ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ស្ថានទូត​រុស្ស៊ី​ថា​ លោក Putin នឹង​មិន​ចូលរួម​សន្និសីទ​កំពូល G-20 ទេ


រូបឯកសារ៖ ប្រធានាធិបតី​រុស្ស៊ីលោក Vladimir Putin ចូលរួម​ក្នុង​សន្និសីទ​សារព័ត៌មាន​មួយ​នៅ​ទីក្រុង Sochi ប្រទេស​រុស្ស៊ី កាល​ពី​ថ្ងៃទី ៣១ ខែតុលា ឆ្នាំ២០២២។ (Sputnik/Sergey Bobylev/Pool via REUTERS)

ប្រធានាធិបតី​រុស្ស៊ី​លោក Vladimir Putin នឹង​មិន​ចូលរួម​សន្និសីទ​កំពូល​របស់​មេដឹកនាំ​ដែល​មាន​សេដ្ឋកិច្ច​ជឿនលឿន​ទាំង២០ឬ G-20 នៅ​កន្លែង​លំហែ​កាយ​លើ​កោះ​បាលី​ប្រទេស​ឥណ្ឌូណេស៊ី​នៅ​សប្តាហ៍​ក្រោយ​នោះ​ទេ។ នេះ​បើ​តាមស្ថានទូត​រុស្ស៊ី​ក្នុងរដ្ឋធានី​ហ្សាការតា​ដែល​បាន​ប្រាប់​ទីភ្នាក់ងារ​ព័ត៌មាន AFP នៅ​ថ្ងៃ​ព្រហស្បតិ៍​នេះ។

លោក​ស្រី Yulia Tomskaya ប្រធាន​ពិធីការ​របស់​ស្ថានទូត​រុស្ស៊ីក្នុង​ទីក្រុង​ហ្សាការតា​បាន​និយាយ​ថា«ខ្ញុំ​អាច​បញ្ជាក់​ថា លោក​រដ្ឋមន្ត្រី​ការបរទេស Sergei Lavrov នឹង​ដឹកនាំ​គណៈ ប្រតិភូ​រុស្ស៊ី​ចូលរួម​សន្និសីទ​កំពូល G-20នេះ។ កម្មវិធី​របស់​លោក​ប្រធានាធិបតី Putinនៅ​កំពុង​ធ្វើ​នៅ​ឡើយ។ លោក​អាច​ចូលរួម​តាម​ប្រព័ន្ធ​អនឡាញ។

ប្រធានាធិបតីអាមេរិក​លោក Joe Biden ដែល​បាន​ហៅ​លោក Putinថា​ជា«ឧក្រិដ្ឋជន​សង្គ្រាម»បាន​និយាយ​កាលពី​ពេល​មុន​ថា លោក​មិន​បំណង​ជួប​ជាមួយ​លោក Putin នៅឯ​សន្និសីទ​កំពូល​នោះ​ទេ ប្រសិន​បើ​លោក Putin ចូលរួម។

ការសម្រេចចិត្ត​ដែល​កើត​មាន​ឡើង​បន្ទាប់ពី​ការនិយាយ​ស្មានៗអស់​ជា​ច្រើន​ខែ​មក កើត​មាន​ឡើង​នៅពេល​ដែល​រដ្ឋាភិបាល​ក្រុង​មូស្គូ​កំពុង​ចាញ់​យ៉ាង​ធ្ងន់ធ្ងរ​នៅ​ក្នុង​យុទ្ធនាការ​របស់​ខ្លួន​នៅ​ក្នុង​ប្រទេស​អ៊ុយក្រែន ​ហើយ​នឹង​នៅពេល​ដែល​រដ្ឋាភិបាល​ក្រុង​មូស្គូ​ព្យាយាម​គេចចេញពី​ការថ្កោលទោស​របស់​ប្រទេស​លោក​ខាង​លិច​នៅឯ​សន្និសីទ​កំពូល​ពី​ថ្ងៃ​ទី១៥​ដល់​ថ្ងៃ​ទី១៦ ខែ​វិច្ឆិកា​នេះ។

រុស្ស៊ី​កាលពី​ថ្ងៃ​ពុធ​ម្សិលមិញ​បាន​បញ្ជា​ឱ្យ​កងទ័ព​របស់​ខ្លួន​ដកចេញ​ពី​ទីក្រុង Kherson នៅ​ក្នុង​តំបន់​ភាគ​ខាង​ត្បូង​ប្រទេស​អ៊ុយក្រែន​នៅ​ក្នុង​ការដើរ​ថយក្រោយ​មួយ​នៅ​ក្នុង​ការប្រឈម​ការវាយបក​វិញ​របស់​រដ្ឋាភិបាល​ក្រុង​កៀវ។

ប្រភព​ផ្សេង​ទៀត​ដែល​បាន​ដឹង​ពី​ផែនការ​របស់​រុស្ស៊ី​ចំពោះ​សន្និសីទ​កំពូល​នៅ​លើ​កោះ​បាលី​បាន​បញ្ជាក់​ថា លោក Putin នឹង​ត្រូវ​ជំនួស​ដោយ​លោក Lavrov។ ប្រភព​នោះ​បាន​និយាយ​ថា គេ​មិន​ទាន់​ច្បាស់​នៅ​ឡើយ​ថា​តើ​មេដឹកនាំ​រុស្ស៊ី​រូប​នោះ​នឹង​ចូលរួម​សន្និសីទ​តាម​ប្រព័ន្ធ​អនឡាញ​ដែរ​ឬទេ៕

XS
SM
MD
LG