ភ្ជាប់​ទៅ​គេហទំព័រ​ទាក់ទង

លោក Radovan Karadzic រិះគន់​សាលក្រម​លើ​ឧក្រិដ្ឋកម្ម​សង្គ្រាម​ថា​មាន​លក្ខណៈ​ឃោរឃៅ


ជន​រង​គ្រោះ​បូស្ន៊ី និង​សមាជិក​គ្រួសារ​របស់​ពួកគេ​ប្រមូល​ផ្តុំ​​នៅ​ខាង​ក្រោ​តុលាការ​ព្រហ្មទណ្ឌ​សម្រាប់​អតីត​ប្រទេស​យូហ្គោស្លាវី មុន​ពេល​ប្រកាស​សាលក្រម​នៅ​ក្នុង​សវនការ​ប្រល័យ​ពូជសាសន៍​មួយ​លើ​លោក Radovan Karadzic ក្នុង​ក្រុង​ឡាអេ ប្រទេស​ហូឡង់ កាលពី​ថ្ងៃទី២៤ ខែមីនា ឆ្នាំ២០១៦។

លោក Radovan Karadzic ​អតីត​មេដឹកនាំ​នៃ​ប្រទេស​បូស្ន៊ី Serb ​កំពុង​សុំ​ឲ្យ​គេ​ដោះ​លែង​ចេញ​ពី​ពន្ធនាគារ​ដែល​បាន​ព្យួរ​ការ​ប្តឹង​ឧទ្ធរណ៍​របស់​លោក​ពី​បទ​ប្រល័យ​ពូជ សាសន៍​ និងអំពើ​ឃោរឃៅ​ផ្សេងៗ​ទៀត​ដោយ​លោក​និយាយ​ថា ​ការ​បន្ត​ឃុំ​ឃាំង​លោក ​កំពុង​បំផ្លាញ​សុខភាព​របស់​លោក។

ខណៈ​ដែល​ថ្លែង​ទៅ​កាន់​ការ​ធ្វើ​សវនការ​ពិសេស​មួយ​នៅ​ឯ​តុលាការ​ឧក្រិដ្ឋ​កម្ម​សង្គ្រាម​យូហ្គោ​ស្លាវី​កាល​ពី​ថ្ងៃ​ពុធ​ក្នុង​ទី​ក្រុង​ឡាអេ ​លោក Karadzic បាន​អះ​អាង​ពី​ភាព​គ្មាន​ទោស​របស់​លោក ​ដោយ​បាន​រិះគន់​សាលក្រម​នោះ​ថា ​«អាក្រក់​ក្រៃ​លែង‍»។

លោក​ក៏​បាន​ត្អូញ​ត្អែរ​អំពី​ស្ថានភាព​ឃុំ​ឃាំង​លោក​ហើយ​បាន​សុំ​កុំព្យូទ័រ​យួរ​ដៃ​ថ្មី​ដើម្បី​ជួយ​លោក​រៀប​ចំ​រឿងក្តី​របស់​លោក។

ចៅក្រម Theodor Meron បាន​ច្រាន​ចោល​សំណើ​របស់​លោក​សុំ​ឲ្យ​តុលាការ​ដោះ​លែង ក៏ប៉ុន្តែ​បាន​និយាយ​ថា ​លោក ​នឹង​បញ្ជា​ឲ្យ​ពួក​មន្រ្តី​ពិនិត្យ​មើល​ស្ថានភាព​នៅ​ឯ​កន្លែង​ឃុំ​ឃាំង​នោះ។

លោក Karadzic បាន​ត្រូវ​តុលាការ​រក​ឃើញ​ថា​មាន​ទោស​កាល​ពី​ខែ​មុនពីការ​ប្រព្រឹត្ត​អំពើ​ឃោរឃៅ​នៅ​ក្នុង​សង្គ្រាម​បូស្ន៊ី​ពី​ឆ្នាំ​១៩៩២​ដល់​ឆ្នាំ​១៩៩៥​ដែល​បាន​ធ្វើ​ឲ្យ​មនុស្ស​១សែន​នាក់​ស្លាប់។ ​លោក​បាន​ត្រូវ​តុលាការ​កាត់​ទោស​ឲ្យ​ជាប់​ពន្ធនាគារ​៤០​ឆ្នាំ។

តុលាការព្រហ្មទណ្ឌ​អន្តរជាតិ​របស់​អង្គការ​សហប្រជាជាតិ​សម្រាប់​អតីត​ប្រទេស​យូហ្គោស្លាវី​បាន​ប្រាប់​ឲ្យ​ដឹង​ថា លោក Karadzic ​ជា​អ្នក​ទទួល​ខុស​ត្រូវ​ចំពោះ​ការ​ប្រល័យ​ពូជសាសន៍​នៅ​ក្នុង​ការ​សម្លាប់​រង្គាល​នៅ​តំបន់ Srebrenicaនៅ​ឆ្នាំ​១៩៩៥ ​នៅ​ពេល​ដែល​កងទ័ព Serb ​បាន​សម្លាប់​បុរស ​និង​កូន​ក្មេង​កាន់​សាសនា​ឥស្លាម​៨ពាន់​នាក់ ​នៅ​ក្នុង​អ្វី​ដែល​ត្រូវ​បាន​គេ​ហៅថា ​ជា​អំពើ​ឃោរឃៅ​បំផុត​នៅ​ក្នុង​តំបន់​អឺរ៉ុបចាប់​តាំង​ពី​សង្គ្រាម​លោក​លើក​ទី២​មក៕

XS
SM
MD
LG