ភ្ជាប់​ទៅ​គេហទំព័រ​ទាក់ទង

ការ​ការពារ​ជំងឺ​គ្រុនចាញ់​ដែល​ស៊ាំ​នឹង​ថ្នាំ​ព្យាបាល​នៅ​អាហ្វ្រិក


លោកស្រី Hillary Clinton ចែកមុងដល់ស្ត្រីម្នាក់ដើម្បីការពារជំងឺគ្រុនចាញ់នៅក្នុងទីក្រុងដាកា។

មាន​ការ​ព្រួយបារម្ភ​ជា​បន្តបន្ទាប់​ថា ​ប្រភេទ​ជំងឺ​គ្រុនចាញ់​ស៊ាំ​នឹង​ថ្នាំ​ព្យាបាល​ ដែល​កំពុង​កើត​មាន​​មាន​នា​ពេល​បច្ចុប្បន្ន​នៅ​អាស៊ីអាគ្នេយ៍​ប្រហែល​រាលដាល​ដល់​ទ្វីប​អាហ្រ្វិក។ ទ្វីប​អាហ្វ្រិក​មាន​ ៨៨​ភាគរយ​នៃ​ករណី​​ជំងឺ​គ្រុនចាញ់ដែល​កើត​មាន​​នៅ​លើ​ពិភពលោក។

ចំនួន​ករណីជំងឺ​គ្រុនចាញ់​ថ្មី​ បាន​ថយ​ចុះ ៤២ភាគរយ​នៅ​អាហ្វ្រិក​ចាប់​តាំង​ពី​ឆ្នាំ​២០០០។

មួយភាគ​ធំ​នៃ​ភាគ​ជោគជ័យ​នេះ​ គឺ​ដោយសារ​មុង​ជ្រលក់​ថ្នាំ និង​ការ​បាញ់ថ្នាំ​មូស​នៅ​ខាង​ក្នុង​ផ្ទះ ក៏ដូចជា​ ការ​ទទួល​បាន​ការ​ព្យាបាល​ប្រកបដោយ​ប្រសិទ្ធភាព។

ប៉ុន្តែកា​រវិវឌ្ឍន៏ទៅ​មុខ​នេះ​អាច​ត្រូវ​បាន​បង្អាក់​ដោយ​ប្រភេទ​ជំងឺ​គ្រុនចាញ់​ស៊ាំ​នឹង​ថ្នាំ​ព្យាបាល បច្ចុប្បន្ន​កំពុង​មាន​នៅ​អាស៊ី។

លោក​ Abdoulaye Djimbe គឺ​ជា​ ប្រធាន​ផ្នែក​រោគ​រាតត្បាត​តាម​ម៉ូលេគុល​ និង​ភាព​ស៊ាំនឹង​ថ្នាំ​ព្យាបាល​នៅ​ឯមជ្ឈមណ្ឌល​ស្រាវជ្រាវ និង​ហ្វឹកហ្វឺន​ផ្នែកជំងឺ​គ្រុនចាញ់​នៅ​ប្រទេស​ម៉ាលី។

លោក​និយាយ​ថា៖ «យើង​គួរ​តែ​មាន​ការ​ព្រួយបារម្ភ។ ដោយសារ​តែ​មាន​ទំនាក់ទំនង​រវាង​គ្នាជា​ញឹកញយ​រវាង​ទ្វីប​អាស៊ី និង​អាហ្វ្រិក គឺ​អ្នក​ធ្វើការ​ហោះហើរ​ដោយ​ផ្ទាល់​សឹង​តែ​គ្រប់​ទី​កន្លែង​ទៅ​កាន់​ផ្នែក​មួយ​ចំនួន​នៃ​ទ្វីប​អាហ្រ្វិក។ ដូច​នេះ ​ការ​នាំ​មក​នូវ​បារ៉ាសិត​ដែល​ស៊ាំ​នឹង​ថ្នាំ​ព្យាបាល នា​ពេល​បច្ចុប្បន្ន​មានហានិភ័យ​ខ្ពស់​»។​

នៅ​ក្នុង​ទសវត្សរ៍​ឆ្នាំ ១៩៧០ ប្រជាជន​អាហ្វ្រិក​រាប់លាន​បាន​ឆ្លង​ជំងឺ​គ្រុនចាញ់​ដែល​ស៊ាំ​នឹង​ថ្នាំ​ព្យាបាល​នាំ​មុខ​គេ​នា​ពេល​នោះ គឺ​ថ្នាំ Chloroquine។ ​ជា​លទ្ធផល វា​មាន​ផលប៉ះពាល់​យ៉ាង​ខ្លាំង​នៅ​ទ្វីប​អាហ្រ្វិក។ ​

មក​ដល់ឆ្នាំ​មុន ប្រទេស​ចំនួន​ប្រាំ​នៅ​តំបន់​អាស៊ីអាគ្នេយ៍​បានរាយការណ៍​ពី​ករណី​ជំងឺ​គ្រុនចាញ់​ស៊ាំ​នឹង​ការ​ព្យាបាល​ចុង​ក្រោយ​បង្អស់ ដែល​ជា​ការ​ព្យាបាល​គួបផ្សំ​គ្នា​ផ្អែក​លើ​ថ្នាំ​ Artemisinin ឬ ACT។​

លោក Eunice Misiani ជា​អ្នកចូលរួម​ក្នុង​កម្មវិធី​គ្រប់គ្រង​ជំងឺ​គ្រុនចាញ់​ថ្នាក់​ជាតិ​នៅ​អាហ្រ្វិក​ខាងត្បូង។

«យើង​ត្រូវ​មាន​កា​រប្រុងប្រយ័ត្នដើម្បីធានា​ថា អ្វី​ដែល​កើត​មាន​ជាមួយ​នឹង​ការ​ប្រឆាំង​នឹង​ថ្នាំ Chloroquine មិន​អាច​មក​ដល់​ទី​នេះ (ទ្វីប​អាហ្វ្រិក)។ យើង​ត្រូវ​តែ​ធានា​ថា យើង​មាន​ការ​ធ្វើ​តេស្ត​ស្តង់ដារ​ប្រសិទ្ធភាព​ជា​ទៀងទាត់​ រាល់​ពីរទៅ​បី​ឆ្នាំ​ម្តង»។

ឱសថ​ក្លែងក្លាយ​នៅ​តែ​ជា​បញ្ហា​ចម្បង​មួយ​នៅ​អាហ្រ្វិក។ ទោះបី​ជា​មាន​តម្លៃ​ទាប​ក៏​ពិត​មែន ឱសថ​ក្លែងក្លាយ​តែងតែ​មាន​កម្រិត​ទាប​នៃ​សារធាតុ​ថ្នាំ​សកម្ម​ ដែល​អាច​បង្ក​ឲ្យ​មាន​ភាព​ស៊ាំ​នឹង​ថ្នាំ​នៅ​ក្នុង​រយៈពេល​មួយ។

ការ​ជំរុញ​ឲ្យ​ប្រជាជន​បំពេញ​នូវ​របប​ព្យាបាល​ពេញលេញ​ក៏​មាន​ការ​លំបាក​ផង​ដែរ។ អ្នកជំងឺ​មួយ​ចំនួន​បាន​ឈប់​លេបថ្នាំ​បន្ទាប់​ពី​រយៈពេល​មួយ​ថ្ងៃ ឬ​ពីរ​ថ្ងៃ នៅ​ពេល​ដែល​ពួកគេ​មាន​អារម្មណ៍​ថា ធូរ​ស្បើយ។

លោក Hans Rietveld គឺ​ជា​នាយក​ផ្នែក​ការ​ឈានចូល​ទី​ផ្សារ​ក្រុមហ៊ុន​ឱសថ Norvartis Malaria Initiative មក​ពី​ប្រទេស​ស្វីស។ លោក​បាន​និយាយ​ថា ​គ្រូពេទ្យ​នៅ​អាហ្វ្រិក​តែងតែផ្តល់​ថ្នាំ​ប្រឆាំង​ជំងឺ​គ្រុនចាញ់​ច្រើន​ជ្រុល។

«ជា​ដំបូង​ ចូរ​ធានា​ថា អ្នកជំងឺ​ទទួល​បាន​ការ​ធ្វើ​រោគវិនិច្ឆ័យ​គ្រប់គ្រាន់​ មុន​ពេល​ចាប់​ផ្តើម​ការព្យាបាល។ ដូចនេះ អ្នក​ត្រូវ​មាន​ភាព​ច្បាស់​ថា អ្នកជំងឺ​ពិត​ជា​ មាន​ជំងឺ​គ្រុនចាញ់​មែន ហើយ​ពេល​ហ្នឹងត្រូវ​ផ្តល់់តែថ្នាំ​ព្យាបាល​ឲ្យប៉ុណ្ណោះ​។ ហើយ​នោះ​ជា​បញ្ហាមួយ​នៅ​ក្នុង​បណ្តា​ប្រទេស​មួយ​ចំនួន​ ទី​ដែល​ការ​ធ្វើ​រោគវិនិច្ឆ័យ​មុន​ពេល​ធ្វើការ​ព្យាបាល​មិន​ទាន់​ត្រូវ​បាន​ដាក់​បញ្ចូល​នៅ​ក្នុង​ការ​អនុវត្ត​ផ្នែក​វេជ្ជសាស្រ្ត​ជា​ធម្មតា​នៅ​ឡើយ»។

ការ​សិក្សា​នានា​បង្ហាញ​ថា មាន​ប្រហែល ៤០ ទៅ​៦០​ករណី ដែលត្រូវ​បាន​ព្យាបាល​ក្នុង​ទម្រង់​ជា​ជំងឺ​គ្រុនចាញ់​នៅអាហ្វ្រិក តាម​ពិត​ទៅ​មិនមែន​ជា​ជំងឺ​គ្រុនចាញ់​ទេ។

លោក Rietveld បាន​និយាយ​ថា ការ​ពង្រី​ក​ការប្រើប្រាស់​តេស្ត​រោគវិនិច្ឆ័យ​ឆាប់​រហ័ស​មួយ​នៅ​អាហ្វ្រិក​ អាច​ទប់ស្កាត់ការ​ព្យាបាល​លើស​កម្រិត។ ការ​ធ្វើ​តេស្ត​នៅ​ផ្ទះ​ផ្ទាល់​អាច​ធ្វើ​រោគវិនិច្ឆ័យ​លើ​ជំងឺ​គ្រុនចាញ់​ តាមរយៈ​ការ​ជួស​ឈាម​តាម​ម្រាមដៃ។

លោក Novartis និយាយ​ថា ឥឡូវ​នេះ​មាន​ឱសថ​ដែល​មាន​សក្តានុពល​ចំនួន​ពីរ។ ហើយ​ថ្នាំ​ទាំងពីរ​នេះ​ព្យាបាល​ជំងឺ​គ្រុនចាញ់ខុសគ្នា​ពី​ការ​ព្យាបាល​តាម​បែប ACT។

ប៉ុន្តែ​ការ​នាំ​ឲ្យ​ឱសថ​ថ្មី​ទាំងនេះ​ចូល​ទៅ​ក្នុង​ទីផ្សារនឹង​ត្រូវ​ការ​រយៈពេលយ៉ាងតិចពីរ​ឬបី​ឆ្នាំ​ខាង​មុខ​ទៀត៕

ប្រែសម្រួលដោយ ស៊ូ រ៉ូហ្សានិច

XS
SM
MD
LG