ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

លោក Pompeo នឹង​ធ្វើ​ដំណើរ​ទៅ​​ទ្វីប​អាស៊ី​ ថ្វី​បើ​​លោក Trump ​បាន​ឆ្លង​ជំងឺ​កូវីដ១៩​​ក៏ដោយ


រដ្ឋមន្ត្រីការបរទេសសហរដ្ឋអាមេរិកលោក Mike Pompeo ថ្លែងនៅក្នុងសន្និសីទសារព័ត៌មានរួមមួយជាមួយនាយករដ្ឋមន្ត្រីក្រូអាស៊ី Andrej Plenkovic នៅទីក្រុង Dubrovnik ប្រទេសក្រូអាស៊ី កាលពីថ្ងៃទី២ ខែតុលា ឆ្នាំ២០២០។

រដ្ឋមន្ត្រី​ការបរទេស​សហរដ្ឋ​អាមេរិក​លោក Mike Pompeo និយាយ​ថា លោក នឹង​ធ្វើ​ដំណើរ​ទៅកាន់​តំបន់​អាស៊ី​ទៅ​តាម​ការ​គ្រោងទុក​ ដើម្បី​បញ្ជាក់​ឡើង​វិញ​នូវ​ការ​តាំងចិត្ត​របស់​សហរដ្ឋ​អាមេរិក​ដល់​សម្ព័ន្ធមិត្ត​របស់​ខ្លួន​នៅ​ទីនោះ បើ​ទោះ​បី​នៅ​ពេល​នេះ​ លោក​ប្រធានាធិបតី Donald Trump បាន​ឆ្លង​ជំងឺ​កូវីដ១៩ ​ក៏​ដោយ។

លោក Pompeo នឹង​ចាកចេញ​នៅ​ថ្ងៃ​អាទិត្យ​ទៅ​កាន់​ប្រទេស​ជប៉ុន ម៉ុងហ្គោលី និង​ប្រទេស​កូរ៉េ​ខាង​ត្បូង។

លោក Pompeo បាន​ថ្លែង​ទៅកាន់​អ្នក​យក​ព័ត៌មាន​នៅ​ក្នុង​ប្រទេស​ក្រូអាស៊ី មុន​ពេល​វិល​ត្រឡប់​មកកាន់​រដ្ឋធានី​វ៉ាស៊ីនតោន​វិញ​ កាល​ពី​ថ្ងៃ​សុក្រ​ ដោយលោក​បាន​បញ្ជាក់ថា លោក​និងលោកស្រី Susan ភរិយា​របស់​លោក ទើប​តែ​បាន​ធ្វើ​តេស្ត​អវិជ្ជមាន​មិនមាន​ជំងឺ​កូវីដ​១៩ ហើយ​ថា លោក​បាន​ជួបលោក​ប្រធានាធិបតី Trump ចុងក្រោយ​បំផុត​កាល​ពី​ថ្ងៃទី១៥ ខែកញ្ញា ។

លោក បាន​និយាយ​ទៀត​ថា លោក​និង​ភរិយា​របស់​លោក កំពុង​បន់ស្រន់​ឲ្យ​លោក​ប្រធានាធិបតី​និង​ភរិយា​របស់​លោក​ បាន​ឆាប់​សះ​ស្បើយ។

លោក David Stilwell ឧបការី​រដ្ឋមន្ត្រី​ការបរទេស​ទទួល​បន្ទុកកិច្ចការ​តំបន់​អាស៊ី​ខាង​កើត​និង​មហាសមុទ្រ​ប៉ាស៊ីហ្វិក​ បាន​ប្រាប់​អ្នក​យកព័ត៌មាន​តាម​ទូរស័ព្ទ កាល​ពី​ថ្ងៃ​សុក្រ ​អំពី​ដំណើរ​ទស្សនកិច្ច​របស់​លោករដ្ឋមន្ត្រី​ការបរទេស Pompeo នៅ​ពេល​ខាង​មុខ។

លោក Stilwell បាន​និយាយ​ថា លោក Pompeo នឹង​ឈប់​សំចត​ដំបូង​នៅ​ទីក្រុង​តូក្យូ ហើយ​វា​ចំ​ពេល​វេលា​ដ៏​ល្អ ពីព្រោះ​លោក Yoshihide Suga នាយក​រដ្ឋមន្ត្រី​ថ្មីរបស់​ជប៉ុន​ បានទើប​តែ​ចូល​កាន់​តំណែង។ លោក Stilwell បាន​និយាយ​ទៀត​ថា សហរដ្ឋ​អាមេរិក មើល​ឃើញ​ជំនួប​នេះ​ថា​ ជា​ការ​បញ្ជាក់​ឡើង​វិញនូវការ​រឹត​ចំណង​ភាព​ជា​ដៃគូ។

លោក Stilwell បាន​និយាយ​ទៀត​ថា៖ «ទំនាក់ទំនង​រវាង​សហរដ្ឋ​អាមេរិក​និង​ជប៉ុន​ដូចដែល​យើង​បាន​និយាយ​កាលពី​មុន ជា​ភាព​ដ៏​រឹងមាំ​នៃ​សន្តិភាព សន្តិសុខ​និង​វិបុលភាពសម្រាប់​តំបន់​ឥណ្ឌូ​ប៉ាស៊ីហ្វិក»។

លោក Stilwell ដែល​ជា​អ្នក​ការទូត​កំពូល​អាមេរិកាំងម្នាក់​សម្រាប់​តំបន់​អាស៊ី​ខាង​កើត បាន​និយាយ​ថា លោក​រដ្ឋមន្ត្រី​ការបរទេស Pompeo នឹង​ចូលរួម​ជំនួប​ថ្នាក់​រដ្ឋមន្ត្រី​របស់​ក្រុម​ចតុភាគី​ នៅ​ក្នុង​ទីក្រុង​តូក្យូ​ ដែល​រួម​មាន​សហរដ្ឋ​អាមេរិក ជប៉ុន អូស្ត្រាលី និង​ឥណ្ឌា។ កន្លង​មក ​ចិន​ប្រកាស​ប្រឆាំង​ក្រុម​ចតុភាគី​នេះ​ថា​ ជា​ការ​ប៉ុនប៉ង​មួយ​ដើម្បី​រាំងខ្ទប់​ការ​អភិវឌ្ឍ​របស់​ខ្លួន។

ដំណើរ​ទស្សនកិច្ច​របស់​លោក Pompeo កើត​មាន​ឡើង​ នៅ​ពេល​ដែល​ទំនាក់ទំនង​រវាង​សហរដ្ឋ​អាមេរិក​និង​ចិន​ បាន​ធ្លាក់​ដល់​ចំណុច​ទាប​បំផុត ហើយ​លោក Pompeo ជា​អ្នក​រិះគន់​គណបក្ស​កុម្មុយនិស្ត​ចិន​ដ៏​ខ្លាំង​បំផុត​មួយ ​និង​អ្វី​ដែល​លោក​មើលឃើញ​ថា​ជា​គោលនយោបាយ​ដ៏​គគ្លើន​របស់​របស់​រដ្ឋាភិបាល​ក្រុង​ប៉េកាំង៕​

XS
SM
MD
LG