ក្រុមមេដឹកនាំតួកគីបានសន្យាថា នឹងធ្វើការស៊ើបអង្កេតអំពីការសម្លាប់កាលពីថ្ងៃសៅរ៍នៃមេធាវីលម្អៀងទៅខាងពួក Kurde ល្បីឈ្មោះម្នាក់ និងជាសកម្មជនផងដែរនោះគឺ លោក Tahir Elci។
លោកនាយករដ្ឋមន្ត្រីតួកគី Ahmet Davutoglu បាននិយាយថា គេមិនទាន់ដឹងច្បាស់លាស់ទេថាតើការស្លាប់របស់លោក Elci ជា«ការវាយប្រហារភេរវកម្ម» ឬមួយលោកឋិតនៅកណ្តាលការបាញ់គ្នារវាងពួកឧទ្ទាម Kurde និងកងកម្លាំងសន្តិសុខ។
ក្រុមអ្នកឃើញហេតុការណ៍នៃការវាយប្រហារនេះដោយផ្ទាល់បាននិយាយថា ក្រុមអ្នកវាយប្រហារបានបាញ់ទៅលើលោក Tahir Elci និងពួកសកម្មជនឯទៀតៗនៅពេលពួកគេផ្តល់សេចក្តីថ្លែងការណ៍កាសែតមួយដល់ការប្រមូលផ្តុំមនុស្សមួយនៅក្នុងខេត្ត Diyarbakir ដែលមានអ្នកស្រុកភាគច្រើនជាក្រុមជនអំបូរ Kurde។ ក្រុមអ្នកឃើញហេតុការណ៍ទាំងនេះបានថ្លែងថា ការបាញ់កាំភ្លើងនេះនាំឲ្យមានការបាញ់តគ្នារវាងពួកឧទ្ទាម Kurde និងកងកម្លាំងសន្តិសុខ។
ប្រភពពីមន្ទីរពេទ្យបាននិយាយថា លោក Elci បានស្លាប់ដោយសារមុខរបួសដោយគ្រាប់កាំភ្លើងត្រូវចំក្បាល។ ប៉ូលិសពីរនាក់ក៏បានស្លាប់ដែរនៅក្នុងអំពើហិង្សានោះ។
លោក Elci បានបម្រើការជាប្រធាននៃសមាគមមេធាវីក្នុងខេត្ត Diyarbakir។អាជ្ញាធរតួកគីបានចាប់ខ្លួនលោកកាលពីខែតុលាពីព្រោះលោកបានមានប្រសាសន៍ថា គណបក្សកម្មករ Kurdistan ដែលឋិតនៅក្រៅច្បាប់មិនមែនជាអង្គការភេរវកម្មមួយទេ។ លោកបានត្រូវដោះលែងដោយរង់ចាំការកាត់ក្តី៕
