀបចំការបោះឆ្នោតខេត្ត ដែលមកដល់ពេលនេះ លោកមិនដឹងថា គណៈកម្មាធិការសម្រេចយ៉ាងណាចំពោះបណ្តឹងនោះឡើយ។
យ៉ាងណាក៏ដោយ លោក ប៉ែន ឈុនឌី ប្រធានគណៈកម្មាធិការរៀបចំការបោះឆ្នោតខេត្ត បានឲ្យដឹងថា គណៈកម្មាធិការមិនបានទទួលពាក្យបណ្តឹងណាមួយនោះឡើយ។
«អ្នកប្តឹងអត់បានបឹ្តងមក PEC យើង អត់ៗ បានប្តឹងមក PEC យើង អញ្ចឹងអត់មានបណ្តឹងអី នៅខាងបោះឆ្នោត»។
តាមរបាយការណ៍របស់កាសែត The Cambodia Daily ដែលបានចេញផ្សាយកាលពីថ្ងៃពុធ បានឲ្យដឹងថា ក្នុងបណ្តឹងចុះថ្ងៃទី២២ ខែឧសភា មេឃុំប៉ាតេ លោក រម៉ាម យួត មកពីគណបក្ស សម រង្ស៊ី និងអ្នកភូមិឈ្មោះ សេវ បន និងបុរសម្នាក់ទៀតឈ្មោះ រចំ យ៉ិ រស់នៅក្នុងឃុំនេះ បានចោទអ្នកយកព័ត៌មានទាំងពីរនាក់នេះ ពីបទ «ញុះញង់ឲ្យគាំទ្រគណបក្សប្រឆាំង» និងរំលោភសិទ្ធិស្វ័យសម្រេច តាមរយៈការសួរសំណួរថា តើប្រជាពលរដ្ឋបោះឆ្នោតឲ្យគណបក្សណាកាលពីឆ្នាំ ២០១២។
ឃុំប៉ាតេ គឺជាឃុំតែមួយគត់នៅក្នុងខេត្តរតនគិរី ដែលគណបក្សប្រឆាំងបានឈ្នះធ្វើជាមេឃុំកាលពីប្រាំឆ្នាំមុន៕
