សម្តេចប៉ាប Francis មានព្រះបន្ទូលនៅថ្ងៃចន្ទម្សិលមិញថា ទំនាក់ទំនងរវាងបុរីវ៉ាទីកង់ជាមួយប្រទេសចិនកំពុងមានដំណើរការល្អប្រសើរ ប៉ុន្តែមានការងារមួយចំនួនទៀតដែលត្រូវធ្វើ ដើម្បីបង្ហាញរដ្ឋាភិបាលក្រុងប៉េកាំងថា ព្រះវិហារគ្រិស្តសាសនានេះ មិនចំណុះនឹងប្រទេសមហាអំណាចណាមួយទេ។ នេះបើតាមការផ្សាយរបស់ទីភ្នាក់ងារសារព័ត៌មាន AP។
សម្តេចប៉ាប Francis បានមានព្រះបន្ទូលពីចំណាត់ការរបស់បុរីវ៉ាទីកង់ជាមួយប្រទេសចិន នៅក្នុងអំឡុងពេលនៃសន្និសីទសារព័ត៌មានមួយ ក្នុងដំណើរយាងត្រឡប់ទៅកាន់បុរីវ៉ាទីកង់វិញពីប្រទេសម៉ុងហ្គោលី ដែលនៅទីនោះបញ្ហាវាយបង្ក្រាបរបស់រដ្ឋាភិបាលក្រុងប៉េកាំងទៅលើសាសនាជនជាតិភាគតិច បានគ្របដណ្ដប់លើព្រះរាជដំណើរទស្សនកិច្ចជាប្រវត្តិសាស្ត្ររបស់ព្រះអង្គ ទៅកាន់ប្រជាជាតិមួយ ដែលមានការគោរពព្រះពុទ្ធសាសនាភាគច្រើននោះ។
សម្តេចប៉ាបបានផ្ញើសេចក្តីជូនពរស្វាគមន៍ដល់ប្រធានាធិបតីចិន លោក Xi Jinping នៅពេលដែលយន្តហោះរបស់ទ្រង់បានហោះកាត់ដែនអាកាសប្រទេសចិនក្នុងដំណើរយាងទៅនិងវិលត្រឡប់ពីប្រទេសម៉ុងហ្គោលីនោះ។ ព្រះអង្គក៏បានផ្តល់នូវសារជូនពរពិសេសដល់ប្រជាជនចិនផងដែរ នៅចុងបញ្ចប់នៃការជួបប្រជុំមហាជនដ៏ធំមួយនៅក្នុងរដ្ឋធានីអ៊ូឡង់បាទ័រ ប្រទេសម៉ុងហ្គោលីនោះ។
ព្រះអង្គក៏បានបង្ហាញពីព្រះគ្រូបុព្វជិតក្រុងហុងកុងពេលបច្ចុប្បន្ននិងដែលបានចូលនិវត្តន៍ហើយ ដើម្បីបង្ហាញពីក្តីស្រឡាញ់ដល់ប្រជាពលរដ្ឋចិន។
ប៉ុន្តែទំនាក់ទំនងរវាងក្រុងប៉េកាំងនិងបុរីវ៉ាទីកង់នៅតែមានភាពរកាំរកូស ជាពិសេសជុំវិញកិច្ចព្រមព្រៀងរយៈពេល៥ឆ្នាំស្តីពីការតែងតាំងព្រះគ្រូបុព្វជិតគ្រិស្តសាសនា។
អ្នកនាំពាក្យក្រសួងការបរទេសចិនអ្នកស្រី Mao Ning ត្រូវបានសួរកាលពីថ្ងៃចន្ទម្សិលមិញក្នុងរដ្ឋធានីប៉េកាំង អំពីការថ្វាយព្រះពរស្វាគមន៍របស់សម្តេចប៉ាប ដល់ប្រជាជនជនចិន ដោយអ្នកស្រីឆ្លើយថា «ចិនតែងតែប្រកាន់យកឥរិយាបថវិជ្ជមានជានិច្ចទៅលើការបង្កើនទំនាក់ទំនងជាមួយបុរីវ៉ាទីកង់ និងបានរក្សាទំនាក់ទំនងគ្នាជាមួយបុរីនេះ»៕
