ភ្ជាប់​ទៅ​គេហទំព័រ​ទាក់ទង

កម្មវិធី​វិទ្យុ​«ស្ត្រី​ក្នុង​សម័យ​ខ្មែរ​ក្រហម»​ពិភាក្សា​​បញ្ហា​ជន​រង​គ្រោះ​ក្នុង​របប​ប៉ុល ពត


រូបឯកសារ៖ ជន​រងគ្រោះ​នៃ​របប​ខ្មែរក្រហម​បាន​ចូលរួម​ក្នុង​ពិធីរំឭក​ថ្ងៃ​នៃ​ការ​ចងចាំ និងរំឭក​វិញ្ញាណកន្ខ​របស់​ជន​រងគ្រោះ​នៃ​របប​ខ្មែរក្រហម​នៅ​ថ្ងៃ​ទី២០ ខែ​ឧសភា ឆ្នាំ​២០១៥ នៅ​សារៈមន្ទីរ​ប្រល័យ​ពូជសាសន៍​ជើងឯក។ (រូបថត៖​មជ្ឈមណ្ឌល​ឯកសា​កម្ពុជា)

អង្គ​ការ​សហ​ប្រជាជាតិ​ដើម្បី​លុប​បំបាត់​អំពី​ហិង្សា​លើ​ស្រ្តី​ បាន​ផ្តល់​មូលនិធិ​ដល់​កម្មវិធី​វិទ្យុ​«ស្ត្រី​ក្នុង​សម័យ​ខ្មែរ​ក្រហម»​ឲ្យ​ដំណើរ​ការ​ផ្សាយ​ជា​លើក​ទី​ពីរ​ ក្រោយ​ពី​កម្ម​វិធី​បាន​បញ្ចប់​នៅ​ឆ្នាំ២០១៤។

របប​ខ្មែរ​ក្រហម​មិន​ត្រឹម​តែ​បំបាក់​ស្មារតី​ផ្លូវ​ចិត្ត​ប្រជាជន​ខ្មែរ​រាប់​លាន​នាក់​ប៉ុណ្ណោះ​ទេ ​ប៉ុន្តែ​វា​បាន​បង្កើត​នូវ​ស្រមោល​អតីត​កាល​ដ៏ជូរ​ចត់​ដែល​ប្រជាជន​រស់​រាន​មាន​ជីវិត​រួច​ផុត​ពី​របប​នោះ​មិន​អាច​បំភ្លេច​បាន។ ​ដើម្បី​ជួយ​លើកទឹក​ចិត្ត​ និង​ដោះ​ស្រាយ​បញ្ហារបស់​ជន​រង​គ្រោះ​នៅ​សម័យ​ ប៉ុល ពត អង្គ​ការ​សហ​ប្រជាជាតិ​ដើម្បី​លុប​បំបាត់​អំពី​ហិង្សា​លើ​ស្រ្តី​ បាន​ផ្តល់​មូលនិធិ​ដល់​កម្មវិធី​វិទ្យុ​«ស្ត្រី​ក្នុង​សម័យ​ខ្មែរ​ក្រហម»​ឲ្យ​ដំណើរ​ការ​ផ្សាយ​ជា​លើក​ទី​ពីរ​ ក្រោយ​ពី​កម្ម​វិធី​បាន​បញ្ចប់​នៅ​ឆ្នាំ២០១៤។

សេចក្តី​ប្រកាស​ព័ត៌មាន​របស់​អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា​ដែល​ចេញ​នៅ​ថ្ងៃ​ទី​១៣ ​ខែ​មិថុនា​ ឆ្នាំ​២០១៦ ​បាន​ឲ្យដឹង​ថា ​តាមរយៈ​ជំនួយ​ឧបត្ថម្ភ​ពី​មូលនិធិ​អង្គការ​សហ​ប្រជាជាតិ​ដើម្បីលុប​បំបាត់​អំពី​ហិង្សា​លើ​ស្រ្តី ​កម្មវិធី​វិទ្យុ​ «ស្ត្រី​ក្នុង​សម័យ​ខ្មែរ​ក្រហម»​បាន​ដំណើរ​ការ​ផ្សាយ​របស់​ខ្លួន​ឡើង​វិញ​តាមរយៈ​វិទ្យុ​ស្រ្តី ​FM-102​ នៃ​មណ្ឌល​ព័ត៌មាន​ស្រ្តី​កម្ពុជា។​

ទិដ្ឋភាព​បន្ទប់សវនាការនៃ​សាលាក្តី​ខ្មែរក្រហម។ (អូន ឆេងប៉រ/VOA)
ទិដ្ឋភាព​បន្ទប់សវនាការនៃ​សាលាក្តី​ខ្មែរក្រហម។ (អូន ឆេងប៉រ/VOA)

នៅ​ក្នុង​កិច្ច​សម្ភាសន៍​តាម​ទូរស័ព្ទ​ជាមួយ VOA លោក​ យួន សារ៉ាត់​ ប្រធាន​សម្រប​សម្រួល​គម្រោង​ជួយ​ជន​រង​គ្រោះ​ក្នុង​សម័យ​ខ្មែរក្រហម ​ទាក់​ទង​នឹង​អំពើ​ហិង្សា​ផ្លូវ​ភេទ​ និង​យេនឌ័រ​ បាន​ឲ្យ​ដឹង​ថា៖​

«គោល​បំណង​នៃ​ការ​ផ្សាយ​កម្មវិធី​វិទ្យុ​នេះ​ គឺ​ទីមួយ​ដើម្បី​ពិភាក្សា​ជាមួយ​ប្រិយមិត្ត​អ្នក​ស្តាប់​ក្នុង​ការ​រក​ដំណោះ​ស្រាយ​ទៅ​លើ​ផល​ប៉ះពាល់​ដោយ​អំពើ​ហិង្សា​ផ្លូវភេទ​ និង​យេនឌ័រ​ ក្នុង​របប​ខ្មែរក្រហម​ និង​ក្នុង​ពេល​បច្ចុប្បន្ន។​ ទីពីរ ​ដើម្បី​បង្កើន​ការ​យល់​ដឹង​អំពី​អំពើ​ហិង្សា​ផ្លូវភេទ​ និង​យេនឌ័រ​ និង​បង្កើត​ជា​វេទិកា​ពិភាក្សា​ សម្រាប់​ឲ្យ​អ្នក​រស់​រាន​មាន​ជីវិត​ពីសម័យ​ ប៉ុល ពត ​អាច​បង្ហាញ​គំនិត​ និង​ឲ្យ​សំឡេង​ពួកគាត់​ត្រូវ​បាន​គេ​ឮ​ នៅ​ក្នុង​ដំណើរ​ការ​យុត្តិធម៌​អន្តរកាល ​និង​ទីបី​ ដើម្បី​ផ្សព្វ​ផ្សាយ​ព័ត៌មាន​ស្តីពី​ការ​វិវឌ្ឍថ្មីៗ​នៃ​អំពើ​ហិង្សា​ផ្លូវភេទ ​និង​យេនឌ័រ​នៅ​ក្នុង​បរិបទ​របស់​សាលាក្តី​ខ្មែរក្រហម​ដល់​ភាគី​ពាក់​ព័ន្ធ​ ក៏​ដូចជា​សង្គម​កម្ពុជា​ទាំង​មូល»។​

លោក​បាន​បន្ថែម​ទៀត​ថា​ នៅ​រៀង​រាល់​ការ​ផ្សាយ​ផ្ទាល់​ វាគ្មិន​ធំៗ​ពីរ​ប្រភេទ​នឹង​ត្រូវ​បាន​អញ្ជើញ​មក​ចូល​រួម។​ វាគ្មិន​ទីមួយ​គឺ​សំដៅ​ទៅលើ​អ្នក​ជំនាញ​ ដែល​រួម​មាន​មេធាវី​ ឬ​អ្នក​ធ្វើ​ការ​ផ្នែក​ច្បាប់​ អ្នក​ធ្វើការ​ក្នុង​សង្គម​ស៊ីវិល​ និង​អ្នក​ប្រឹក្សា​យោបល់​ផ្លូវ​ចិត្ត។ ​ចំណែក​វាគ្មិន​ទីពីរ​គឺ​ជា​ជន​រង​គ្រោះ​ផ្ទាល់​តែ​ម្ដង ដែល​រងនូវ​ការ​រំលោភ​បំពាន​ អំពើ​ហិង្សា​ផ្លូវ​ភេទ​ ឬ​ការ​បង្ខំ​ឲ្យ​រៀប​ការ។​

អង្គការ​សង្គម​ស៊ីវិល​ ឬ​ផ្នែក​ពាក់​ព័ន្ធ​ជាមួយ​នឹង​បរិបទ​សាលាក្តី​ធ្វើ​ការ​តស៊ូ​មតិ​ឲ្យ​តុលាការ​ដាក់​បញ្ចូល​បញ្ហា​អំពើ​ហិង្សា​ផ្លូវ​ភេទ​ និង​យេនឌ័រ​នេះ​នៅក្នុង​ដំណើរការ​កាត់​ក្តី តាំង​ពី​ករណី​សំណុំ​រឿង​០០១​មក​ម្ល៉េះ។

នៅ​ឆ្នាំ​២០១១​ដល់​ឆ្នាំ​២០១៤ អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា​ដែល​ហៅ​កាត់​ថា ​អ.វ.ត.ក.បាន​ប្រកាស​ផ្តល់​ជំនួយ​ជា​ផ្លូវ​ការ​ដល់​ការ​បើក​កម្មវិធី​វិទ្យុ​មួយ​ដែល​អប់រំ​អ្នក​ស្តាប់​ឲ្យ​ដឹង​អំពី​ផល​ប៉ះពាល់​ផ្លូវ​ចិត្ត​នៃ​របប​ខ្មែរ​ក្រហម​ និង​បាន​ផ្តល់​ការ​ប្រឹក្សា​យោបល់​តាមរយៈ​ការ​ហៅទូរស័ព្ទ​របស់អ្នក​ធ្លាប់​ឆ្លងកាត់​សម័យ​នោះ។​

ក្នុង​បរិបទ​នៃ​គម្រោង​«ស្ត្រី​ និង​យុត្តិធម៌​អន្តរកាល​ក្នុង​ប្រទេស​កម្ពុជា»​ អង្គការ​ដៃ​គូ​ចំនួនបី​ រួម​មានអង្គ​ការ​ចិត្ត​សង្គម​ អន្តរ​វប្បធម៌​កម្ពុជា​ (TPO) ​អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា​ និង​ក្រុម​អ្នក​ច្បាប់​ការពារ​សិទ្ធិ​កម្ពុជា​ (CDP) បាន​ធ្វើ​ការ​ក្នុង​គម្រោង​នេះ។ ​កម្មវិធី​វិទ្យុ​លើក​ទី​មួយ​បាន​បញ្ចប់​នៅ​ឆ្នាំ​២០១៤។​

ក្រោម​ការ​ដឹក​នាំ​របស់​ ប៉ុល​ ពត ​តាម​លទ្ធិ​ម៉ៅ​និយម​ ខ្មែរ​ក្រហម​បាន​ព្យាយាម​ធ្វើ​ឲ្យប្រទេស​កម្ពុជា​ត្រឡប់​ទៅ​រក​ចំណុច​សូន្យ​វិញ​ ដោយ​បាន​ជម្លៀស​ប្រជាជន​រាប់​លាន​នាក់​ពី​ទី​ក្រុង​ទៅ​ជន​បទ។​ ប៉ុល ពត​ បាន​ផ្តាច់​កម្ពុជា​ពី​ពិភព​លោក​ទាំង​មូល​ ឲ្យរស់នៅ​ឯ​កោ​គ្មាន​ទំនាក់​ទំនង​ជាមួយ​ប្រទេស​ជិត​ខាង​ ព្រម​ទាំង​បាន​លុប​បំបាត់​ចោល​នូវ​រូបិយវត្ថុ​ជាតិ​ ទ្រព្យ​សម្បត្តិ​ឯកជន​ និង​សាសនា​រដ្ឋ​ ដោយ​បាន​បង្កើត​ជា​សមូហភាព​ជនបទ​ជំនួស​វិញ។​

លោក​ស្រី​ អ៊ុយ សុខន​ ជា​អ្នក​រស់រាន​មាន​ជីវិត​ពី​របប​ប្រល័យ​ពូជ​សាសន៍​ បាន​ថ្លែង​ប្រាប់ VOA ​ថា​ នៅ​ខែ​មេសា​ ឆ្នាំ​១៩៧៥​ យោធា​ខ្មែរក្រ​ហម​បាន​ជម្លៀស​អ្នក​ក្រុង​ភ្នំពេញ​ ឲ្យ​ចេញ​ទៅ​តាម​ស្រុក​ខេត្ត​នានា​ ក្នុង​នោះ​ដែរ​ក្រុម​គ្រួសារ​លោក​ស្រី​ក៏​ត្រូវ​បាន​បង្ខំ​ឲ្យ​ធ្វើ​ដំណើរ​ទៅ​រស់នៅ​ខេត្ត​បាត់ដំបង។​

លោក​ស្រី​បន្ត​ទៀត​ថា​ ទាំង​ប្រជាជន​ចាស់​ និង​ប្រជាជន​ថ្មី​ ​បាន​ស្លាប់​បន្ត​បន្ទាប់​គ្នា​គ្មាន​ស្រាកស្រាន្ត​ពី​មួយ​ថ្ងៃទៅ​មួយ​ថ្ងៃ​ ដោយ​សារ​តែ​ភាព​ស្រេក​ឃ្លាន​ និង​ធ្វើ​ការ​ហួស​កម្លាំង។​

«ជីវភាព​រស់នៅ​មាន​ការ​លំបាក​វេទនា​ខ្វះខាត​ខ្លាំង​ណាស់​ ជា​ពិសេស​អ្នក​ដែល​ត្រូវ​បាន​បញ្ជូន​ទៅ​ការដ្ឋាន​មុខ​ គឺ​អត់​ឃ្លាន​ខ្លាំង​ណាស់។ ហើយ​អ្នក​ខ្លះ​ដើរ​ខុស​ពេល​ ខុស​ម៉ោង​ គេ​ចាប់​វាយ កាប់​សម្លាប់​ទៀត​ ហើយ​នៅ​ឆ្នាំ​១៩៧៦​ គេ​បង្អត់​ខ្លាំង​ណាស់​ ​រហូត​ដល់​មាន​ពេល​ខ្លះ​ មាន​អង្ករ​តែ​២​ទៅ​៣​កំប៉ុង​ បបរ​មួយ​ខ្ទះ​ក៏​មាន​ដែរ​ ហើយ​ដួស​ចែក​គ្នា​ហូប​ទៅ»។​

លាយ​ឡំ​ជាមួយ​នឹង​សំឡេង​អួល​ដើម​ក​បន្តិច លោក​ស្រី​មាន​ប្រសាសន៍​ថា​ រហូត​មក​ទល់​នឹង​ពេល​បច្ចុប្បន្ន​នេះ​ អ្វី​ដែល​ជា​ការ​ចងចាំ​ដែល​មិន​អាច​បំភ្លេច​បាន​នៅ​ជំនាន់​ ប៉ុល ពត ​គឺ​ភាព​អត់​ឃ្លាន​ និង​ភាព​ព្រាត់ប្រាស់​ និរាស​ក្រុម​គ្រួសារ។ ​លោក​ស្រី​បាន​បាត់​បង់​ស្វាមី​ និង​កូនស្រី​ពីរ​នាក់។​

រូបឯកសារ៖ សិស្សានុសិស្សខ្មែរ​ឈរ​នៅ​ច្រក​ចូល​សាលសវនាការ​នៃសាលាក្តី​ខ្មែរ​ក្រហម​នៅ​ជាយ​រាជធានី​ភ្នំពេញ​កាល​ពី​ថ្ងៃ​ទី​៦​ ខែ​កុម្ភៈ ឆ្នាំ​២០១៥ នៅ​មុនសាវនាការមួយ​ដើម្បីជំនុំ​ជម្រះ​អតីត​មេដឹកនាំ​ខ្មែរ​ក្រហម ខៀវ សំផន និង​ នួន ជា។ (AP Photo/Heng Sinith)
រូបឯកសារ៖ សិស្សានុសិស្សខ្មែរ​ឈរ​នៅ​ច្រក​ចូល​សាលសវនាការ​នៃសាលាក្តី​ខ្មែរ​ក្រហម​នៅ​ជាយ​រាជធានី​ភ្នំពេញ​កាល​ពី​ថ្ងៃ​ទី​៦​ ខែ​កុម្ភៈ ឆ្នាំ​២០១៥ នៅ​មុនសាវនាការមួយ​ដើម្បីជំនុំ​ជម្រះ​អតីត​មេដឹកនាំ​ខ្មែរ​ក្រហម ខៀវ សំផន និង​ នួន ជា។ (AP Photo/Heng Sinith)

របប​ប្រល័យ​ពូជ​សាសន៍​ ប៉ុល ពត ​ពិត​ជា​បាន​ផ្ដល់​នូវ​មេរៀន​ប្រវត្តិ​សាស្រ្ត​ដ៏​ជូរចត់​ដល់​ប្រជាជាតិ​ខ្មែរ​ទាំងមូល។ ​តួយ៉ាង​ ប្រជាជន​ដែល​ក្រុម​ ប៉ុល ពត សង្ស័យ​ថា​ ជា​បញ្ញ​វ័ន្ត​ ឬ​អ្នក​ចេះ​ដឹង​ នឹង​ត្រូវ​យក​ទៅ​ធ្វើ​ទារុណកម្ម​ ឬ​សម្លាប់​ដោយ​គ្មាន​ត្រា​ប្រណី។​

អតីត​មន្រ្តី​ក្រសួង​វប្បធម៌​ និង​ជា​អ្នក​និពន្ធ​សៀវភៅ​ប្រលោម​លោក​រឿង​«ក្រោម​ដំណក់​ទឹក​ភ្លៀង» លោក​ស្រី អ៊ុំ សុផានី​ បាន​ឲ្យ​ដឹង​ថា ​នៅ​ក្នុង​សម័យ​ ប៉ុល ពត​ លោក​ស្រី​បាន​លួច​កត់​ត្រា​អំពី​ព្រឹត្តិការណ៍​ដែល​កើត​ឡើង​ប្រចាំ​ថ្ងៃ​ជានិច្ច​ ហើយ​នៅ​រយៈពេល​ប៉ុន្មាន​ឆ្នាំ​បន្ទាប់​ពី​របប​នោះ​ដួល​រលំ លោក​ស្រី​ក៏​បាន​ប្រមូល​យក​កំណត់​ហេតុ​ទាំង​នោះ​ មក​ចង​ក្រង​ជា​សៀវភៅ​ដែល​និយាយ​ទាក់ទង​ពី​ស្ថានភាព​រស់នៅ ​និង​បទ​ពិសោធន៍​ជីវិត​នៅ​សម័យ​ខ្មែរ​ក្រហម។​

មិន​ខុស​ប៉ុន្មាន​ពី​ប្រជាជន​ខ្មែរ​ដទៃ លោក​ស្រី​ សុផានី​ ត្រូវ​បាន​ជម្លៀស​ពី​ភ្នំពេញ​ទៅ​ខេត្ត​តាកែវ​ ហើយ​បាន​រៀប​ការ​ និង​រស់នៅ​ជាមួយ​ខាង​ម្តាយ​ឪពុក​ក្មេក។​ ដល់​ត្រង់​ចំណុច​នេះ ​លោក​ស្រី​បន្ថែម​ថា​ ក្នុង​សម័យ​ ប៉ុល ពត​ ទំនាក់​ទំនង​ និង​មនោសញ្ចេតនា​ក្រុម​គ្រួសារ​គឺត្រូវ​បាន​កាត់​ផ្តាច់​ ហាម​ដាច់​ខាត​នូវ​ការ​បញ្ចេញ​ភាព​ស្និទ្ធស្នាល​ ភាព​រីករាយ​ និង​សូម្បី​តែ​ក្តី​អាណិត​អាសូរ។​

«សូម្បី​តែ​ពេល​ដែល​យើង​នៅ​ជិត​គ្រួសារ​ ឬ​បង​ប្អូនគឺ​ភ្នែក​បាន​ត្រឹម​សម្លឹង​គ្នា​ មាត់​មិន​អាច​និយាយ​បាន​ទេ ​ព្រោះ​មាន​គេ​ចាំ​យក​ការណ៍។​ មាន​ម្តង​ធ្លាប់​អង្គុយ​ជិត​គ្នា​ ដល់​ពេល​យប់​គេ​ប្រជុំ​ គេ​និយាយ​ថា​ មាន​អ្នក​ភ្នំពេញ​ខ្លះ​នាំ​យក​វប្បធម៌​អាសអាភាស​មក។​ តាម​ពិត​គេ​មិន​ឲ្យ​អង្គុយ​កៀក​គ្នា​អញ្ចឹង​ទេ»។​

យ៉ាង​ណា​មិញ​ អ្នក​និពន្ធ​រូប​នេះ​បាន​ផ្តល់​សារ​អប់រំ​ជំរុញ និង​លើក​ទឹក​ចិត្ត​ឲ្យកូន​ខ្មែរ​ខិត​ខំ​ប្រឹង​រៀន​សូត្រ​ឲ្យមាន​ចំណេះ​ដឹង​ខ្ពស់​ ចេះ​គិត​គូរ​ឲ្យជ្រៅ​ជ្រះ​ មុននឹង​សម្រេច​ចិត្ត​ធ្វើ​អ្វី​មួយ និង​ចេះ​សាមគ្គី​គ្នា​ឲ្យ​បាន​ល្អ ជា​ធ្លុង​មួយ​ដើម្បី​កុំ​ឲ្យ​ប្រវត្តិសាស្រ្ត​នេះ​កើត​ឡើង​ជា​លើក​ទី​២​ទៀត។​

​បើ​ទោះ​បី​ជា​គ្មាន​អំណះ​អំណាង​ជាក់​លាក់​ណា​មួយ​អាច​បញ្ជាក់​ពី​តួលេខ​ពិត​ប្រាកដ​នៃ​ចំនួន​អ្នក​ស្លាប់​ក៏ដោយ​ ​អ្នក​អង្កេត​ការណ៍​បាន​សន្មត់​ថា​ ប្រជាជន​ជិត​ពីរ​លាន​នាក់​ត្រូវ​បាន​សម្លាប់​ក្នុង​របប​កម្ពុជា​ប្រជាធិបតេយ្យ។​

មក​ទល់​នឹង​សព្វ​ថ្ងៃនេះ​ ​អ្នក​រស់​រាន​មាន​ជីវិត​ពី​សម័យ​ ប៉ុល ពត ភាគ​ច្រើន​ជា​អ្នក​រស់នៅ​តាម​ទី​ជនបទ ​ដែល​ពួក​គាត់​មិន​សូវ​បាន​ដឹង​ព័ត៌មាន​តាមរយៈ​ប្រព័ន្ធ​ផ្សព្វផ្សាយ​ទំនើបៗ​ទេ​ ដូច្នេះ​ហើយ​ការ​ផ្សាយ​កម្មវិធី​តាម​វិទ្យុ​ គឺ​ជា​មធ្យោបាយ​ដ៏​ល្អ​មួយ​សម្រាប់​ចែក​រំលែក​ព័ត៌មាន​ទៅ​ដល់​មហាជន​នៅ​ទូទាំង​ប្រទេស។​

កម្ម​វិធី​ផ្សាយ​បន្ត​ផ្ទាល់​របស់​វិទ្យុ​«ស្ត្រី​ក្នុង​សម័យ​ខ្មែរ​ក្រហម»​ប្រព្រឹត្ត​ទៅ​នៅ​ថ្ងៃ​ច័ន្ទ​ ក្នុង​សប្តាហ៍​ទី២​នៃ​ខែ​នីមួយៗ​ វេលា​ម៉ោង​៤:១០​ ដល់​ម៉ោង​៥ល្ងាច ហើយ​ក៏​មាន​ការ​ចាក់​ផ្សាយ​ឡើង​វិញ​ដែរ​ នៅ​ថ្ងៃ​សៅរ៍​ សប្តាហ៍​ទី៣​ និង​ទី​៤ ​ចាប់​ពី​ម៉ោង​ ១:៣៥​នាទី​ដល់​ម៉ោង២​រសៀល៕

XS
SM
MD
LG