ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ្នក​តវ៉ា​ជួប​ជុំ​គ្នា​​ជិត​សេតវិមាន​ប្រធានាធិបតី​អាមេរិក​​​ក្នុង​ថ្ងៃ​បោះឆ្នោត​ តែ​ពុំ​​មាន​ចលាចល​ឬ​ហិង្សា​​​ទេ


ក្រុមអ្នកតវ៉ាដែលគាំទ្រចលនា Black Live Matter ដើរហែក្បួននៅតាមដងវិថីក្នុងរដ្ឋធានីវ៉ាស៊ីនតោន នាថ្ងៃបោះឆ្នោត កាលពីថ្ងៃទី៣ ខែវិច្ឆិកា ឆ្នាំ២០២០។

មនុស្ស​ជាង ​១.០០០​ នាក់ កាល​ពី​យប់​ថ្ងៃ​អង្គារ បាន​មក​ជួប​ជុំ​គ្នា​ប្រឆាំង​តវ៉ា​នឹងលោក​ប្រធានាធិបតី​អាមេរិក Donald Trump​ នៅ​ទីលាន​ Black Lives Matter ដែល​មាន​ន័យ​ថា «ជីវិត​ពលរដ្ឋ​ស្បែក​ខ្មៅ​មាន​តម្លៃ» ដែល​នៅ​ក្បែរ​សេតវិមានក្នុង​រដ្ឋធានី​វ៉ាស៊ីនតោន​ ខណៈមនុស្សច្រើន​រយ​នាក់ផ្សេង​ទៀត​ បាន​ដើរ​តាម​ផ្លូវ​នានា​ក្នុងរដ្ឋធានី​សហរដ្ឋ​អាមេរិក​នេះ ដោយ​ពេល​ខ្លះ ​ពួក​គេបាន​បិទចរាចរណ៍​ធ្វើ​ដំណើរ​ និង​បាញ់​កាំជ្រួច​ផង​ដែរ។

មាន​បាតុកម្ម​តូចៗ​ជា​ច្រើន​ផ្សេង​ទៀត​ បាន​កើត​ឡើង​នៅ​តាម​ទី​ក្រុង​នានា​របស់​អាមេរិក ចាប់​ពី​ទីក្រុង Seattle នៅ​ភាគ​ខាង​លិច​ប្រទេស រហូត​ដល់​ទី​ក្រុង​ ​New York​ នៅ​ភាគ​ខាង​កើត តែ​គេ​ពុំ​ឃើញ​មាន​សញ្ញា​នៃ​អំពើ​ហិង្សា​ណា​ខ្លាំង​ ឬ​ភាព​ចលាចលណាមួយ​ នៅ​ប៉ុន្មាន​ម៉ោង​ភ្លាមៗ​ ក្រោយ​ការិយាល័យ​បោះ​ឆ្នោត​ ត្រូវ​បាន​បិទ​នោះ។

ក្រុម​អ្នក​ប្រឆាំងតវ៉ាក្នុង​ទីក្រុង Portland នៅ​ភាគ​ខាង​លិច​ប្រទេស ​បាន​ស្រែក​ពាក្យ​ថា «នេះគឺជាសកម្មភាពនៃ​លទ្ធិ​ប្រជាធិបតេយ្យ»។​ អ្នក​រៀប​ចំ​ការ​ប្រឆាំង​តវ៉ា​ និយាយ​ថា ​ការ​ធ្វើ​បាតុកម្ម​នេះ​មានលក្ខណៈ​សន្តិវិធី​ ហើយ​ថា ទោះ​បី​ជា​លទ្ធផល​នៃ​ការ​បោះ​ឆ្នោត​ចេញ​មក​យ៉ាង​ណា​ក្តី ក៏​ពួកគេ​នឹង​បន្ត​ធ្វើ​បាតុកម្ម​ ដើម្បី​គាំទ្រឲ្យ​មាន​យុត្តិធម៌​ខាង​ជាតិសាសន៍។​ មន្ត្រី​ប៉ូលីស​និយាយ​ថា អ្នក​តវ៉ា​មួយ​ចំនួន​មាន​កាន់​កាំភ្លើង​ក្នុង​ដៃ​ដោយចំហ​ផង​ដែរ។​

​បាតុកម្ម​ក្នុង​រដ្ឋធានី​វ៉ាស៊ីនតោន​មាន​លក្ខណៈ​សន្តិវិធី​ជា​ទូទៅ​ ដោយ​ក្រុម​អ្នក​ចូលរួម​ស្រែក​ពាក្យ​ថា​«នេះ​ជា​ផ្លូវ​របស់​អ្នក​ណា?» គេ​ឆ្លើយ​ថា​«នេះ​ជា​ផ្លូវ​របស់​យើង»។ គេ​បន្តទៀត​ថា ​«ប្រសិន​បើ​យើង​មិន​ទទួល​បាន​យុត្តិធម៌​នោះ​ទេ ​ពួក​គេ​ក៏​មិន​បាន​សន្តិភាព​ដែរ»។​

ម្ចាស់ហាង​ទំនិញ​រាប់រយ​កន្លែងក្នុង​ទីក្រុង​នានារបស់​សហរដ្ឋ​អាមេរិក​បាន​បិទ​អាជីវកម្មរបស់ខ្លួន ដោយមាន​ដាក់​រនាំង​បាំង​ទ្វារ​ និង​បង្អួច​កញ្ចក់​ផង​ដែរ ​ដោយ​ខ្លាច​ក្រែង​មាន​ហេតុការ​ណ៍ហិង្សា​ណា​មួយ អាចកើត​មាន​ឡើង​នៅ​ថ្ងៃ​បោះ​ឆ្នោត ដូច​អ្វីដែល​បាន​កើត​ឡើង ក្រោយ​ការ​ស្លាប់​របស់​បុរស​ស្បែក​ខ្មៅ​លោក George Floyd កាល​ពី​ខែឧសភា​កន្លង​ទៅ។

អភិបាល​រដ្ឋធានី​វ៉ាស៊ីនតោន លោក​ស្រី Muriel Bowser និយាយ​ថា ​មនុស្ស​មួយ​ចំនួន​ចង់​បង្ក​ឲ្យ​មាន​ភាព​ជ្រួល​ច្របល់​ និង​បញ្ហា។ ​អ្នក​ស្រី​ថា ​អ្នក​ស្រី​មិន​ដែល​ឃើញ​មាន​ហាង​ទំនិញ​ជា​ច្រើន​ដូច​នេះ​ត្រូវ​បាន​បិទ​ទ្វា​រ និង​មាន​ដាក់​រនាំង​ក្តាការពារ​ពី​មុខ​ដូច​នេះ​ទេ ដោយ​លោកស្រីថា៖ «នេះ​ជា​រឿង​មួយដែល​ធ្វើ​ឲ្យ​ខ្ញុំ​មិន​សប្បាយ​ចិត្ត»៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-បច្ចុប្បន្ន

XS
SM
MD
LG