ការផ្ទេរលោកកឹម សុខា ប្រធានគណបក្សសង្គ្រោះជាតិពីពន្ធនាគារ«ម៣» មកដាក់នៅក្រោមការឃុំខ្លួនក្នុងលំនៅដ្ឋាន មិនបានធ្វើឱ្យភាពតានតឹងនយោបាយធូរស្រាលទេ ហើយមន្ត្រីគណបក្សនិងសកម្មជនសិទ្ធិមនុស្ស បន្តដឹកនាំយុទ្ធនាការអន្តរជាតិទាមទារឱ្យលោកមានសេរីភាពពេញលេញឡើងវិញ។ នេះបើតាមការបញ្ជាក់របស់មន្ត្រីបក្ស និងសកម្មជនសិទ្ធិមនុស្ស។
លោកស្រីមូរ សុខហួរ អនុប្រធានគណបក្សសង្គ្រោះជាតិ បានបញ្ជាក់ថា៖
«ចំពោះយើង ក៏ដូចប្រជាពលរដ្ឋខ្មែរដែរ គឺយើងចង់សូមឱ្យឃើញថាជាការដោះលែង១០០ភាគរយ មិនមែនពីកន្លែងឃុំឃាំងមួយទៅកន្លែងឃុំឃាំងមួយទៀតទេ ដូចជាផ្ទេរពីកន្លែងឃុំឃាំងនៅត្រពាំងផ្លុង មកឃុំឃាំងនៅគេហដ្ឋានរបស់លោកប្រធានកឹម សុខា»។
លោកកឹម សុខា ត្រូវបានដោះលែងកាលពីពេលជិតភ្លឺថ្ងៃច័ន្ទ ក្រោយពីជាប់ពន្ធនាគារជាង១ឆ្នាំ ក្រោមបទចោទប្រកាន់ថាក្បត់ជាតិ ដោយឃុបឃិតជាមួយនឹងបរទេសដើម្បីផ្តួលរំលំរដ្ឋាភិបាលលោកនាយករដ្ឋមន្ត្រីហ៊ុន សែន។
លោកស្រីមូរ សុខហួរ បញ្ជាក់ថា មន្ត្រីគណបក្សនៅតែមិនអាចទំនាក់ទំនងជាមួយនឹងលោកកឹម សុខា បាននៅឡើយទេ។ ប៉ុន្តែពួកគេនៅបន្តធ្វើយុទ្ធនាការអន្តរជាតិ ដើម្បីស្នើឱ្យដោះលែងលោកឱ្យមានសេរីភាពពេញលេញ។
«យើងនៅបន្ត លុះតា្រតែគោលដៅរបស់យើង គឺការបំពេញនូវអ្វីដែលជាឆន្ទៈរបស់ប្រជារាស្ត្រយើងបានសម្រេច គឺការបោះឆ្នោតដោយសេរីត្រឹមត្រូវ និងយុត្តិធម៌ដែលចាប់ផ្តើមពីការដោះលែងជាស្ថាពរដោយឥតលក្ខខណ្ឌជាបន្ទាន់នៃរូបលោកប្រធានកឹម សុខា ដែលជាប្រធានគណបក្សសង្គ្រោះជាតិយើង»។
ការដោះលែងលោកកឹម សុខា កើតឡើងតែក្នុងរយៈពេលបួនថ្ងៃ មុនពេលគណៈកម្មាធិការសិទ្ធិមនុស្សរបស់សភាសហគមន៍អឺរ៉ុប គ្រោងនឹងរៀបចំកិច្ចប្រជុំបន្ទាន់ដើម្បីពិនិត្យមើលករណីរំលោភសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋនៅប្រទេសអ៊ូហ្កង់ដា ភូមា និងកម្ពុជា នៅថ្ងៃព្រហស្បតិ៍ ទី១៣ ខែកញ្ញាខាងមុខនេះ ហើយពួកគេនឹងលើកយកករណីលោកកឹម សុខា មកពិភាក្សាដេញដោល។
កិច្ចប្រជុំនោះជាកិច្ចប្រជុំ ដែលនឹងមិនចេញជាសេចក្តីសម្រេចដែលតម្រូវឱ្យអនុវត្តតាមទេ ប៉ុន្តែអ្នកសង្កេតការណ៍មើលឃើញថា វាជាសារថ្មីមួយទៀតដែលនឹងរំលឹកដល់រដ្ឋាភិបាលរបស់លោកនាយករដ្ឋមន្ត្រីហ៊ុន សែន ពីក្តីបារម្ភដែលបន្តមាននៅសហគមន៍អឺរ៉ុប ជាពិសេសក្នុងពេលដែលសហគមន៍អឺរ៉ុបកំពុងតែពិនិត្យមើលឋានៈពន្ធអនុគ្រោះ «រាល់មុខទំនិញលើកលែងតែអាវុធ» ដែលកម្ពុជាទទួលបានដើម្បីនាំទំនិញចូលទីផ្សាររបស់សហគមន៍អឺរ៉ុប។
លោកយ័ប គឹមទុង ប្រធានសមាគមខ្មែរអាមេរិកាំងដើម្បីសិទ្ធិមនុស្ស និងលទ្ធិប្រជាធិបតេយ្យ បានបញ្ជាក់ប្រាប់វីអូអេថា ការបន្តឃុំខ្លួនលោកកឹម សុខា បង្ហាញថានយោបាយស្រុកខ្មែរនៅតែតានតឹងដដែល។
«ពួកយើងនឹងធ្វើសកម្មភាពតទៅមុខទៀត ពីព្រោះយើងមិនយល់ស្របថា លទ្ធិប្រជាធិបតេយ្យនៅស្រុកខ្មែរសព្វថ្ងៃជាលទ្ធិប្រជាធិបតេយ្យត្រឹមត្រូវ។ បើគិតទៅប្រជាជនយើងអត់មានសេរីភាពទេ មានការគំរាមកំហែងពីរដ្ឋាភិបាលចង់ចាប់អ្នកណាក៏បានដោយគ្រាន់តែចោទក្បត់ជាតិ ហើយការចោទវាធំទូលំទូលាយម្ល៉ោះហើយមានន័យថា រដ្ឋាភិបាលចង់ចាប់អ្នកណាក៏បាន»។
លោកស្រីមីសែល បាឆែលលែត ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បានថ្លែងកាលពីថ្ងៃច័ន្ទស្វាគមន៍ការដោះលែងលោកកឹម សុខា និងស្នើថា«រដ្ឋាភិបាលគួរតែដោះលែង និងទម្លាក់ការចោទប្រកាន់» ទៅលើអ្នកនយោបាយទាំងអស់ អ្នកសារព័ត៌មាន និងប្រជាពលរដ្ឋសាមញ្ញក្នុងពេលកន្លងមកនេះ។
លោកសម រង្ស៊ី សហស្ថាបនិកគណបក្សសង្គ្រោះជាតិ និងជាប្រធានចលនាសង្គ្រោះជាតិ បានប្រាប់ដល់អ្នកគាំទ្រនៅក្នុងប្រទេសកាណាដាថា ការដោះលែងលោកកឹម សុខា នៅមិនទាន់គ្រប់គ្រាន់នៅឡើយទេ។ លោកទាមទារឱ្យមានការប្រគល់សិទ្ធិដល់មន្ត្រីគណបក្សចំនួន១១៨នាក់ ដែលតុលាការបានដាក់ក្នុងបញ្ជីហាមឃាត់មិនឱ្យធ្វើនយោបាយរយៈពេល៥ឆ្នាំ និងបញ្ហាធំៗមួយចំនួនទៀត។
«ជាជំហានបន្តបន្ទាប់ទៀត យើងត្រូវតែទាមទារការអនុញ្ញាតបើកផ្លូវឱ្យសង្គ្រោះជាតិដំណើរការវិញ។ យើងត្រូវតែទាមទារឱ្យថ្នាក់ដឹកនាំគណបក្សសង្គ្រោះជាតិ១១៨នាក់មានសិទ្ធិធ្វើនយោបាយឡើងវិញ។ យើងត្រូវតែទាមទារឱ្យសមាជិកក្រុមប្រឹក្សាជាប់ឆ្នោតពីគណបក្សសង្គ្រោះជាតិ៥០០៧រូប ទទួលតំណែងរបស់ខ្លួនឡើងវិញ។ យើងត្រូវតែទាមទារឱ្យមានការបោះឆ្នោតថ្មីមួយ ដោយមានគណបក្សសង្គ្រោះជាតិចូលរួមហើយនឹងមានការត្រួតពិនិត្យពីសហគមន៍អន្តរជាតិ»។
ក្នុងពេលធ្វើដំណើរជួបជុំអ្នកគាំទ្រនៅសហរដ្ឋអាមេរិក លោកសម រង្ស៊ី ក៏បានស្នើសុំឱ្យពលរដ្ឋខ្មែរ-អាមេរិកាំង បង្កើនការជួបទាក់ទងជាមួយនឹងសមាជិកព្រឹទ្ធសភារបស់ខ្លួន ដើម្បីស្នើសុំឱ្យអនុម័តច្បាប់ចំនួនពីរសម្រាប់ដាក់ទណ្ឌកម្មរដ្ឋាភិបាលកម្ពុជា និងបក្សពួករបស់លោកនាយករដ្ឋមន្ត្រីហ៊ុន សែន។
មានមន្ត្រីនិងសកម្មជនគណបក្សសង្គ្រោះជាតិចំនួន១៥នាក់ផ្សេងទៀតត្រូវបានព្រះមហាក្សត្រលើកលែងទោស និងដោះលែងចេញពីពន្ធនាគារ បន្ទាប់ពីគណបក្សប្រជាជនកម្ពុជាឈ្នះបានអាសនៈសភាទាំងអស់ចំនួន១២៥ ហើយបង្កើតរដ្ឋាភិបាលតែម្នាក់ឯង និងក្នុងពេលដែលអន្តរជាតិគំរាមដាក់ទណ្ឌកម្មពាណិជ្ជកម្ម និងការទូតបន្ថែមទៀត៕
