ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សកម្មជន​​​ស្ម័គ្រចិត្ត​​សង្ឃឹម​ថា ​គម្រោង​ព្រៃឡង់​បៃតង​​របស់​ USAID នឹង​លើក​កម្ពស់​ជីវភាព​របស់​ពួក​គេ


រូបឯកសារ៖ បណ្តាញ​សហគមន៍​ព្រៃឡង់ ដើម្បី​ការ​ការពារសម្បត្តិធម្មជាតិ​របស់​កម្ពុជា។ (រូប​ថត​ផ្តល់​ឲ្យ​ដោយ​បណ្តាញ​សហគមន៍​ព្រៃឡង់)

សកម្មជន​ស្ម័គ្រ​ចិត្ត​ការពារ​ព្រៃឡង់​​​​បាន​​​និយាយ​​​ថា ​​​ពួក​​​គេ​​​មិន​បាន​ទទួល​ការ​​ឧបត្ថម្ភ​គ្រប់គ្រាន់​​​ពី​ស្ថាប័ន​មួយ​ណា​នោះ​ឡើយ ដោយ​ពួកគាត់​ត្រូវ​​ប្រើ​ថវិកា​ផ្ទាល់​ខ្លួន​ដើម្បី​​​ចំណាយ​​​ទៅ​លើ​ការ​ទិញ​ម្ហូប​​​អាហារ​​​ និង​ថ្លៃ​សាំង​បន្តិច​បន្តួច​អំឡុង​ពេល​​​​ចុះ​ល្បាត។

សកម្មជន​ការពារ​ព្រៃឡង់​ដែល​ខិតខំ​ការពារ​ព្រៃទឹក​ភ្លៀងធំ​បំផុត​ចុង​ក្រោយ​នៅ​ក្នុង​តំបន់​មួយ​នេះ​កំពុង​ប្រឈម​នឹង​ការ​ខ្វះខាត​ក្នុង​ការផ្គត់ផ្គង់​ជីវភាព​ប្រចាំ​ថ្ងៃ​នៅ​ក្នុង​គ្រួសារ។ សកម្មជន​ទាំង​នេះ​ចង់​ឲ្យ​មាន​គម្រោង​ជួយ​សម្រួល​បន្ទុក​ជីវភាព​ប្រចាំ​ថ្ងៃ​ដែល​អាច​ឲ្យ​ពួក​គាត់​ការពារ​ព្រៃឡង់​ដោយ​មិន​មាន​ការ​បារម្ភ។

ព្រៃឡង់​លាត​សន្ធឹង​នៅ​ក្នុង​ខេត្ត​ចំនួនបួន​ រួម​មាន​ខេត្ត​ស្ទឹងត្រែង​ ក្រចេះ ​កំពង់ធំ​ និង​ព្រះវិហារ។ ព្រៃ​ទឹក​ភ្លៀង​នៅ​ក្នុង​តំបន់​អាស៊ី​អាគ្នេយ៍​មួយ​នេះ នៅ​តែ​ទទួល​រង​ការ​កាប់​បំផ្លាញ​ពី​អ្នក​កាប់​ព្រៃ​ឈើ​ខុស​ច្បាប់​ឥត​ឈប់ឈរ។

ប្រជាជន​ដែល​រស់​នៅ​ក្នុង​តំបន់​ព្រៃឡង់​ រកស៊ី​ចិញ្ចឹម​ជីវិត​ដោយ​ពឹង​ផ្អែក​លើ​អនុផល​ព្រៃឈើ​ ដូច​ជា​ការ​ដង​ជ័រ​ និង​ការ​ធ្វើ​ស្រែ​ចម្ការ។ ​ដោយ​មាន​ការ​ព្រួយបារម្ភ​ពី​ការ​បាត់បង់​ព្រៃឈើ​និង​ការ​បាត់បង់​ប្រភព​ចំណូល​ ប្រជាជន​មួយ​ចំនួន​បាន​ស្ម័គ្រ​ចិត្ត​ធ្វើ​ជា​សកម្មជន​ការពារ​ព្រៃ​នេះ។​

លោក ផៃ​ ប៊ុនឡេង អាយុ​៥៦​ឆ្នាំ គឺ​ជា​ សកម្មជនព្រៃឡង់ស្ម័គ្រ​ចិត្ត​ម្នាក់​របស់បណ្តាញ​សហគមន៍​ព្រៃឡង់​ (PLCN) ​នៅ​ក្នុង​ខេត្ត​ក្រចេះរយៈពេល​២០​ឆ្នាំ​មក​ហើយ ។

ខណៈ​ដែល​លោក​នៅ​តែ​បន្ត​យាម​ល្បាត​និង​ការពារ​មិន​ឲ្យ​មាន​ការ​កាប់​ឈើ​ខុស​ច្បាប់​ លោក​សង្ឃឹម​ថា​ កសិករ​ដែល​ជា​សកម្មជន​ស្ម័គ្រចិត្ត​ នឹង​ទទួល​បាន​ការ​គាំទ្រ​ពី​រដ្ឋាភិបាល​និង​ជំនួយ​ពី​អង្គការ​នានា​ដើម្បី​ផ្គត់ផ្គង់​គ្រួសារ។

លោក​បាន​ប្រាប់ VOA ថា៖​

«ពេល​ណា​គាត់​ចូល​ព្រៃ​ លួច​បាន​មួយ​រទេះ​ហ្នឹង​ បាន​លុយ​ភ្លាម។ ហើយ​អ្នក​ធ្វើ​ស្រែ​ធ្វើ​ចម្ការ ទី​មួយ​មាន​ផល​យូរ​ ហើយ​ទី​មួយ​ទៀត មិន​មានស្អី​ដែល​គេ​ហៅ​ថា​ ​អាច​គ្រប់គ្រាន់​បាន យើង​ធ្វើ​បាន​តែ​មួយ​ហូបៗ តែ​ការ​ដោះ​ស្រាយ​លុយវា​យឺត​ដែរ។​ អាហ្នឹង​ដែល​ខ្ញុំ​មើល​ឃើញ»។​

ប្រធានបេសកកម្ម ​USAID អ្នក​ស្រី Veena Reddy និង​លោក Matthew Edwardsen ប្រធាន​គម្រោង​ USAID ព្រៃឡង់​បៃតង ថត​រូប​ជាមួយ​សកម្មជន​ស្ម័គ្រ​ចិត្ត​ដែល​មក​ពី​ខេត្ត​ទាំង​បួនបន្ទាប់​ពី​កម្មវិធី​ប្រកាស​ចាប់​ផ្តើម​គម្រោង​ USAID ព្រៃ​ឡង់​បៃតងនៅ​ក្នុង​រាជធានី​ភ្នំពេញ​កាលពី​ថ្ងៃទី​០៣ ខែមេសា ឆ្នាំ២០១៩។ (ទុំ​ ម្លិះ/VOA)
ប្រធានបេសកកម្ម ​USAID អ្នក​ស្រី Veena Reddy និង​លោក Matthew Edwardsen ប្រធាន​គម្រោង​ USAID ព្រៃឡង់​បៃតង ថត​រូប​ជាមួយ​សកម្មជន​ស្ម័គ្រ​ចិត្ត​ដែល​មក​ពី​ខេត្ត​ទាំង​បួនបន្ទាប់​ពី​កម្មវិធី​ប្រកាស​ចាប់​ផ្តើម​គម្រោង​ USAID ព្រៃ​ឡង់​បៃតងនៅ​ក្នុង​រាជធានី​ភ្នំពេញ​កាលពី​ថ្ងៃទី​០៣ ខែមេសា ឆ្នាំ២០១៩។ (ទុំ​ ម្លិះ/VOA)

សកម្មជន​ស្ម័គ្រ​ចិត្ត​ការពារ​ព្រៃឡង់​ នៅ​ក្នុង​ខេត្ត​ទាំង​បួន​ បាន​និយាយ​ថា ​ពួក​គេ​មិន​បាន​ទទួល​ការឧបត្ថម្ភ​គ្រប់គ្រាន់​ពី​ស្ថាប័ន​មួយ​ណា​នោះ​ឡើយ។​ អ្នក​ស្ម័គ្រចិត្ត​ទាំង​នេះ​បន្ថែម​ថា ពួកគាត់​ប្រើ​ថវិកា​ផ្ទាល់​ខ្លួន​ដើម្បី​ចំណាយ​ទៅ​លើ​ការ​ទិញ​ម្ហូប​អាហារ​ និង​ថ្លៃ​សាំង​បន្តិច​បន្តួច​អំឡុងពេលចុះ​ល្បាត។ សកម្មជន​ទាំងនេះ​និយាយ​ថា ការ​ខ្វះខាត​នេះ​ជា​កត្តា​ដែលដាក់​បន្ទុក​បន្ថែម​លើ​កិច្ច​ការពារ​ព្រៃឈើ​របស់​ពួកគាត់។

អ្នក​ស្រី​ ភោគ ប៊ុនហុង អាយុ ៤៤​ឆ្នាំ ដែល​ជា​សកម្មជន​ស្ម័គ្រចិត្ត​នៅ​ខេត្ត​ព្រះវិហារ​ និង​មាន​មុខ​របរ​ជា​អ្នក​ដងជ័រ​ម្នាក់ បាន​និយាយ​ថា​ ​អ្នក​ស្រី​មាន​ការ​អាក់អន់​ស្រពន់​ចិត្ត​ដែល​អ្នក​ស្រី​មិន​ដែល​ទទួល​បាន​ថវិកា​ជួយ​សម្រួល​ក្នុង​កិច្ចការពារ​ព្រៃ​ឈើ។

អ្នក​ស្រី​បាន​និយាយ​ប្រាប់ VOA តាម​ទូរស័ព្ទ​ថា៖

«សម្រាប់​យើង​សហគមន៍​នៅ​អឺ សហគមន៍​ដែល​បង្រ្កាប​បទ​ល្មើស​ផ្ទាល់​រាល់​ថ្ងៃ​នេះ ធ្វើ​ដែរ តែ​[ខ្ញុំ]​មិន​ដែល​បាន​លុយ​ចាក់​សាំង​ មិន​ដែល​បាន​លុយ​អី​ទេ។ [ខ្ញុំ] ចាប់​គោយន្ត​ ចាប់​អី​ព្រោងព្រាត។ ខ្ញុំ​មិន​ដែល​បាន​លុយ​បាន​អី​ទេ។​[ខ្ញុំ]អស់​ទឹក​ចិត្ត​អ្នក​ចូល​រួម។ មិន​មែន​ថា​ទាមទារ​អី​ទេ គ្រាន់តែ​បាន​រួច​ថ្លៃ​សាំង​តែ​ប៉ុណ្ណឹង​បាន​ហើយ»។

អ្នក​ស្រី​បាន​បន្ថែមថា បើ​ទោះ​ជា​ជួប​ការ​លំបាក​ក្នុង​ជីវភាព​គ្រួសារ​និង​ការ​ការពារ​ព្រៃឈើ​យ៉ាងណា​ក៏​ដោយ អ្នក​ស្រី​នឹង​មិន​ឈប់បង្រ្កាប​សកម្មភាព​កាប់​ព្រៃ​ឈើ​ខុស​ច្បាប់​នៅ​ក្នុង​តំបន់​ព្រៃឡង់​នេះ​ឡើយ។ ​

យោង​ទៅ​តាម​បណ្តាញ​សហគមន៍​ការពារ​ព្រៃឡង់ ប្រជាជនជាង​២៥​ម៉ឺន​នាក់​ដែល​ភាគ​ច្រើន​ជា​ជន​ជាតិ​ភាគ​តិច​គួយ​រស់​នៅ​ពឹងផ្អែក​លើ​អនុផល​ធម្មជាតិ​ពី​ព្រៃឡង់ដែល​មាន​ទំហំ​ ៥.០០០​គីឡូម៉ែត្រ​ការេ។ ព្រៃឡង់​ដែល​ស្ថិត​នៅ​ខាង​លិច​ទន្លេ​មេគង្គ​និង​ភាគ​ខាងជើង​នៃ​ប្រទេស​កម្ពុជា​ជា​ជម្រក​ដ៏​សំខាន់​សម្រាប់​សត្វ​ព្រៃនិង​រុក្ខជាតិ​ជាង​៥០០​ប្រភេទ​ផង​ដែរ។

ព្រៃ​ជាង​ ១១.០០០​ហិកតា​ត្រូវ​បាន​គេ​កាប់​ឆ្ការ​ ពី​ក្នុង​ចន្លោះ​ខែ​កញ្ញា ឆ្នាំ​២០១៧ ដល់​ខែ​ឧសភា ​ឆ្នាំ​២០១៨​ ដែល​កា​រកាប់​ឈើ​មាន​ចំនួន​ជាង​២.០០០​លើក​នៅ​ក្នុង​ខេត្ត​ទាំង​បួន។ នេះ​បើយោង​តាម​របាយការណ៍​ត្រួត​ពិនិត្យ​ប្រចាំ​ឆ្នាំចុង​ក្រោយ​បង្អស់​ ​របស់​បណ្តញ​សហគមន៍​ព្រៃឡង់ (PLCN) ដែល​ជា​បណ្តាញ​ការពារ​ព្រៃឡង់​ស្ម័គ្រ​ចិត្ត។

កាល​ពី​សប្តាហ៍​មុន ទីភ្នាក់ងារ​សហរដ្ឋ​អាមេរិក​សម្រាប់​ការ​អភិវឌ្ឍ​អន្តរជាតិ​ប្រចាំ​នៅ​កម្ពុជា ឬ USAID ​បាន​សហការ​ជាមួយ​រាជរដ្ឋាភិបាល​កម្ពុជា​ ដើម្បីបើក​សិក្ខាសាលា​ រៀន​សូត្រ​ស្តី​ពី «ការ​គ្រប់គ្រង​តំបន់​ទេសភាព​ព្រៃឡង់ និង​តំបន់​ជុំវិញ​ប្រកប​ដោយ​ចីរភាព​និង​ប្រសិទ្ធភាព» ។


លោក Matthew Edwardsen ​ប្រធាន​កម្មវិធី​ USAID ព្រៃឡង់​បៃ​តង​មាន​ប្រសាសន៍​ថា ស្ថាប័ន​ពាក់ព័ន្ធត្រូវ​រិះរក​វិធានការ​ការពារ​ព្រៃឡង់​ដែល​មាន​ប្រសិទ្ធិភាព មុន​ពេល​ព្រៃ​នេះ​ត្រូវ​បាន​បំផ្លិចបំផ្លាញ។

លោក​ Matthew ​បាន​ប្រាប់ VOA​ បន្ថែម​ថា៖

«ខ្ញុំ​គិត​ថា​ វា​ជា​ការ​ព្រួយ​បារម្ភ​ដោយសារ​តែ​យើង​មានព្រៃឡង់​តែ​មួយ ហើយ​បើ​សិន​ជា​ការ​កាប់​ឈើ​នៅ​តែ​បន្ត ព្រៃ​នេះ​នឹង​បាត់បង់។ ព្រៃ​នេះ​មិន​មែន​មាន​សារៈសំខាន់​សម្រាប់​តែ​សហគមន៍​ដែល​រស់​នៅ​ជុំវិញ​ព្រៃ​នោះទេ វា​គឺ​ជាទី​ជម្រាល​ទឹក​សម្រាប់​ប្រទេស​កម្ពុជា​ទាំង​មូល។ វា​ហូរ​ចូល​ទៅ​ក្នុង​បឹង​ទន្លេ​សាប ទន្លេ​មេគង្គ»។

គម្រោង​ព្រៃឡង់​បៃតង​របស់​ USAID ដែល​មាន​រយៈពេល​ប្រាំ​ឆ្នាំ​នេះ​ ជា​កិច្ច​បន្ត​ការ​គាំទ្រ​ដ៏​យូរ​អង្វែង​របស់​រដ្ឋាភិបាល​អាមេរិក​និង​រដ្ឋាភិបាល​កម្ពុជា​ ​នឹង​ជំរុញ​ជីវភាព​រស់​នៅ​របស់​ប្រជាពលរដ្ឋ​នៅ​ក្នុង​តំបន់​ទេសភាព​ព្រៃឡង់​ដែល​រួម​មាន​ព្រៃឡង់ ព្រៃរកា និង​ឆែប។​

ទោះជាយ៉ាងណាក៏ដោយរដ្ឋ​លេខា​ធិការ​ក្រសួង​បរិស្ថាន​ លោក​ សៅ សុភាព​ ​បាន​និយាយ​ថា​ គម្រោង​ព្រៃ​ឡង់​បៃ​តង​នេះ​នឹង​ជួយ​ជំរុញ​ការងារ​អភិរក្ស​ដើម្បី​កាត់​បន្ថយ​ការ​កាប់​ព្រៃ​ឈើ​ខុស​ច្បាប់​ និង​លើក​កម្ពស់​ជីវភាព​របស់​សហគមន៍​ទាំង​មូល​នៅ​ក្នុង​ខេត្ត​ទាំង​បួន។

«ខ្ញុំ​សង្ឃឹម​ថា​ តាម​រយៈគម្រោង​នេះ យើង​អាច​កាត់​បន្ថយ​និង​បន្ត​កាត់​បន្ថយ​បទ​ល្មើស​នៅ​ក្នុង​តំបន់ការពារ​ធម្មជាតិ​ ហើយ​ជាពិសេស​តំបន់​ការពារ​ទេស​ភាព​ព្រៃឡង់​បន្ថែម​ទៀត»។​

លោក​ សៅ សុភាព រដ្ឋលេខាធិការ​នៃក្រសួង​បរិស្ថាន​និយាយ​ជាមួយ​សារព័ត៌មាន​បន្ទាប់​ពី​កម្មវិធី​ប្រកាស​ចាប់​ផ្តើម​គម្រោង​ USAID ព្រៃ​ឡង់​បៃតងនៅ​ក្នុង​រាជធានី​ភ្នំពេញ​កាលពី​ថ្ងៃទី​០៣ ខែមេសា ឆ្នាំ២០១៩។ (ទុំ​ ម្លិះ/VOA)
លោក​ សៅ សុភាព រដ្ឋលេខាធិការ​នៃក្រសួង​បរិស្ថាន​និយាយ​ជាមួយ​សារព័ត៌មាន​បន្ទាប់​ពី​កម្មវិធី​ប្រកាស​ចាប់​ផ្តើម​គម្រោង​ USAID ព្រៃ​ឡង់​បៃតងនៅ​ក្នុង​រាជធានី​ភ្នំពេញ​កាលពី​ថ្ងៃទី​០៣ ខែមេសា ឆ្នាំ២០១៩។ (ទុំ​ ម្លិះ/VOA)

សកម្មជន​ស្ម័គ្រ​ចិត្ត​ការពារ​ព្រៃឡង់នៅ​ខេត្ត​ក្រចេះ​ដដែល​គឺ​លោក ផៃ​ ប៊ុនឡេង​ បាន​និយាយ​ប្រាប់​ VOA បន្ថែម​ថា លោក​សប្បាយ​ចិត្ត​បើ​សិន​ជា​គម្រោង​ព្រៃឡង់​បៃតង​របស់ USAID ដែល​មាន​រយៈពេល​៥ឆ្នាំ​នេះ​ អាច​ធ្វើ​ឲ្យសហគមន៍​គ្រប់​មជ្ឈដ្ឋាន​ និង​អាជ្ញាធរ​ចូល​រួម​អភិរក្ស​ទាំង​អស់​គ្នា៖

«យើង​បាន​ទាមទារ​ថា ​ឲ្យ​កសិករ​ស្ម័គ្រ​ចិត្ត​នៅ​ខាងក្រោម​ ចូល​រួម​ដោយ​ពេញ​លេញ​ មិន​មែន​ចាំ​តែ​អ្នក​ចុះ​បញ្ជី សហគមន៍​ការពារ​ សហគមន៍ព្រៃ​ឈើ​នោះ​ទេ គឺ​ពួក​អ្នក​ស្ម័គ្រ​ចិត្ត​ត្រូវ​តែ​មាន​សិទ្ធិ​ចូល​រួម​ឃ្លាំ​មើល​ដើម្បី​ជួយ​ ឲ្យកាន់​ព្រៃ។ ​បើ​អាច​ធ្វើ​អ៊ីចឹង​បាន​ពួក​ខ្ញុំ​សប្បាយ​មែនទែន»។

លោក​បាន​បន្ថែម​ថា​ លោក​មាន​ការ​សប្បាយ​ចិត្ត​ប្រសិន​បើ​គម្រោង​នេះ​អាច​ដោះស្រាយ​បញ្ហា​ជីវភាព​ដែល​ជា​បញ្ហា​ប្រឈម​មួយ​របស់​សហគមន៍៕​

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG