ប្រធានាធិបតីរុស្ស៊ីលោក វ្ល៉ាឌីមៀ ពូទីន នៅថ្ងៃអង្គារនេះបានទៅដល់រដ្ឋធានីតេហេរ៉ង់ប្រទេសអ៊ីរ៉ង់ ជាកន្លែងដែលលោកគ្រោងជួបជាមួយប្រធានាធិបតីតួកគី លោក Recep Tayyip Erdogan និងពិភាក្សាអំពីកិច្ចព្រមព្រៀងការនាំចេញគ្រាប់ធញ្ញជាតិពីកំពង់ផែសមុទ្រខ្មៅរបស់អ៊ុយក្រែន។
អ្នកនាំពាក្យរបស់អង្គការសហប្រជាជាតិ លោក Farhan Haq បានប្រាប់អ្នកយកព័ត៌មានកាលពីថ្ងៃចន្ទថា មានវឌ្ឍនភាពបន្ថែមក្នុងការចរចារវាងរុស្ស៊ី អ៊ុយក្រែន តួកគី និងអង្គការសហប្រជាជាតិ «ប៉ុន្តែគ្មានអ្វីត្រូវប្រកាសនៅដំណាក់កាលនេះទេ»។
លោកបាននិយាយថា លោកអគ្គលេខាធិការអ.ស.ប. Antonio Guterres បានត្រៀមខ្លួនរួចរាល់ហើយក្នុងការធ្វើដំណើរទៅកាន់ទីក្រុង អ៊ីស្តង់ប៊ុល ប្រសិនបើចាំបាច់។
លោក Guterres បាននិយាយតាមទូរស័ព្ទកាលពីថ្ងៃចន្ទជាមួយប្រធានាធិបតីអ៊ុយក្រែនលោក Volodymyr Zelenskyy ពិភាក្សាអំពីការចរចាដែលកំពុងបន្ត។ នេះបើយោងតាមអង្គការសហប្រជាជាតិ។ រដ្ឋមន្ត្រីក្រសួងហិរញ្ញវត្ថុសហរដ្ឋអាមេរិកអ្នកស្រី Janet Yellen បានអំពាវនាវកាលពីថ្ងៃអង្គារឱ្យកំណត់តម្លៃលើការនាំចេញប្រេងរបស់រុស្ស៊ី ខណៈអ្នកស្រីជំរុញឱ្យប្រទេសនានារួបរួមគ្នាក្នុងការប្រឆាំងនឹងសង្គ្រាមរបស់រុស្ស៊ីនៅអ៊ុយក្រែន។ អ្នកស្រីYellen បាននិយាយថា «សមាហរណកម្មសេដ្ឋកិច្ចត្រូវបានរុស្ស៊ីប្រើជាអាវុធ»។ អ្នកស្រីបន្ថែមថា រុស្ស៊ីបានគំរាមកំហែងបង្កវិបត្តិស្បៀងអាហារពិភពលោកដោយបិទកំពង់ផែអ៊ុយក្រែន។
អ្នកស្រី Yellen បាននិយាយថា «ប្រទេសដែលមានការទទួលខុសត្រូវទាំងអស់ត្រូវតែរួបរួមគ្នាប្រឆាំងនឹងសង្រ្គាមនេះហើយធ្វើការរួមគ្នាដើម្បីបញ្ចប់សង្គ្រាមនេះឱ្យបានឆាប់រហ័ស។នោះហើយជាមូលហេតុដែលសហរដ្ឋអាមេរិក និងសម្ព័ន្ធមិត្ត និងដៃគូដែលមានការទទួលខុសត្រូវផ្សេងទៀតកំពុងព្យាយាមកាត់បន្ថយប្រាក់ចំណូលសម្រាប់ធ្វើសង្គ្រាមរបស់រុស្ស៊ី។ ប៉ុន្តែការព្យាយាមនេះមិនបង្កឱ្យមានការប្រែប្រួលចាំបាច់នៅក្នុងទីផ្សារថាមពលពិភពលោកទេ»។
យោធាអ៊ុយក្រែនបាននិយាយនៅថ្ងៃអង្គារនេះថា ការវាយប្រហាររបស់រុស្ស៊ីបានបន្តនៅក្នុងផ្នែកជាច្រើននៃប្រទេស នេះរួមទាំងការបាញ់ផ្លោងនៅទីក្រុង Sumy និងការបំផ្ទុះនៅទីក្រុង Mykolaiv ព្រមទាំងការវាយប្រហារដោយមីស៊ីលនៅទីក្រុងOdesa។
ក្រសួងការពារជាតិរបស់ចក្រភពអង់គ្លេសបាននិយាយថា ប្រទេសរុស្ស៊ី «អាចនឹងបន្តដណ្តើមទឹកដីបន្ថែមទៀត» ខណៈបន្តគោលដៅកាន់កាប់ខេត្ត Donetsk ទាំងមូលនៅក្នុងតំបន់ Donbas ភាគខាងកើតប្រទេសអ៊ុយក្រែន។ ប៉ុន្តែក្រសួងនេះបាននិយាយនៅក្នុងការវាយតម្លៃប្រចាំថ្ងៃនៅថ្ងៃអង្គារនេះថា «អត្រាវាតទីរបស់រុស្ស៊ីទំនងជាមានភាពយឺតយ៉ាវខ្លាំង បើមិនមានការផ្អាកប្រតិបត្តិការដ៏សំខាន់សម្រាប់រៀបចំ និងការកែសម្រួលកម្លាំងឡើងវិញទេនោះ»។
នៅទីក្រុងវ៉ាស៊ីនតោន ភរិយាប្រធានាធិបតីអ៊ុយក្រែនអ្នកស្រី Olena Zelenska គ្រោងជួបជាមួយភរិយាប្រធានាធិបតីសហរដ្ឋអាមេរិកលោកស្រី Jill Biden នៅសេតវិមានគឺមួយថ្ងៃបន្ទាប់ពីជួបជាមួយរដ្ឋមន្ត្រីការបរទេសអាមេរិក លោក Antony Blinken។ សេចក្តីថ្លែងការណ៍ចេញផ្សាយដោយក្រសួងការបរទេសកាលពីយប់ថ្ងៃចន្ទបាននិយាយថា «លោករដ្ឋមន្ត្រី Blinken បានសរសើរការងាររបស់លោកជំទាវ Zelenska ក្នុងការជួយប្រជាជនអ៊ុយក្រែនដែលរងផលប៉ះពាល់ដោយសង្រ្គាម»។
សេចក្តីថ្លែងការណ៍បាននិយាយថា លោកBlinken «បានរំឭកឡើងវិញថា សហរដ្ឋអាមេរិកនឹងបន្តផ្តល់ជំនួយឱ្យអ៊ុយក្រែនឆ្លើយតបទៅនឹងបញ្ហាប្រឈមផ្នែកសេដ្ឋកិច្ច និងមនុស្សធម៌សំខាន់ៗដែលអ៊ុយក្រែនប្រឈម រួមទាំងការគាំទ្រគំនិតផ្តួចផ្តើមសុខភាពផ្លូវចិត្តរបស់ជំទាវ Zelenska សម្រាប់ពលរដ្ឋដែលរងផលប៉ះពាល់ដោយសង្រ្គាម»។ អ្នកនាំពាក្យក្រសួងការបរទេសលោក Ned Price បាននិយាយថា លោក Blinken បានធានានឹងអ្នកស្រី Zelenska នូវការគាំទ្ររបស់សហរដ្ឋអាមេរិកចំពោះអ៊ុយក្រែន និងបានសរសើរអ្នកស្រីចំពោះការងារដែលអ្នកស្រីបានជួយជនស៊ីវិលដែលរងរបួសដោយសង្រ្គាម៕
(ព័ត៌មានខ្លះក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន The Associated Press, Agence France-Presse និង Reuters)
