លោក រ៉ុង ឈុន មេដឹកនាំសហជីព ដែលកំពុងជាប់ពន្ធនាគារ ពី«បទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» រឿងព្រំដែន ត្រូវបានពេទ្យជំនាញណែនាំឲ្យវះកាត់ភ្នែករបស់លោក ក្រោយភាពស្រវាំងកាន់តែធ្ងន់ធ្ងរ។ នេះបើយោងតាមអ្នកនាំពាក្យរបស់អគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សាវនា។
លោក នុត សាវនា ប្រាប់វីអូអេនៅថ្ងៃអង្គារនេះថាលោក រ៉ុង ឈុន ត្រូវបានបញ្ជូនទៅពិនិត្យភ្នែកនៅមន្ទីរពេទ្យរុស្ស៊ី កាលពីកន្លងទៅ ហើយពេទ្យជំនាញតម្រូវឲ្យវះកាត់ភ្នែកខាងស្តាំរបស់លោកដែលមានបញ្ហា ដើម្បីកុំឲ្យប៉ះពាល់ដល់ភ្នែកខាងឆ្វេង។ លោកបន្ថែមថាក្រុមគ្រូពេទ្យកំពុងរកពេលវេលាសមរម្យ ដើម្បីវះកាត់។
លោកថ្លែងថា៖ «គាត់អត់មានប្រកែកអីទេ យើងជួយសម្រួលដល់ការវះកាត់ ហើយយើងក៏បានស្នើទៅពេទ្យដែរ ដើម្បីដាក់កម្មវិធី ដាក់ពេល ណាត់ពេទ្យ ដើម្បីផ្តល់សេវាវះកាត់ជូនគាត់»។
លោក នុត សាវនា បញ្ជាក់បន្ថែមថានេះគ្រាន់តែជាការព្យាបាលតិចតួច មិនមែនធ្ងន់ធ្ងរនោះទេ ដែលមិនតម្រូវឲ្យជូនដំណឹងដល់ក្រុមគ្រួសារឡើយ។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី ដែលស្និទ្ធនឹងលោក រ៉ុង ឈុន បានថ្លែងថា លោក រ៉ុង ឈុន បានហៅទូរស័ព្ទមកអ្នកស្រី កាលពីថ្ងៃចន្ទ ទី៦ ខែកញ្ញា ហើយប្រាប់ថាពេទ្យបានឲ្យថ្នាំបន្តក់ភ្នែក ដោយលោកប្រាប់ថា«កុំបារម្ភ»អំពីសុខភាពរបស់លោក។ ប៉ុន្តែអ្នកស្រីមិនទាន់មានព័ត៌មានថាលោកនឹងត្រូវវះកាត់ភ្នែកឬយ៉ាងណាឡើយ។
អ្នកស្រីបានឲ្យដឹងថាលោក រ៉ុង ឈុន ឈឺភ្នែកខាងស្តាំ ហើយលោកមានបញ្ហាភ្នែកយូរមកហើយ។ អ្នកស្រីបានទទូចសុំអាជ្ញាធរពាក់ព័ន្ធទាំងអស់អនុញ្ញាតឲ្យលោក រ៉ុង ឈុន បាននៅក្រៅឃុំ ហើយអាចសម្រាកព្យាបាលភ្នែក ដោយមានការមើលថែពីអ្នកជិតស្និទ្ធនឹងលោក។
អ្នកស្រីប្រាប់វីអូអេថា៖ «សូមឲ្យមានការយោគយល់ដល់លោក រ៉ុង ឈុន ដោយ[សារ]គាត់មិនមែន[ប្រព្រឹត្ត]ជាបទល្មើសអ្វីទេ គាត់គ្រាន់តែឈឺឆ្អាលក្នុងបញ្ហាសង្គម…អញ្ចឹងគួរតែគាត់នៅក្រៅឃុំ ដើម្បីឲ្យពួកយើងខ្ញុំដែលជាក្រុមការងារហ្នឹងបានទៅជួយថែទាំសុខភាពគាត់ដែរ»។
គួរបញ្ជាក់ថាកាលពីខែសីហា តុលាការរាជធានីភ្នំពេញបានសម្រេចផ្តន្ទាទោសលោក រ៉ុង ឈុន ឲ្យជាប់ពន្ធនាគារ២ឆ្នាំ ពី«បទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» ពាក់ព័ន្ធនឹងការចុះទៅពិនិត្យមើលព្រំដែន និងការចេញសេចក្តីថ្លែងការណ៍ដ៏ចម្រូងចម្រាសអំពីការបោះបង្គោលព្រំដែនកម្ពុជាវៀតណាមនៅខេត្តត្បូងឃ្មុំ។ អតីតប្រធានសមាគមគ្រូបង្រៀនកម្ពុជាឯករាជ្យរូបនោះត្រូវបានចាប់ខ្លួនកាលពីយប់ថ្ងៃ៣១ ខែកក្កដា ឆ្នាំ២០២០៕
