ទីភ្នាក់ងារភូគព្ភសាស្ត្រសហរដ្ឋអាមេរិក (USGS) បានបញ្ជាក់ថា គ្រោះរញ្ជួយដីដ៏ខ្លាំងក្លាមួយកម្រិត ៧ រិចទ័របានកើតឡើងកាលពីថ្ងៃសុក្រនៅក្នុងជម្រៅដ៏ជ្រៅនៅក្នុងមហាសមុទ្រនៃកោះ Java របស់ប្រទេសឥណ្ឌូណេស៊ី ហើយបើទោះបីជាវាធ្វើឱ្យតំបន់ជាច្រើននៅទូទាំងប្រទេសរង្គើក៏ដោយ ក៏មិនទាន់មានរបាយការណ៍ភ្លាមៗណាមួយថាមានការខូចខាតឬក៏ករណីស្លាប់និងរងរបួសណាមួយនៅឡើយទេ។
ទីភ្នាក់ងារភូគព្ភសាស្ត្រសហរដ្ឋអាមេរិកបានបន្ថែមថា ការរញ្ជួយដីនេះបានកើតឡើងនៅម៉ោង ៤ និង ៥៥ នាទីល្ងាច ម៉ោងនៅក្នុងស្រុក ដោយចំណុចកណ្ដាលនៃគ្រោះរញ្ជួយដីនេះត្រូវបានគេរកឃើញដំបូងថាមានជម្រៅ ៥៩៤ គីឡូម៉ែត្រ និងមានចម្ងាយ ៩៦,៥ គីឡូម៉ែត្រនៅភាគខាងជើងក្រុង Tuban នៃប្រទេសឥណ្ឌូណេស៊ី និងមានចម្ងាយប្រមាណ ១៦០ គីឡូម៉ែត្រនៅចន្លោះភាគខាងជើងនិងភាគពាយ័ព្យនៃក្រុង Surabaya ដែលជាទីក្រុងមានប្រជាជនរស់នៅច្រើនជាងគេបំផុតទីពីររបស់ប្រទេសឥណ្ឌូណេស៊ី។
ទីភ្នាក់ងារឧតុនិយម អាកាសធាតុ និងរូបសាស្ត្រផែនដីរបស់ប្រទេសឥណ្ឌូណេស៊ីបានបញ្ជាក់ថា មិនមានគ្រោះថ្នាក់នៃរលកយក្សស៊ូណាមិទេ។
សេចក្ដីរាយការណ៍នានាពីបណ្ដាញសង្គមអនឡាញបានបង្ហាញថា បើទោះបីជាមិនមានការខូចខាតធ្ងន់ធ្ងរណាមួយត្រូវបានរាយការណ៍ក៏ដោយ ក៏ការរញ្ជួយដីនេះបានបណ្ដាលឱ្យមានការជ្រួលច្របល់បន្តិចបន្តួចនៅក្នុងតំបន់ដែលមានមនុស្សច្រើននៅផ្នែកកណ្ដាលនៃកោះ Java ទីក្រុង Yogyakarta និងតំបន់រមណីយដ្ឋានកោះ Bali ដែលនៅទីនោះការរញ្ជួយដីនេះបានបណ្ដាលឱ្យអគារនានារង្គើ។ រូបភាពនិងវីដេអូអំពីការរញ្ជួយដីនេះដែលត្រូវបានគេបង្ហោះបានបង្ហាញអំពីមនុស្សជម្លៀសចេញពីអគារនានានិងប្រមូលផ្ដុំគ្នានៅតាមផ្លូវ។
ប្រទេសឥណ្ឌូណេស៊ីធ្លាប់ជួបប្រទះការរញ្ជួយដីជាញឹកញាប់ដោយសារតែប្រទេសនេះស្ថិតនៅចំ «ក្រវាត់ផ្លូវភ្នំភ្លើង» នៃតំបន់ប៉ាស៊ីហ្វិក ដែលលាតសន្ធឹងពីប្រទេសជប៉ុនកាត់តាមតំបន់អាស៊ីអាគ្នេយ៍និងអាងមហាសមុទ្រប៉ាស៊ីហ្វិក។
កាលពីខែវិច្ឆិកាឆ្នាំមុន គ្រោះរញ្ជួយដីកម្រិត ៥,៦ រិចទ័របានកើតឡើងនៅជិតកោះ Java ដោយបានសម្លាប់មនុស្សរាប់រយនាក់។
កាលពីខែធ្នូ ឆ្នាំ ២០០៤ គ្រោះរញ្ជួយដីកម្រិត ៩,១ រិចទ័របានកើតឡើងនៅក្នុងសមុទ្រនៃកោះ Sumatra ដោយបង្កឱ្យមានរលកយក្សស៊ូណាមិដែលបានសម្លាប់មនុស្សជិត ២៣០.០០០ នាក់នៅក្នុងតំបន់៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់ពីទីភ្នាក់ងារព័ត៌មាន AP ទីភ្នាក់ងារព័ត៌មាន Reuters និងទីភ្នាក់ងារព័ត៌មាន AFP។
ប្រែសម្រួលដោយលោក ឈឹម សុមេធ
