ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋមន្រ្តី​ការបរទេស​អាមេរិក​លោក Pompeo ធ្វើ​ទស្សនកិច្ច​​នៅ​​ស្វីស


រដ្ឋ​មន្រ្តីការ​បរទេស​សហរដ្ឋ​អាមេរិក​លោក Pompeo និង​អ្នកស្រី​អធិការបតី​នៃប្រទេស​អាល្លឺម៉ង់ Angela Merkel ថ្លែងទៅ​កាន់​អ្នក​សារព័ត៌មាន​​រួម​គ្នា​មុន​នឹង​ចូល​រួម​ប្រជុំក្នុង​ទីក្រុង​បែរឡាំង​កាលពី​ថ្ងៃទី​៣១ ខែឧសភា ឆ្នាំ២០១៩។
រដ្ឋ​មន្រ្តីការ​បរទេស​សហរដ្ឋ​អាមេរិក​លោក Pompeo និង​អ្នកស្រី​អធិការបតី​នៃប្រទេស​អាល្លឺម៉ង់ Angela Merkel ថ្លែងទៅ​កាន់​អ្នក​សារព័ត៌មាន​​រួម​គ្នា​មុន​នឹង​ចូល​រួម​ប្រជុំក្នុង​ទីក្រុង​បែរឡាំង​កាលពី​ថ្ងៃទី​៣១ ខែឧសភា ឆ្នាំ២០១៩។

រដ្ឋ​មន្រ្តីការ​បរទេស​សហរដ្ឋ​អាមេរិក​លោក Pompeo ​បាន​ចូលរួម​កាល​ពី​ថ្ងៃ​សៅរ៍​នៅឯ​ប្រជុំសម្ងាត់​របស់ក្រុម Bildenburg ក្នុង​ទីក្រុង Montreux ​ប្រទេស​ស្វីស ​ដោយ​អ្នក​ចូល​រួម​ខ្លះ​បាន​សម្តែង​នូវការ​ព្រួយ​បារម្ភ​អំពីការ​ប្រកាស​យក​ពន្ធ​គយ​លើ​ប្រទេស​ម៉ិកស៊ិក ​ធ្វើ​ឲ្យ​ប៉ះពាល់​ទីផ្សារ​ពិភពលោក ​និង​ការកើនឡើង​នូវការ​តាន​តឹង​រវាង​សហរដ្ឋ​អាមេរិក​និង​ប្រទេស​អ៊ីរ៉ង់។

​ជំនួប​ដែល​មាន​រយៈ​ពេល ​៤​ថ្ងៃ​របស់​វរជនមក​ពី​តំបន់​អឺរ៉ុប ​និង​អាមេរិក​ខាង​ជើង ​នៅ​កន្លែង​លំហែ​កាយ​ក្នុង​ប្រទេស​ស្វីស ​រួមមាន​ឥស្សរជន​ល្បី​ខាង​នយោបាយ ពាណិជ្ជកម្មការពារ​ប្រទេស ​និងការ​ស៊ើបការណ៍​សម្ងាត់។ ​ប្រធាន​បទ​នៅ​ឆ្នាំ​នេះ​គឺ «ស្ថិរភាព​សណ្តាប់​ធ្លាប់»​។

ក្រុម​អ្នក​រិះគន់វោហាសាស្រ្តចំ​ៗ​ និង​គោល​នយោបាយ​របស់​ប្រធានា​ធិបតី​អាមេរិក​លោកដូណាល់​ ត្រាំ ពោលអះអាង​ថា វោហាសាស្រ្ត​និង​គោល​នយោបាយ​របស់​ប្រធានា​ធិបតី​ ត្រាំ​ ​ធ្វើ​ឲ្យមាន​បញ្ហាដល់របៀប​រៀបរយ​ក្រោយសង្គ្រាម​ និង​សម្ព័ន្ធ​មិត្ត​របស់​សហរដ្ឋ​អាមេរិក។ ​ក្រុមអ្នកគាំទ្រ​ប្រធានា​ធិបតី ​ត្រាំ ​ទទូចថា​ អស់​រយៈ​ពេល​ជាច្រើន​ឆ្នាំ​ហើយ សហរដ្ឋ​អាមេរិក​ចាត់​ទុក​ជា​រឿង​ធម្មតា ​ដោយ​មិន​បាន​ពិចារណាអំពី​អ្វី​ដែល​ជា​ការអស្ចារ្យ​បំផុតសម្រាប់​មហាអំ​ណាចផុត​លេខ​នោះ ហើយ​ការគិត ​«ពីប្រទេស​អាមេរិក​មុន»​ ជាការ​ចាំបាច់។

លោក​រដ្ឋមន្រ្តី​ការបរទេស​អាមេរិក Mike Pompeo បាន​ចូល​រួមជាមួយ​លោក​ Jared Kushner ទីប្រឹក្សា​ប្រធានា​ធិបតី​ និង​ជាកូន​ប្រសារ​របស់​ប្រធានា​ធិបតី​ ត្រាំ ​បានចាក​ចេញ​ពី​ទីក្រុង Tel Aviv ​នៃ​ប្រទេស​អ៊ីស្រាអែល​ មក​ចូល​រួម​ជំនួប​នោះ ​បន្ទាប់​ពី​ដំណើរ​បំពេញ​ទស្សនកិច្ច​ប្រទេស​៣​ នៅ​តំបន់​មជ្ឈឹម​បូព៌ា​ ហើយ​លោក Jens Soltenberg អគ្គលេខាធិការ​អង្គការ​អូតង់ ​និង​លោក Ursula von der Leyen រដ្ឋមន្រ្តី​ការពារ​ប្រទេស​អាល្លឺម៉ង់ ​បាន​ស្ថិត​ក្នុង​ចំណោម​ឥស្សរជន​ផ្សេង​ទៀត។ លោក​រដ្ឋ​មន្រ្តីការ​បរទេស​អាមេរិក នឹង​ជួប​នៅ​ថ្ងៃ​អាទិត្យ​នេះ​ជាមួយ​រដ្ឋ​មន្រ្តីការ​បរទេស​ប្រទេស​ស្វីស។

លោកស្រី​អធិការបរតី Angela Merkel នៃ​ប្រទេស​អាល្លឺម៉ង់​ បាន​និយាយ​មុន​ជំនួប​ថា ​សហរដ្ឋ​អាមេរិក ​បន្ត​ជា​ដៃគូ​ដ៏​សំខាន់​បំផុត​របស់​ប្រទេស​អាល្លឺម៉ង់​នៅ​ខាង​ក្រៅអឺរ៉ុប ​ក៏ប៉ុន្តែ ​សម្រាប់​បញ្ហា​ប្រទេស​អ៊ីរ៉ង់ ​លោក​ស្រី​បាន​បញ្ជាក់​យ៉ាង​ច្បាស់​ថា អាល្លឺម៉ង់​គាំទ្រ​កិច្ច​ព្រម​ព្រៀង​នុយក្លែអ៊ែរ​អ៊ីរ៉ង់ ​ថ្វីបើ​សហរដ្ឋ​អាមេរិក ​ដក​ខ្លួន​ចេញ​ពី​កិច្ច​ព្រម​ព្រៀង​នោះ​ក៏ដោយ៕

XS
SM
MD
LG